Ayera atardi algun sindicatonan a bay te oficina di Vertegenwoordiging van Nederland in Aruba (VNO) pa asina haci entrega di un carta dirigi na secretario di Estado Raymond Knops pa nan haya clarificacion riba puntonan di preocupacion cu nan tin tocante recorte di salario di 12.6%.

Josephine Albertus presidente di Sindicato di Maestro (SIMAR) a expresa cu nan a tuma nota di Rijksministerraad na unda a keda conoci cu Aruba no lo haya sosten financiero na e momentonan aki door cu Aruba no ta cumpliendo cu cierto rekisitonan, segun loke el a sigura.

“Pa nos e ta hopi fastioso pasobra cu ora nos ta scucha di gobierno of ora nos a sinta cu gobierno ta wordo bisa cu nan ta sigui tur cos na pia la letra, pero ora cu bo tuma nota loke a sali for di Rijksministerraad no ta mesun cos”, Albertus a señala.

Pa e motibo aki, el a declara cu loke nan kier ta claridad pa via cu nan tin un veld y un responsabilidad ora nan miembronan ta puntra na sindicato pa nan por haya contesta y p’esey nan como un grupo di sindicato a dicidi di concilia un carta cu nan a mand’e tambe pa secretario di Estado Raymond Knops unda nan ta pidiendo claridad riba e situacion “pasobra cu nos tin 21 luna caba ta cumpli cu e 12.6% y e ora ey e ta hopi frustrante pa nos pa tende cu na otro banda no tin cumplimento di Gobierno di Aruba y esey ta e punto cu nos no sa tampoco mas kico ta verwacht nos y nos kier claridad pasobra nos tin cu sigui cana nos caminda y nos kier pa e inhusticia cu ta pasando akinan no por sigui asina aki”, el a indica.

Esey ta e rason di e conciliacion di nan carta na VNO, dia 20 di december Albertus a bisa cu el a manda un carta cu tabata indica “algun cosnan cu no tabata cuadra” y ayera mainta nan a tuma nota di un carta cu Knops a manda na Tweede Kamer, eynan tambe tin puntonan cu ta contradictorio segun el a sigura, na unda cu nan tin cu sinta cu gobierno di kico ta wordo bisa den e documentonan.

Nan a hiba nan preocupacionnan cerca VNO y duna e carta pa asina via nan por zorg pa e carta yega na Hulanda, manera Albertus a comenta.

Nan a tuma nota di e carta di Knops na unda el a sigura cu Aruba no ta cumpliendo cu e rekisitonan na unda el a bisa cu nan for di inicio cu Covid-19 a yega a crea un situacion unda tur hende tin cu cana hunto den dje “y p’esey nos mester ta transparente cu otro y no por ta cu ora bo sinta na mesa cu gobierno, nan ta bisa bo un cos y ora bo wak e cartanan y documentonan ta bisa otro cos”, el a enfatisa.

Ora nan tabata na mesa cu gobierno nan a pidi e carta na unda e medida aki a keda “tot nader order” pero segun Albertus nan no a haya esey ainda, “mester bisa nos ta tuma nos responsabilidad y den tur e cartanan cu bo ta wak tambe cu secretario di Estado Knops cu ta sali for di CAft, ni un caminda ta bisa cu pasobra sindicato a bin un caminda el a bin tot nader order p’esey nos mester ta honesto cu nos mes”.

Asina mes, aña pasa nan a entrega un otro carta na unda nan a haya contesta unda cu tabata indica cu gobierno a tuma nota y cu nan por a compronde e preocupacion cu sindicatonan tin y lo sigui cana te e camindanan cu tin unda Albertus a menciona cu for di esey tin diferente otro cosnan cu a bin dilanti como Landspakkete, “na e momento cu nos a skirbi e carta ey tabata comienso di 2020 ora cu nos a tene cu mester a cuminsa entrega y nos no a bay di acuerdo cu e manera con nos dunado di trabao, e gobierno a trata nos y nos por bisa hasta cu Raad van Advies a bisa mesun cos”.

Ayera mainta a wordo publica un carta di Knops cu el a manda na Tweede Kamer unda ta regarda cu conhuntamente cu Hulanda, Aruba a sinta na mesa y a hiba acuerdonan unda cu Aruba no ta cumpliendo cu acuerdonan unda el a sigura cu nan si ta bin cumpliendo durante 21 luna cu entrega di 12.6% “unda cu cada biaha bo ta tende di un banda cu mester tin pasenshi y di otro banda cu Aruba no ta cumpliendo cu cosnan cu nan mes a bay di acuerdo cune y esey pa nos ta hopi preocupante”, el a bisa.

Asina mes, Bon Dia Aruba a puntra si ora Aña Nobo lo cuminsa por espera algun welga nacional unda cu el a enfatisa cu dianan aki docentenan ta den temporada di vakantie y na momento cu ora nan lo bisa cu nan ta cla nan ta pidi nan sosten back, nan lo haci e yamada pa nan keda pendiente, nan tin cu hiba tur e informacion cu cada sindicato ta compilando pa lo bay back na nan miembro y e ora ey lo dicidi kico nan lo haci.

Den e carta cu nan a entrega ayera ocho sindicato so a firma unda cu Albertus a trece dilanti cu nan a pidi informacion di Hulanda pero nan ta keda na mesa cu otro “nos ta den union pero nan tin nan bestuur y no tur hende tampoco por ta presente durante entrega di carta pa medidanan di prevencion y ta p’esey cu nos cuater so ta akinan pa trece nos preocupacion y nos lo sinta cu otro tambe”.

Ademas, el a conta cu cada biaha cu nan ta sinta cu gobierno, e informacion cu nan ta haya y informacion cu ta sali den documentonan no ta cuadra y ta p’esey cu nan kier sa kico a wordo palabra y “p’esey nos a bin akinan cu un carta”, el a señala.

Bon Dia Aruba a puntra si esey ta nifica cu nan no tin confiansa den gobierno mas unda cu Albertus a contesta cu manera nan a pone den e carta cu e informacion cu nan ta hayando di gobierno ta buta cu “nos no tin confiansa den informacion cu nos ta hayando y p’esey nos ta manda e carta aki cerca secretario di Estado Knops pa e por duna nos claridad”, Albertus a finalisa.