Gobierno dia 20 di November 2018 a firma un acuerdo cu Hulanda caminda a bay di acuerdo pa baha gasto di empleadonan publico. Gobierno a traha riba un maneho for di e tempo ey y manera semper el a keda drumi den lachi y nada a wordo haci cune.

E documento aki a yega Parlamento te cu dia 25 di juli 2021. A cuminsa implementa parti di documento aki. Empleadonan publico cu pa via di malesa no por a haci nan trabao manera mester a entama nan caso y a gana nan caso dilanti hues.

Un otro fecha memorabel ta 13 di November 2020. Esaki ta e diabierna scur na unda Aruba su autonomia a wordo entrega. A firma e acuerdo di “coho” den cual tin e landspakket. Gobierno a keda bira y rek e asunto te cu gobierno a cay dia 30 di maart 2021. A bin eleccion y a forma un coalicion caminda cu e landspakket a keda riba mesa ni cuanto e gobierno di Aruba a purba na retrasa implementacion. E agenda y condicionnan Hulandes a keda keto bay riba mesa.

A pone empleadonan publico y cierto companianan estatal entrega 12.6% pa supuestamente yuda den fase y loonsubsidie. A sali na cla cu loonsubsidie y fase a wordo subsidia cu prestamo di Hulanda y cu tin nada menos cu 84 miyon a wordo paga di mas y awor kier busca moda pa recupera e suma aki. 84 miyon di mas!!!!! Increibel e cos aki. Awor kier sigui pusha pa empleadonan publico y cierto companianan estatal sigui entrega pero sin cu tin loonsubsidie ni fase mas. Locual cu a pone e cherry riba e bolo ta cu a emplea 152 den servicio di gobierno pero otronan mester sigui entrega. Esaki bo ta yama politica di patronahe, politica barata.

Nos hermana isla Curaçao tabata tin 4108 empleado publico y 608 empleadonan mester a bay cas. Nan a duna nan un bon oferta y hopi a acepta e oferta. Aki na Aruba ta sigui hinca hende den gobierno y esnan cu ta traha tin di sacrifica pa esnan cu no ta produci. Ni cu cuanto vut gobierno bin cune e gasto riba empleadonan publico no ta baha. Con gobierno kier pa Hulanda tuma nos gobierno na serio!!!!

Ta keha cu Hulanda ta forsa gobierno pa bypass nos Parlamento pa firma e protocol. Nos gobierno mes a bypass Parlamento den e caso di Eagle LNG Partners. Nada nobo. E parlamentario di raiz mester a pone pia abao cu si e contract no yega Parlamento e reunion lo no continua. No ta cuestion di benta gobierno abao sino di haya sa e contenido di e contract. No lubida mester a kita 3 director cu a nenga di firma y gobierno a pone su directornan cu si lo firma. Esaki ta e manera di actua di partidonan comunista. Awor mi ta tende cu e parlamentarionan lo no compronde e contract.

Acaso nan no por busca un experto pa a conseha nan. Nos di partido Curpa ta laga esaki na cada parlamentario pa saca su conclusion cu nan lo mira e contract aki manera pushi ta mira su cara den spiel. Kico lo ta di e directornan cu a firma e contract anto!!!!!!!! Acaso nan a firma bij het kruisje!!!!!!!