Mehoracion di procesonan di gobierno: Entrega y evaluacion di peticion pa inversion den presupuesto di pais Aruba

Pa mehoracion di e control financiero di pais Aruba, alocacion mas efectivo di e recursonan financiero y di personal limita, pa e maneho di gobierno logra e impacto premira, ta esencial. Den e cuadro aki ta importante cu gobierno continuamente ta mehora e procesonan y proceduranan pa e aplicacion y otorgamento di inversionnan den presupuesto di pais Aruba. Colaboracion entre e ministerionan ta crucial pa logra esaki.

Departamento di Asuntonan Economico, Comercio y Industria encarga cu e coordinacion di e proceso di planificacion nacional y priorisacion di e fondonan di inversion for di e presupuesto general di pais Aruba den nomber di Minister di Asuntonan Economico, Comunicacion y Desaroyo Sostenibel, y Departamento di Finansas encarga cu e conseho riba tereno financiero-economico y supervision di e finansas di gobierno den nomber di Minister di Finansas y Cultura, ta traha hunto na mehora e proceso di entrega y evaluacion di e peticion pa inversion den presupuesto di pais Aruba pa aña 2023, den cual criteria mas stricto pa entrega di peticion di inversion pa presupuesto 2023 (project dossier, logical framework, terms of reference) y criteria mas stricto pa evalua e peticionnan (relevancia, factibilidad y sostenibilidad) lo wordo aplica.

Minister di Asuntonan Economico, Comunicacion y Desaroyo Sostenibel, mr. Geoffrey Wever y Minister di Finansas y Cultura, mr. Xiomara Maduro a pidi Conseho di Minister pa aproba e proceso pa entrega y evaluacion di inversionnan den presupuesto di pais Aruba pa aña 2023, cual proceso Departamento di Asuntonan Economico, Comercio y Industria a desaroya pa Departamento di Finansas. Conseho di Minister a bai di acuerdo cu e proceso nobo aki.

Esaki ta un desaroyo hopi positivo y lo aporta na: un alocacion mas efectivo di e recursonan financiero y personal limita pa implementacion di inversion di gobierno; priorisacion di inversionnan di gobierno; preveni cu fondonan di gobierno no wordo utilisa door di falta di preparacion adecua; responsabilisacion di inversionnan di gobierno; sosten na maneho sectoral y monitoreo y evaluacion pa contabilidad (accountability) di departamentonan. E proceso nobo a wordo traha usando e principionan di World Bank pa crea efectividad den e preparacion, seleccion y monitoreo di inversionnan den presupuesto publico.

Pa aña gobierno ta aloca AWG 20.000.000 pa inversionnan den presupuesto. Di esaki AWG 4.000.000 ta wordo reparti bou di e ministerionan: cada ministerio ta ricibi AWG 500.000. E AWG 16.000.000 cu ta resta ta wordo reparti pa e diensten/directies segun e proceso menciona. Tipo di desaroyonan asina ta profesionalisa cada bes mas e aparato gubernamental, ta sostene maneho di gobierno pa logra impacto, ta importante pa “good governance” y ta aporta na uso responsabel di placa di pagadornan di belasting.