Prome Minister Evelyn Wever-Croes: 2022: Aña di Inversion y Oportunidad

Diamars 4 di januari 2022, Prome Minister Evelyn Wever-Croes den nomber di Gobierno di Aruba, a anuncia decision di Conseho di Minister pa decreta e aña aki, aña 2022, como aña di Inversion y Oportunidad.

Desde Covid 19 a haci su entrada na Aruba na maart 2020, nos pais a sufri un sla hopi duro. No solamente Aruba a sinti e sla aki pero mundo henter a wordo sacudi pa e pandemia aki, haciendo e efecto mas devastador ainda pa un isla cu su pilar economico ta turismo.

Aña 2021, tawata un aña cu hopi reto pero cu determinacion y trabou duro, a cuminsa cu e trayecto importante di recuperacion. Cu esfuerso di cada ciudadano, ta logrando e recuperacion cu tawata kier a logra den e situacion cu nos tawata prome cu e pandemia.

Aña 2022, no solamente nos kier logra recupera y yega bek manera nos tawata ta prome cu e pandemia, sino nos kier ta miho cu prome cu e pandemia. Aña 2022, lo ta un aña na unda inversion lo trece oportunidadnan nobo pa nos tur.

Desde Gabinete Wever-Croes 1, cada aña a wordo decreta cu un tema.

– 2018 Aña di Papiamento

– 2019 Aña di Famia y Cuido di nos Muchanan

– 2020 Aña di Innovacion y Enseñansa

– 2021 Aña di Recuperacion

E vision di Gabinete Wever-Croes II pa aña 2022, Aña di Inversion y Oportunidad, ta pa crea Inversion den sentido amplio. Inversion den bo mes; Inversion den nos economia y Inversion den nos pais creando Oportunidad pa tur ciudadano di nos pais.

“Cu cada Inversion nos ta bay crea oportunidadnan nobo y cu e oportunidadnan nobo cu surgi, ta crea mas inversion cu ta crea mas oportunidad y diversidad den inversion. Pues cu un interpretacion amplio di Inversion y Oportunidad, den nos economia, finanzas, medio ambiente, agricultura, den e ser humano, den salud, salud mental, den enseñansa.

Pero pa nos logra e meta aki, e Aña di Inversion y Oportunidad, Aruba mester di nos tur. Na e momento aki, Aruba ta conta riba cada un di nos pa duna di nos parti cu optimismo, positivismo y determinacion pa nos logra e metanan cu nos propone y asina logra hiba nos pais padilanti”, Prome Minister Evelyn Wever-Croes a enfatisa.