(NLTimes) – Autoridad Hulandes pa Consumidor y Mercado (ACM) a ordena Apple pa permiti applicacionnan acepta sistema di pago fuera di e App Store.

E regulador a bisa cu Apple ta impone “condicionnan cu no ta rasonabel” riba e proveedornan di aplicacion. “Si Apple no ahusta e condicionnan irasonabel aki dentro di dos luna, nan lo mester paga un boet periodico di 5 miyon euro pa siman te cu un maximo di 50 miyon euro,” ACM a skirbi den un declaracion. E regulador a acusa e compania di abusa nan “posicion dominante.”

ACM su decision y corte di districto correspondiente tabata oficialmente publica riba diabierna. E obhecion di ACM pa cu Apple Store su politica tabata rumor varios luna pasa, pero inmediatamente despues cu e regulador a publica su demanda, Apple a hiba e caso dilanti corte y a pidi pa e caso ser trata tras di porta. Un porcion di ACM su declaracion a keda redacta, pa orden di corte na Rotterdam.

E regulador a nota cu proveedornan di aplicacion ta paga 99 dollar anualmente pa usa e App Store, sea cu nan tin un negoshi grandi of chikito. Mas o menos 15% di nan ta ofrece servicionan paga den e aplicacion, incluyendo subscripcion. “Si un proveedor ta desea di ofrece otro servicionan di pago of subscripcion den nan aplicacion, Apple ta impone condicion adicional.”

Na Hulanda, mayoria di persona cu ta usa un dispositivo mobil ta usa sea un Iphone di Apple of un dispositivo cu ta traha cu Android. “Riba iPhone, aplicacionnan pa conoce persona online por ser ofreci solamente pa via di App Store, cual ta haci cu e proveedornan ta depende hopi di Apple. Proveedornan di e aplicacionnan aki e ora no tin mas opcion cu acepta Apple su condicionnan,” ACM a skirbi.

Negoshinan varios biaha a keha caba cu Apple ta tuma comision entre 15 pa 30% di e bentanan haci riba App Store. Adicionalmente, e ta blokia negoshinan cu ta acepta metodo di pago alternativo. “Den e contexto aki, e proveedornan di e aplicacion mester tin e habilidad di referi den nan aplicacion opcionnan di pago fuera di e aplicacion.

Match Group, e compania tras di Tinder, OkCupid y PlentyOfFish y Match.com tabata un di e companianan cu a keha tocante Apple su politica di App Store. Den varios ocasion nan a bisa cu Apple su reglanan ta haci dificil pa comunica directamente cu e consumidornan tocante pago y ofertanan.