Den un conferencia di prensa cu a tuma luga e dia di ayera, sindicatonan a indica cu dia 05 di januari nan a informa gobierno cu entrante 1 di februari nan lo cuminsa tuma nan dianan extra liber den compensacion pa lo cual ta e recorte di salario di 12.6%.

Minister presidente Evelyn Wever-Croes a duna un contesta na esaki unda el a bisa cu ta contra ley lo cual sindicatonan kier haci, Edward Maduro presidente di sindicato di Aduana SADA a sigura cu esaki tabata un contesta intimidante di parti di gobierno unda cu diahuebs ultimo sindicatonan a bolbe manda un carta y asina aki cartanan a bay y bin di parti y parti den dianan aki.

Ta na su luga cu si gobierno kier sigui e discusion akinan yama sindicatonan pa nos discuti na mesa, en bes di un bay bin di carta”, Maduro a expresa.

Nan ta pensa cu ta na su luga pa duna un conferencia di prensa pa informa riba e carta cu gobierno a manda pa nan diahuebs ultimo caminda cu gobierno tin algun punto cu “nos no ta comparti esakinan” comunidad por a mira e diferente entrevistanan y articulonan di prensa cu for di luna di april 2020 riba e tema di recorte di 12.6% unda cu manera Maduro a sigura, “gobierno no ta sincero ni cu sindicatonan, ni cu trahadonan, ni cu pueblo”.

Asina mes, el a menciona cu no ta berdad cu gobierno a sinta cu sindicato pa negocia e 12.6%, “si minister ta papia constantemente di integridad, mi ta kere cu esaki no ta na su luga”, el a bisa.

Recorte di 12.6% a ser poni riba mesa dia 17 di april di 2020 “na un forma unilateral na unda cu gobierno na ultimo ora a yama sindicatonan urgente pa informa sindicatonan cu ta bay cuminsa haci recorte entrante 1 di mey di e aña ey, pa loke Maduro a señala cu na ningun momento nan a sinta dialoga y papia riba esey.

Tambe el a enfatisa cu loke gobierno ta bisa cu nan ta cumpliendo cabalmente cu loke Hulanda a pidi, “esey tampoco ta cuadra, pasobra lo cual nos a wordo informa ta cu tanten cu gobierno no ta bin cu cambio structural pa baha gastonan, e topico di 12.6% no ta un topico ni den discusion”, Maduro a enfatisa.

Asina mes, Maduro a comenta cu gobierno a bisa den e carta cu sindicatonan a desvia di nan lucha inicial y cu nan ta di acuerdo pa entrega e dia y no preocupa mas cu 12.6%, “nos tin cu enfatisa cu esey tabata e prome punto cu tabata, ta y lo keda punto di discusion di sindicatonan y su miembronan pa revoca e recorte di 12.6%, na ningun momento nos a bisa cu nos ta bay laga e lucha ey un banda y bay entrega dia, esey ta duidelijk cu nos no ta bay bisa gobierno cu nos ta bay keda contento cu dos dia liber pa luna”, el a declara.

Den e carta segun Maduro a comenta, tabata bisa cu tanten cu 12.6% no por wordo duna back den salario nan ta bay tuma pa cuminsa, dos dia liber tur luna, gobierno tambe a keda insisti den e parti di comision na unda sindicatonan ta bisa cu nan ta di acuerdo pa sinta den dialogo pa papia pero no den un comision, “nos ta willing pa sinta cu nos dunado di trabou pero esey no por bay den un comision manera gobierno ta pretende di bin cune, pasobra nos a indica na varios ocasion caba ki bal sinta cu un comision na unda cu cifranan cu ta wordo presenta y cu nan mes ta bisa cu nan no tin tempo pa tin cifranan acredita, nos no por bay sinta cu cifranan cu nos no ta confia di nan”, Maduro a expresa.

Gobierno di Aruba a publica cu dialuna nan lo ta warda e tres representante di sindicatonan cu lo forma un comision unda cu sindicatonan a sigura den un otro carta cu nan a manda ayera diabierna, cu nan ta di acuerdo pa sinta pero no ta trata solamente di tres sindicato, tin otro sindicatonan cu tin nan miembronan di compania NV y otronan cu tin otro dunado di trabou cu no ta gobierno y cu nan tin otro maneho pero cu nan ta bayendo den mesun direccion, cu ta pa revoca e 12.6% cu cada ken ta haciel’e cu nan dunado di trabou cu ta coresponde.

Di otro banda, ayera atardi minister di Finansa Xiomara Maduro a publica riba su Facebook page cu ayera funcionarionan publico a haya nan bashie premie di 1.918 florin, esaki a trece diferente comentarionan riba rednan social, incluyendo di sindicatonan mes unda cu Maduro a manifesta cu “esey no ta algo di broma cune, esey ta algo cu gobierno ta debe e ambtenaar y ta un cos cu bo tin cu cumpli cune, nos ta condena esaki fuertemente y no hunga cu sentimento di hende”.

Di su parti minister Xiomara Maduro a expresa cu ningun minister of parlamentario ta cobra bashi premie, solamente empleado publico ta cobra esaki conforme acuerdo bilateral di dia 28 di mei di aña 2014.

“A pesar di situacion financiero precario di pais Aruba, e hecho cu lo cual nos no a haya sosten di likides for di Hulanda, asina mes gobierno a hiba un maneho financiero responsabel pa por cumpli cu tur lo cual ta e debernan financiero local pero tambe internacional” minister Maduro a expresa den un video publica riba su Facebook page.

Tambe el a señala cu tur luna a paga e salarionan na e tempo stipula y luna aki igual conforme lo cual ta bira e acuerdo bilateral cera pa sindicatonan na aña 2014 y cu gobierno a cumpli ora a paga e bashi premie di januari “e suma aki a wordo paga 100% y e aña ki e suma ta di 1.918 florin, ta bon pa nos indica cu e acuerdo aki ta un documento publico di e cual tambe por wak e sumanan cu a wordo paga for di 2014 te cu aworaki”.

El a trece dilanti esaki pa asina pueblo por tin un miho comprendemento di kico ta trata esaki, segun loke minister Maduro a expresa.

Pa finalisa, sindicatonan ta espera cu nan por tende di gobierno pa yama nan den un reunion cu full e sindicatonan aki cu ta den e lucha y tanten cu nos no lo haya nos 100% di salario nos lo haya nos dianan liber”, Edward Maduro presidente di sindicato di Aduana SADA a finalisa.