Durante un conferencia di prensa ayera mainta na Centro di Actividad Rancho, presidente di Stichting Rancho, Sr. Clifford Rosa, hunto cu Sra. Lay Hing de Kort, di Cornerstone Economics, Sr. Di-Stefano Wernet, tesorero di Stichting Rancho y Ginelly Quandt, coordinadora di Centro di Actividad Rancho a anuncia e plan nobo di Stichting Rancho.
Sr. Rosa a splica e plan nobo aki, Plan Strategico di Capacitacion pa e periodo 2022-2026 a wordo crea den e ultimo seis lunanan danki na fondonan di Samenwerkende Fondsen y tambe CEDE Aruba. El a menciona cu e idea a yega na nos na final di december 2020, hopi biaha hopi hende ta puntra nos con nos ta sobrevivi e pandemia y e ta algo hopi duro, e ta algo hopi dificil mirando cu nos mester a cambia di un luga otro.
“Awe nos ta hopi contento cu nos por informa comunidad, locual cu a pasa y locual cu ta bay pasa aworaki. Pesey awe nos ta anuncia e Plan Strategico di Capacitacion, cu ta un proyecto cu lo ta internacional tambe”, Sr. Rosa a indica.
El a menciona cu Stichting Rancho lo ta celebrando 12 aña di existencia, y como fundacion nan tabatin mester di un capacity building pa asina actividad y proyectonan ta miho structura, pa crea cambionan den structura di directiva, cambionan den structura di e organisacion mes pa e bira mas comercial. “Mi ta bisa esey cu accento pasobra e parti cultural ta locual nos ta bay enfoca riba dje, pero den su aspecto si no tin fondo nos mes lo metser bay crea e fondo y esey mi ta kere ta bay ta e dinamica nobo di 2022 pa 2026”, el a bisa.
Nos ta bay crea un Stichting Rancho hopi mas stabiel y sostenibel pa e trabounan cu nos ta bin ta haciendo y locual nos ta bay sigui haci tambe pa duna e comunidad e capacitacion den herencia”, el a agrega.
Sr. Rosa a menciona tambe cu e plan strategico lo ta disponibel ariba nan website pa asina comunidad por lesa e rapport y por duna nan comentarionan, nan preguntanan, nan sugerencianan y a enfatisa cu nan mester di comunidad pa nan por ehecuta e proyecto aki y ehecuta e proyectonan cu lo bay bin.
Sra. Lay Hing de Kort, representante di Cornerstone Economics cu hunto cu e organsacion di Stichting Rancho tabata encarga pa traha e plan strategico nobo, a elabora un poco mas ariba e obhetivo di e Plan Strategico di Capacitacion 2022-2026.
El a splica cu Cornerstone Economics a facilita Stichting Rancho cu e plan strategico cu ta encera un plan pa e proximo cuater añanan caminda nan lo determina kico ta e buraconan kico ta e necesidadnan di e fundacion pa nan por cumpli cu e metanan cu nan tin den futuro pa nan fundacion. Defini kico ta e prioridadnan pa e siguiente cuater añanan y defini tambe e detayenan di emision.
“Fundacion Rancho su enfoke ta pa conserva y proteha e cultura di e bario di Rancho, pero den esaki nos a bin ripara cu e cultura su so no ta para den un manera individual pero e tin areanan social economico cu e ta influencia tambe”, el a indica.
Sra. De Kort a sigui splica cu den e plan strategico aki nan ta enfoca ariba cinco pilar cual ta e sostenibilidad di e bario,educacion di personanan cu ta biba den dje, inclusion di cada un di e cultura- y hendenan cu ta forma parti di e bario, preservacion di e cultura y tambe partnerships cu por bin pa mehora e bario.
Den e proceso pa crea e plan aki, segun Sra, de Kort a splica, nan a sinta cu un grupo di residentenan, boluntarionan di Rancho y e directiva di e fundacion tambe y a traha un lista di inversionnan, di sistemanan di infrastructura cu mester pa nan por logra e mision di e fundacion, cu ta yuda Rancho bira un bario mas sostenibel cu ta forma e curason di Oranjestad,
Sr. Di-Stefano Wernet, tesorero di Stichting Rancho, a remarca tambe cu e plan strategico di capacitacion ta pa Stichting Rancho, pa medio di nan vision y nan mision, traha pa e periodo 2022-2026 den cual e tema central lo ta cultura.
“Cultura ta hopi importante, e ta bay hopi mas amplio te na nos manera di biba y aworaki, principalmente den e temporada extraordinario cu nos ta den, nos tin cu evalua y pensa di nobo nos manera di biba, nos manera di traha y manera di deal cu otro”, el a indica.
El enfatisa tambe cu Stichting Rancho su enfoke ta cultura pasobra cultura tin relacion cu economia, cu educacion, perseverancia, cu colaboracion y el a haci un apelacion na pueblo di Aruba pa sostene Stichting Rancho pa yuda cu e progreso y bienestar di Aruba. “Den nos vision y mision e fortalesa ta cu Rancho ta e curason di playa. Nos ta un catalisator pa cambio y nos ta kere den playa y nos ta kere den un miho bida, miho mundo pa medio di cultura”, el a agrega.
Srta. Ginelly Quandt, coordinador di Centro di Actividad Rancho a anuncia tambe dos actividad grandi cu Stichting Rancho lo tin den luna di januari. E prome actividad ta e careda di boto miniatura cu ta tuma luga tur aña ariba Dia di Betico, 25 di januari, na Governor’s Beach Bay.
El a anuncia tambe cu e mercado cu Stichting Rancho ta organisa tur luna, Marshe Rancho, pa e luna aki lo tin e tema di plantacion y a invita tur persona cu tin plantacion pa participa den e mercado aki. Marshe Rancho lo tuma luga dia 27 di januari na e plaza di Centro di Actividad Rancho. Pa mas informacion por tuma contacto cu Stichting Rancho.
“E ta hopi importante pa nos pa nos keda enfoca ariba e seguridad di cuminda di e bario, pero tambe di Aruba, pa nos keda den e pensamento cu nos mester cosecha nos mesun fruta y berdura y nos mester yega na esey. Pesey bao di e proyecto di ‘Food Security’ nos ta sigui enfoca ariba plantacion den bario”, Quandt a finalisa.
