(AP) — Promocion di club di Premier League, Arsenal, di token di fanaticonan a viola regulacionnan di aviso y a keda prohibi na Reino Uni, pa saca bentaha di inexperiencia di consumidornan pa cu criptomoneda.

E team di London a bisa cu ‘fan tokens’ a ser usa pa curasha participacion y tabata diferente na criptomoneda, cual ta monedanan virtual usa como forma di pago.

E postnan riba Facebook y website tabata inclui video di hungadornan Ben White, Calum Chambers y Kieran Tierney.

Autoridad di Standard di Aviso (ASA) a bisa den un anuncio ayera cu e avisonan a saca bentaha di inexperiencia of credulidad di consumidornan y a trivialisa inversion den activonan cripto, a faya di ilustra e riesgo di e inversion, y no a laga cla cu e ‘token’ mediante e compania Socios tabata un activo cripto, cu por obtene solamente door di habri un cuenta y intercambia cu otro criptomoneda.

Cumpradornan di Token tambe ta haya placa a cambio door di intercambia e activonan digital na un prijs determina pa e suministro y demanda di mercado, y finalmente pa e prestacion y accionnan di e team, pues por fluctua significantemente. Doñonan por bende y intercambia nan Token usando Chiliz, un di e cantidad di criptomoneda basa riba tecnologia blockchain.

Socios ta lista casi 50 asociacion cu clubnan, incluyendo campeon di Premier League, Manchester City, Barcelona, Juventus y Paris Saint-Germain. E clubnan y Socios ta gaba e Token como un manera pa duna fanaticonan algo di bisa den toma di decision, pero hopi biaha esey ta reduci na votonan riba ki cantica pa toca prome cu un wega, na lugar di algo substancial.

Autoridad di Conducta Financiero Britanico ta categorisa e Token como activonan cripto, un inversion compleho y sofistica suheto na cambio di balor frecuente, y uno cu por conduci na perdidanan grandi.

E club a bisa cu a promove e Token responsablemente door di recorda fanaticonan cu nan tabatin mester di solamente un token pa vota riba decisionnan y cu nan mester cumpra solamente loke nan por afford. Tambe a urgi e cumpradornan pa busca conseho financiero independiente.

Trust di Sostenedornan di Arsenal anteriormente a expresa preocupacion pa e asociacion cu Socios.