E retonan pa 2022 pa Parlamento di Aruba ta grandi. Presidente di Parlamento Edgard Vrolijk ta conta Bon dia Aruba cu tin reunionnan pendiente cu lo bay traha riba nan. Un reunion cu sigur lo traha riba dje asina cu aña habri ta e ombudsman.
Aruba ta e pais cu a keda atras den e parti aki y e ombudsman ta un ley cu ta hopi pidi. Lamentablemente tabatin un wega politico rond di e ombudsman pa Aruba , pero esaki ta pasa pa pasado debi cu asina aña habri un di e prome leynan cu lo keda trata ta e ombudsman.
Presidente di parlamento lo percura pa tur parlamentario haya e documentonan necesario mirando cu tur e amienda politico cu a keda entrega ta mustra hopi mahos. E ley di ombudsman ta un ley cu e personanan di DWZ y e profesional nan cu nos tin a traha riba dje. Sinembargo e ta duna un impresion mahos na momento cu tin weganan politico ta wordo haci pa trece cierto cambionan cu no ta cuadra.
Tambe Presidente di parlamento lo percura pa tur parlamentario haya e documentonan necesario y despues ta yama un comision central pa tur hende ta presente pa asina revisa e documentonan. Despues ta presenta e ley den continuacion di e reunion publico cu ya caba e ley a keda trata y despues lo bay over pa vota pa e ley y lo cuminsa cu e proceso dibiaha pa e presupuesto di e ombudsman, Asina Aruba lo por tin su ombudsman pa augustus 2022. Esaki ta e prioridad number uno di presidente di parlamento e aña aki.
E di dos prioridad ta pa tur proceso di ley cana su caminda y pa e reunionnan cu mester pone riba rol lo mester keda atendi. Tambe pa loke ta trata e edificio y entrada principal di parlamento tambe lo haya su atencion. E meta ta pa tur parlamentario por drenta parlamento cu su pasje , esaki ta un manera di siguridad mas eficiente y tur parti di mundo ya caba ta uza esaki mirando cu e ta hopi safe.
Lo haci un inversion di casi 40 mil florin pa proteccion di tur parlamentario y tambe tur trahado cu ta traha den parlamento. E sistema di swipe ta hopi mas eficiente y sigur pa tur hende cu ta traha den parlamento, esey ta e meta di presidente di parlamento pa cada un di nan ta traha den un luga sigur.
Tambe un di e metanan den 2022 ta e edificio parti di patras di parlamento . Presidente di parlamento Edgard Vrolijk tin un fondo aloca pa drecha e parti aki y pa mira si esaki lo ta un luga cu e ombudsman di Aruba lo por ubica su mes den e edificio parti patras di parlamento of lo e por bay pa un otro departamento cu parlamento tin mester.
Tambe hopi biaha a papia cu ta desea pa tur hende por drenta parlamento , pero e realidad ta cu un persona cu un rolstoel no lo por drenta parlamento pa wak e reunionnan publico, esaki no ta na su luga. Pesey mes presidente di parlamento a tuma e decision cu e ta desea pa tin un lift pa tur hende cu ta riba un rolstoel of cu tin problema pa subi trapi por subi e lift y por presencia e reunionnan den parlamento.
Tambe e reglament na orde ta un di e otro metanan cu presidente di parlamento kier logra den 2022 . Ta spera cu tur parlamentario ta suficiente madura pa e ley aki keda trata y por vota pe manera debe ser tambe. Loke ta di lamenta cu Aruba a keda pega den politica chapo, si mester mira Corsou ya caba nan ta mas delanta cu Aruba den tipo di leynan asina cu ta trata bienestar pa e pais y no bienestar di partido.
banda di tur esaki tambe presidente di parlamento tin un proyecto berde pa por scapa y trata di baha e coriente mas tanto cu ta posibel di parlamento. No ta un secreto cu parlamento ta gasta hopi coriente, sinembargo esaki mester tin un solucion y pesey mes ta trahando riba un proyecto berde pa por logra esaki. No ta un proyecto cu ta cla, pero e ta den su prome fase y ta spera cu por logra esaki den 2023.
Pa traha un ley ta tuma hopi tempo, presidente di parlamento Edgard Vrolijk mes ta trahando riba un ley hospitalario unda cu muchanan cu haya accident y of pa cualkier motibo cu nan no por participa na scol e mucha di un manera of otro mester por haya les y e no mag di keda sinta mas. Esaki ta un plataforma cu gobierno mester percura pe y pone cu e mucha no ta perde scol.
Na e momentonan aki ora un mucha kibra un pia of algo pasa cu ne, e mucha ta na cas y e ta cay atras y e lo keda sinta tambe, esaki sigur no ta algo positivo pa e mucha unda cu e ta perde un aña innecesariamente.
Presidente di parlamento mes lo traha riba e ley aki, pero no ta garantisa ki tempo lo e keda cla mirando e proceso y camindanan cu e mester cana prome cu yega parlamento pa e keda trata, pero si lo traha riba dje pa e ta un echo den 2023.
E producto parlamento mester mehora esaki ta un punto esencial pa presidente di parlamento. Tambe a traha riba un ley di codigo di conducta pa parlamento y esaki tambe ta cla. Asina aña habri lo presenta esaki na e parlamentarionan y e pueblo di Aruba pa asina na momento cu e keda trata ta keda na cada parlamentario aproba y si esey no ta e caso lo mester presenta un miho cu e proposicion cu nan lo bay ricibi.
E ley di conducta ta un ley facil, segun presidente di parlamento na momento cu kier mishi cu integridad y asuntonan cu tin di haber cu parlamento ningun hende no ta bay diacuerdo. Pesey mes a tuma e decision cu ta pone e cinco reglanan basico di parlamento pa tur parlamentario atende cu ne. Nos tur como hoben a haya reglanan na scol y si den parlamento nos no por atende cu regla e ora nos den parlamento ta den un problema serio.
