Den un entrevista pa Bon Dia Aruba Sr. Hubert Dirksz, tesorero di Federacion di Trahadonan di Aruba (FTA), a splica con aña 2021 a bay pa e federacion, e retonan y recuperacion. E ta conta tambe di e expectativanan cu FTA tin pa aña nobo 2022.

Sr. Dirksz ta indica cu aña 2021 tabata un aña cu, a pesar cu e recuperacion cu a cuminsa toch na 2020 caba y na 2021 el a sigui, durante aña a premira cu e recuperacion di camber lo a bay back na loke e tabata prome, e yegada di e variante di Covid, Omicron, a haci cu e recuperacion di camber no a supera loke nan tabata pensa.

Na mesun momento el señala cu pa loke ta e negociacionnan di CAO, e nivel di contractnan tur a mehora, cu excepcion di dos compania di comercio cu a keda den un situacion dificil, cu tabata dificil caba prome cu e crisis di Covid. “Bo por bisa aña 2021 no a bay malo”, el bisa.

El a remarca cu FTA a tene cuenta tambe cu e hecho cu companianan a reduci e orario di trabao pa empleadonan cu consecuentemente ta nifica entrada menos pa cada trahado y door di esey FTA a reduci tambe cu e mesun porcentahe cu a reduci e orario di trabao di trahadonan, e contribucion.

Di otro banda, Sr. Dirksz ta indica, cu tur loke cu a wordo entrega a wordo recupera den casi 100%. “Esey ta hopi bon”, el a bisa. “Tin un speransa toch cu na momento cu bo ta firma un CAO di tres aña, esey ta significa cu toch tin speransa cu e situacion lo mehora”.

El a sigui splica cu FTA a firma den aña 2021 CAO, den sector di construccion, den sector hotelero tambe y el a señala cu sector comercio a keda dificil pero nan ta trahando ariba esey y sector bancario tambe nan ta bezig cune, mescos cu e otro sectornan. Pero a pesar di tur e situacion, el a expresa cu FTA ta kere cu no solamente recuperacion di ocupacion di cambernan, pero tambe e subsidio cu a ricibi for di Hulanda a yuda pa e companianan full priva, companianan estatal y pa Gobierno por tin forsa y un capacidad pa recupera.

Pa loke ta trata expectativanan pa e aña nobo aki, el apunta cu nan ta mira cu e situacion lo keda stabiel, sperando si cu e ocupacion di cambernan lo keda bon. El a enfatisa cu FTA ta consciente cu e situacion financiero di pais Aruba ta keda un reto, un situacion dificil y di otro banda nan ta consciente tambe cu Aruba tin un demanda grandi pa loke ta turismo y esaki ta trece un preocupacion ora cu ta trata aumento di capacidad di camber.

“Nos ta kere si, cu aunke tin un necesidad financiero pa e caha di Gobierno, nos tin un preocupacion si en caso mester bay percura pa aumenta e cantidad di cambernan cu sin control esey lo por tin presion ariba mercado laboral cu lo por trece su problemanan”, el a indica.

“Pa 2022 mester tene bon cuenta pa mantene e producto y no haci Aruba mas caro di loke e ta caba. Mester tene cuenta pa mantene, cual nos ta haci nos best den e parti aki, un nivel di poder di compra pa e ora por keda den un balans pa asina e situacion social no bay atras mientras cu tin un desaroyo economico”, el a agrega.

Desempleo ta un problema cu mas cu claro a aumenta cu e pandemia di COVID-19. Sr. Dirksz ta splica cu FTA ta consciente di esey y el a enfatisa cu no por trece trahadonan di afo mientras cu tin desempleo localmente mirando cu esey tambe ariba su mes lo por afecta e producto turistico cu tambe por tin su impactonan negativo ariba termino largo.

“Nos ta kere mester percura pa atende cu e demanda pa trabao localmente prome y si ta necesario mester un programa di her-, bij-, omscholing pa recapatisacion di esunnan cu no a yega di traha den e sector eynan y tambe pa nivela e beneficionan pa e ora e ta mas facil pa ubica esunnan cu ta desemplea of cu ta traha den otro sector pa bay over den e sector hotelero”, el a bisa.

Si yega asina leu cu no por haya hende despues di haci todo lo posible pa cubri e demanda pa trabao localmente, segun el a indica, e ora ey no ta keda nada otro cu permiti trahadonan di afo bin Aruba pa traha, pero bao di miho medidanan cu locual a tuma den pasado pa trahadonan di afo, cu e pensamento pa no haci daño na e producto turistico.

Ariba e topico di e lucha sindical pa elimina e recorte salarial di 12.6% cu ya tin algun luna caba andando, Sr. Dirksz ta remarca cu e ta kere cu e lucha ta husto. “Nos sa cu e ultimo caminda cu mester mishi cune ta den e cartera di hende, es decir cu su poder di compra pasobra ganando poco of hopi e entrada cu cada trahado ta ricibi ta destina pa mantene su calidad d bida. Sigur pa esunnan di entrada abao un corte di 12.6% ta demasiado y esaki ta afecta su poder di compra cu no ta bon”, el a expresa

E recorte salarial di 12.6% tin casi dos aña tumando luga y Sr. Dirksz ta subraya cu esaki tin un impacto grandi y cu pa e motibo ey mes e lucha ey mester continua. El a remarca cu nan ta consciente cu e problema di cortamento den gastonan di aparato gubernamental mester tuma luga, pero el a splica cu mester wak tur otro caminda pa corta prome y na final structuralmente mester wak pa baha e costo di personal sin mishi y sin haci daño na e trahado su poder di compra.