Na aña 2021 comercio di Aruba tawata tin varios reto cu a wordo surpasa cu ayudo di sosten di likides di Hulanda y un sector turistico cu a sa di surpasa expectativa. Drentando aña 2022, comercio di Aruba ta enfrenta un reto grandi atrobe, e asina yama variante di COVID Omicron cu tin ATIA sumamente preocupa pa varios rason.

Comercio local

E preocupacion primordial di ATIA ta cu e variante Omicron aki a plama sumamente lihe y ta keda plama hopi lihe. E maneho adapta door di DVG ta causa cu personanan cu tawata tin contacto cu un persona COVID positivo mester bay den cuarentena obligatorio pa 5 dia. E maneho aki ta conta pa ambos persona cu ta vacuna of no vacuna. Dia 5 di Januari 2022, Aruba a conoce un nivel record di contagio contando cu 1162 caso nobo di COVID, di cual 1046 ta personanan local y na total tin 3730 caso activo. Esaki ta sin conta tur persona cu ta “zelf test” y no meld na DVG pa haci un PCR test.

E maneho di isolacion ta uno cu comercio a custumbra cune y ATIA ta aplaudi cu a ahusta esaki paso e ta baha e presion pa e comerciantenan y ta sigui e maneho mundial. Unda e presion a subi bek ta e maneho di cuarentena ora ta biba na mes un cas. Den pasado, ora un persona ta vacuna, no mester a bay cuarentena obligatorio si no tin sintoma. Hopi comerciante mester adapta nan orario di trabou te hasta cera porta por completo door cu tin varios empleado positivo y e otro nan lo mester bay den cuarentena. Esaki ta haci cu e comerciante ta perdiendo hopi entrada pa por paga e empleadonan y su otro gastonan.

Si un persona bay den cuarentena e gasto sumamente grandi ta cay riba e dunado di trabou paso e persona no ta oficialmente AO. SvB a indica cu nan ta proyecta cu e gasto pa e grado di AO ariba e dia ey lo costa alrededor di Afl. 250,000. ATIA ta calcula cu pa comercio e ta costando actualmente alrededor di Afl. 1 miyon pa dia y e suma ta aumentando diariamente hunto cu e casonan activo paso e dunado di trabao mester cubri e prome tres dia di e empleado su AO mas e 20% di e resto di e dianan cu SvB ta cubri.

Comercio apenas ta recuperando for di e sla mas duro ricibi den nos historia recien, y hopi comerciante no sa con nan lo bay paga e trahadonan infecta (isola) of den cuarentena fin di luna, mientras cu nan negoshi no ta produciendo entrada. Por bisa cu comercio ta den un lock-down virtual door di e cantidad di AO y hopi no lo por wanta e golpi aki na e momento di recuperacion aki specialmente cu no tin sosten di likides mas pa comerciante of FASE.

Turismo

Riba 4 di januari, CDC na Merca a hisa e nivel pa di contagio pa codigo 4, y por a nota varios articulo riba rednan di Media grandi, manera CNN, Apple News etc., indicando pa no biaha bay Aruba. Actualmente Aruba atrobe ta den e top 10 pais nan na mundo cu mas infeccion (Omicron) per capita. Tur esaki ta afecta nos pilar economico cu ta turismo cu ta trece consecuencianan economico pa full comercio di Aruba.

Futuro

ATIA ta positivo cu den 2022 nos lo wak avancenan importante den control y combatimento di COVID, pero pa awo nos ta recomenda tur persona, cu ta scoge pa esey, pa tuma nan vacuna y booster shot pa haci esaki mas pronto posibel. Alaves tambe pa nos tur mantene nos mes na e reglanan na vigor di DVG: laba man frecuentemente, mantene distancia y bisti mondkap tur caminda. Maneho pa cu e ola aki mester ta skerpi pa comercio por supera e ola di contagio y AO aki cu ta paralisando nos economia.

ATIA ta insigur si Gobierno di Aruba lo por asisti comercio den e tempo dificil aki ya cu Aruba no a haya sosten di likides di Hulanda. Esaki lo por nifica cu lo mester retira empleado y baha gasto pa negoshi por sobrevivi. ATIA ta spera cu dunadonan di trabou no lo mester yega asina lew pasobra esaki ta afecta nos economia negativamente. ATIA ta spera cu nos sali lo mas lihe posibel for di e situacion aki. Nos ta pidi e team di maneho pa tene hopi cuenta cu e echonan aki.

ATIA

Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org