Partido MEP: Un curso ta na su luga pa siña oposicion kico ta ‘corporate governance code’

Partido MEP a tuma nota di comportacion di oposicion den Parlamento durante e reunionnan pa trata Eagle LNG y WEB. Ta parce berdad, manera cu Prome Minister a expresa, cu oposicion no ta compronde e diferencia entre compania priva y compania estatal. Esaki ta obvio pa motibo cu na diferente ocasion nan a coba den companianan estatal manera cu ta compania priva.

Pais Aruba y pueblo di Aruba a stipula cu door cu e compania WEB ta di pueblo, un Minister no ta hinca man y mete den dje, esey ta ley. Contrario na locual cu oposicion a haci den Utilities, RDA, WEB y Elmar, cual no por hustifica.

E orguyo di AVP no. 29 Benny Sevinger a bay mas leu y kere cu departamentonan di Gobierno ta di dje y cu terenonan tambe ta di dje consecuentemente a mete den esaki. E actonan aki di parti su persona ta ilustra cu e no ta compronde kico ta e diferencia entre compania estatal y compania priva. Talbes un curso ta na su luga, pa oposicion siña kico ta ‘Corporate Governance Code’ di berdad.

Por a tuma nota cu Sevinger a cuestiona Prome Minister su integridad den Parlamento a pesar cu Prome Minister a sa di splica cu e no a uza servicionan di oficina di su tata. Locual Parlamentario Sevinger a referi na dje ta un machteging di 2018 cual tabata un machtiging di e aandeelhouder, esun cu ta representa e aandeelhouder na Utilities pa asina nan por a haci locual cu nan mester a haci. Esaki ta algo cu a sosode 1 biaha y algo cu AVP a haci hopi biaha cu abogado Sjiem Fat.

Ta basta iresponsabel di parti di AVP cu net Sevinger cu no ta compronde kico e ta papia, ta e nan ta manda bin cuestiona integridad di Lider di Partido MEP. Ademas ta duda cu a otro huristanan cu ta riba e lista di AVP lo por para cu un cara street anto ripiti locual cu el a papia.

Banda di esaki Sevinger na diferente momento a acusa y gaña riba nos Prome Minister cu lo tin compania. Cu firmesa nos Prome Minister a reta e Parlamentario pa bisa esaki pafo di Parlamento pa asina por hib’e corte pa ta mentiroso. Lo no ta e prome biaha, pasobra na numeroso ocasion Prome Minster Wever – Croes a gana Parlamentario Sevinger, pa ta mentiroso.

Partido MEP ta orguyoso di nos Prome Minister y ta gradicie cu a pesar tin reto y sacrificionan grandi cu ta bin cu e funcion aki, nos prome Minister ta eherce orguyosamente su funcion y ta comprometi na esaki a base di e amor cu tin pa Pais Aruba.