Sindicatonan ta bisa gobierno: Si lo sigui retene salario ademas di e 12.6%, lo tuma accionnan legal of laboral

Despues di un carta cu minister presidente Evelyn Wever-Croes a manda na diferente sindicatonan dia 05 di januari ultimo contestando un otro carta cu nan a manda indicando cu nan ta mantene nan posicion cu e recorte di 12.6% mester wordo revoca, sindicatonan a reacciona cu e opinion di un compensacion husto pa e reduccion ey di salario.

Nan ta menciona cu nan tin di opinion cu un compensacion husto pa e reduccion di e salario (incluyendo beneficionan) di 12.6% mester ta un reduccion den e orarionan di trabou pa un igual porcentahe. Den e caso aki, den e carta sindicatonan ta señala cu “Gobierno no por exigi cu e trahado ta traha e mesun cantidad di ora pero ta ricibi menos pago pa esaki, ta remarcabel cu Gobierno a permiti y te hasta impone esaki den sector priva caminda cu e reduccion den salario a bay man den man cu un reduccion den oranan di trabou, esey lo ta inconsistente y un abuso di poder si Gobierno ta impone esaki na otronan y no na su mes”.

Nan tambe ta remarca cu no por reduci oranan unilateralmente, ta remarcabel tambe cu desde inicio (1 di mei 2020) “Gobierno si a haya ta bon pa unilateralmente reduci e salario di e trahadonan. Den esaki mester tin tambe igualdad den trato. Si Gobierno su reaccion lo ta pa retene atrobe un parti di e salario di e trahado cu lo ta trahando 12.6% menos, esaki lo forma un sancion desproporcional, inaceptabel y inhusto, forsosamente e sindicatonan lo mester bay tuma accionnan legal y/o laboral den tal caso”.

Pa finalisa nan kier atende Gobierno riba articulo 8 di e Landsverordening tijdelijke versobering bezoldigingen en voorzieningen overheid, cu ta encera un obligacion di Gobierno pa “entrega un relato por escrito di e efectividad di e reduccion temporal di salario, pa asina tambe e trahado cu a entrega (forsosamente) parti di su salario, por mira e efectividad di esaki. For di esaki tambe lo por deduci si y pa cuanto tempo mas y den ki grado lo mester continua cu e reduccion (of no). Gobierno no a cumpli cu e obligacion legal aki, cual sindicatonan ta bolbe exigi pa cumpli cu esaki”.

Den e carta cu sindicatonan a manda dia 05 di januari diferente sindicatonan como SIMAR, SEPPA SADA, FTA y SPA a informa Conseho di Ministro den su calidad como dunado di trabou cu nan ta lamenta e posicion di gobierno como dunado di trabou pa mantene retencion di salario di trahado y cu 12.6% mester wordo revoca.

Tambe nan a pone riba mesa cu empleadonan cu ta entrega mester haya un compensacion riba esaki como traha conforme e pago, den caso aki, trahamento di menos ora cu mester bay den forma ekivalente cu e entrega di 12.6% segun loke nan señala.