(EFE) – Alcalde di 12 ciudad Colombiano, entre nan esun di Bogota, Cucuta y Pasto, a firma un manifiesto na unda nan ta rechasa xenofobia y ta apoya integracion di migrantenan Venezolano pa nan por contribui na economia di e pais.
E iniciativa a haya impulso di Agencia di Nacionnan Uni pa Refugiado (Acnur) a traves di su campaña “Nos ta Pana Colombia” y Asociacion Colombiano di Ciudadnan Capital (Asocapitales).
Acnur a informa cu te momentonan aki e documento a haya respaldo di e mandatarionan di Bogota, Bucaramanga, Montería, Pereira, Popayán, Cúcuta, Arauca, Armenia, Florencia, Mocoa, Pasto y Sincelejo.
“E firma di e manifiesto aki ta un señal importante pa integracion di personanan refugiado y migrantenan den e sociedad Colombiano”, representante adhunto di Acnur na Colombia, Elizabeth Eyster a informa.
E funcionario a agrega cu ciudadnan capital “sin duda por hunga un rol fundamental pa habri camindanan pa cu nan por aporta cultural, social y economicamente”.
El a resalta cu e firma di e documento varios alcalde ta manifesta nan compromiso pa rechasa cualkier discriminacion y fortalece camindanan di inclusion y esey lo nifica proteccion y bienestar tanto pa personanan Venezolano como pa comunidadnan Colombiano cu a ricibi nan.
Di su parti, alcalde a bisa cu nan ta compronde e situacion cu e pais ta bibando pa diferente factor, entre nan pandemia di coronavirus.
“Nos ta compronde e situacion cu nos ta bibando, cu no ta facil, cu tanto Colombianonan como refugiado y migrantenan, nos ta sufri e realidad duro di desempleo, angustia pa acceso di salud, educacion, urgencia pa cumpli cu necesidadnan basico”, nan a expresa.
Despues nan ta continua sigura cu nan “ta consciente cu tambe trahando hunto, man cu man y cu fin di protege derechonan di tur”, nan lo “sali pa dilanti”.
