(TheVerge) – Un reportahe preocupante di e Wall Street Journal ta investiga e experiencianan personal di muchanan muhe kende a cay den ‘rabbit hole’nan di retonan extremo pa baha peso, tecnica pa ‘purge’, y dietanan mortal a traves di TikTok, contribuyendo na e desaroyo di desordennan alimentario, of empeorando esnan existente.
WSJ a haci su propio experimento pa mira con algoritmo di TikTok potencialmente por promove e tipo di contenido dañino aki – su hallazgonan por splica e decision repentino di TikTok pa altera e manera di opera di su sistema di recomendacion di video.
Manera ta detaya den e reporte, WSJ a crea mas di 100 cuenta ‘cu tabata usa e app cu tiki intervencion humano’, di cual dos tabata botnan registra na mucha di 13 aña di edad cu tabata pasa tempo mirando videonan rond di perdida di peso, alcohol y wega di placa. Un grafico inclui den e reporte ta mustra cu asina un di e bot abruptamente tabata stop di mira un video relaciona cu wega di placa y cuminsa pasa tempo riba video tocante baha peso, algoritmo di TikTok a ahusta su mes; rapidamente a aumenta e cantidad di video di perdida di peso cu e bot a mira pa tene cuenta cu e cambio di comportamento.
Na final di su experimento, WSJ a haya cu di e 255mil video cu e botnan a mira en total, 32.700 di nan tabata contene un descripcion di metadata cu tabata match un lista di centenares di palabra clave relaciona cu perdida di peso. 11,615 video tabatin descripcion den texto cu ta match palabra clave relevante pa desorden alimentario, mientras 4,402 tabatin un combinacion di palabra clave cu ta indica e normalisacion di desorden alimentario.
Un cantidad di e videonan aki segun e reporte tabata usa diferente ortografia pa palabranan clave relaciona cu desorden alimentario pa evadi deteccion di TikTok. Despues cu WSJ a alerta e plataforma na un muestra di 2,960 video relaciona cu desorden alimentario, a elimina 1,778 – WSJ ta bisa cu no ta cla si TikTok a elimina nan, of e creadornan mes a hacie.
Apenas un dia prome cu publicacion di e reporte di WSJ, TikTok a anuncia cu ta trahando riba formanan nobo pa stop e ‘rabbit hole’nan peligroso aki di forma. E cambio aki tambe a sucede apenas algun dia despues cu WSJ a tuma contacto cu TikTok pa un comentario riba e storia cu nan tabata bay publica, pues ta posible cu TikTok preventivamente a lansa e actualisacion prome cu publicacion di e reporte.
Den su post, TikTok ta reconoce cu no semper ta saludable pa mira cierto tipo di contenido un y otro biaha, incluyendo videonan relaciona na dieta extremo y fitness. Awo ta trahando riba un manera pa reconoce si su sistema di recomendacion, no intencionalmente, ta recomendando videonan cu talbes no ta viola politica di TikTok, pero por ta dañino si consumie excesivamente.
E plataforma tambe ta bisa cu ta bezig ta test un herment cu lo permiti usuarionan stop videonan conteniendo cierto palabra of hashtag di aparece riba nan pagina For You. “Mientras e experimento aki no ta refleha e experiencia di mayoria di persona riba TikTok, hasta un solo persona sufriendo e experiencia ey ta uno di mas”, segun vocero di TikTok, Jamie Favazza, a bisa den un declaracion na The Verge. “Nos ta permiti contenido educacional of orienta riba recuperacion pasobra nos ta compronde cu e por yuda hende mira cu tin speransa, pero contenido cu ta promove, normalisa of glorifica desorden alimentario ta prohibi.” E vocero tambe a destaca cu TikTok ta duna acceso na e National Eating Disorder Association Hotline dentro di e pap.
Si e situacion ta zona familiar, ta pasobra Instagram ya a pasa den esaki (y ainda ta lidiando cune). Despues cu whistleblower Francis Haugen a leak e Facebook Papers, un coleccion revelador di documentonan interno di Facebook, Instagram a traha rapidamente pa tapa e buraconan den nan barco cu ta sink.
E documentonan ta mustra cu Facebook a haci su propio investigacion riba impacto di Instagram riba adolescentenan, y a haya cu e app por causa desaster riba salud mental di adolescentenan, y tambe a empeora imagen di muchanan muhe pa cu nan curpa. Alrededor di un luna despues, Instagram a anuncia su plannan pa introduci un herment cu ta bay ‘nudge’ e adolescentenan leu di mira contenido potencialmente dañino. Tambe a lansa e caracteristica ‘take a break’, cu ta urgi usuarionan pa cera e app si nan a pasa cierto tempo riba e plataforma, variando entre 10, 20 of 30 minuut.
