Cientificonan a indica 3 malesa como esunnan cu por causa un emergencia di salud mundialmente.
Esaki e fuente Ingles BBC a publica. Pa motibo di esey un coalicion di gobiernonan y fundacionnan a pone 460 miyon dollar hunto pa asina por bin cu un vacuna mas pronto posibel pa e Mers, Lassa fever y Nipah virus. Banda di esaki nan a pidi na World Economic Forum Davos un suma adicional di 500 miyon dollar. E meta ta pa yega na dos vacuna experimental nobo pa cada malesa dentro di cinco aña. Normalmente e proceso pa yega na vacuna nobo ta tuma un decada pa desaroyo y mester hopi mas placa.
E plamamento di ebola y tambe esun di Zika ta mustra e urgencia di un preparacion mas profundo como cu den ambos caso mundo no tabata prepara debidamente. Tur esaki tin di haber cu e mundo cambiando unda mas y mas hende ta biaha y asina lo crea epidemia mas facil. Ebola a mata mas cu 11.000 hende na tres pais Africano. Zika a laga miles di mucha cu deficiencianan celebral. Den ambos caso nos no tabatin vacuna pa asina preveni cu hende lo bira malo.
TOP 3
Lassa fever, Middle East Respiratory Syndrome (Mers) y Nipah virus ta malesanan relativamente chikito pero cu un potencial hopi grandi. Nan ta den e top di e lista di e 10 malesanan cu WHO (organisacion mundial di salud) a indica como malesanan cu prioridad como cu nan ta esun cu por causa e siguiente ‘outbreak’ grandi.
Sinembargo WHO tambe ta bisa cu e ta keda un ‘loteria’ di virusnan pasobra tin hopi mas cu por cambia y asina bira peligroso pa hende. Asina mes e ta bira dificil pa planea pa e futuro y e companianan farmaceutico no ta mira mucho ganashi den e trabou di traha vacuna. Un factor cu te ainda mundo a scapa for di dje, ta cu te awor niun di e virusnan cu a plama, por haya por media di aire. Den e caso ey, e impacto tabata mucho mas grandi, lagando e mundo den un situacion hopi mas vulnerabel, asina e cientificonan ta splica.
