(TheVerge) – Analisis forensico nobo ta indica cu representantenan di gobierno di Emiratonan Arabe Uni a instala e spyware Pegasus riba celular di Hanan Elatr, esposa di periodista asesina, Jamal Khashoggi, apenas algun luna prome cu asesinato di su esposo. Laboratorio di investigacion di privacidad y seguridad basa na Toronto, Citizen Lab a ehecuta e analisis den nomber di The Washington Post, cu a reporta e hallazgonan ayera.

Segun reporte di e corant, un investigacion forensico di dos celular Android propiedad di Elatr a revela cu un persona desconoci a usa un di e celularnan pa bishita un website cu a upload e spyware Pegasus riba e celular. Esaki a tuma lugar despues cu agentenan di seguridad na aeropuerto di Dubai a confisca e celular di Elatr. Mas analisis di Citizen Lab a sugeri cu e website tabata controla pa NSO Group den nomber di un cliente den Emiratonan Arabe Uni, segun e reporte ta declara.

NSO a nenga cu a usa su spyware contra Khashoggi of su asociadonan, incluyendo Hanan Elatr – pero analisis di Citizen Lab ta haci esey dificil pa kere. Numbernan di telefon perteneciendo na Elatr y na prometida Turco di Khashoggi, Hatice Cengiz, tambe a ser haya den un lista di 50mil number den un leak di data cu a revela potencial obhetivonan di spyware Pegasus, maske esaki riba su mes no ta confirma cu e number en cuestion tabata comprometi. E leak aki tabata parti di un investigacion mas amplio di un coalicion di noticieronan rond mundo. E investigacion, yama The Pegasus Project, a expone enfoke amplio riba periodista, activista y politiconan, hasta incluyendo hefenan di estado.

E lista tabata contene numbernan perteneciendo na centenares di oficialnan di gobierno, y un total di 180 periodista di noticieronan incluyendo CNN, The New York Times, Bloomberg, Le Monde, y El Pais tambe tabata inclui. Un number perteneciendo na presidente Frances, Emmanuel Macron tabata entre e numbernan riba e lista, hunto cu otro perteneciendo na presidente Sur Africano, Cyril Ramaphosa, y prome minister Pakistani, Imran Khan.

E sofisticacion tecnico profundo di vigilancia desaroya pa NSO Group recientemente a keda revela den un blog post di Project Zero, un grupo di investigacion di seguridad di Google. E post a duna detayenan di un explotacion ‘zero-clicl’ pa iMessage, den cual por compromete celular di un obhetivo door di simplemente manda nan un mensahe SMS conteniendo un link, sin necesidad pa e obhetivo habri of lesa e mensahe.

Como un compania di spyware, operacionnan di NSO Group pa largo ta oculta den secresia. Pero mirando e cantidad abrumante di evidencia di disponibilidad di e compania pa duna asistencia na regimennan autoritario y represivo rond mundo – incluyendo vigilancia di oficialnan Mericano den algun caso – gobierno Mericano a cuminsa tuma accion contra e compania Israeli. Recientemente a pone NSO Group riba un black list di Departamento Mericano di Comercio, preveniendo companianan Mericano di provee NSO Group cu bienes of servicio.

Algun a haci yamado pa mas accion di e administracion den bista di e menasa representa pa e aumento di industria di spyware: un grupo di legislador a pidi imposicion di sancionnan mas estricto riba NSO Group y otro compania di spyware, cu lo freeze cuentanan di banco y prohibi empleadonan di biaha na Merca.

“Afortunadamente, mayoria di periodista historicamente no mester a preocupa pa atakenan of vigilancia di enemigonan na nivel estatal”, segun Parker Higgins, director di defensa na Freedom of the Press Foundation. “Organisacionnan manera NSO Group ta menasa di trece e nivel di peliger aki na un cantidad mas amplio di fuente y reporteronan.”