Segun Parlamentario drs. Mervin Wyatt-Ras e contract cu Eagle LNG ta spoorloos.

Den e Reunion Publico encuanto di e contract cu a firma cu Eagle LNG a bin padilanti cu dicho contract a ser firma sin cu partners den coalicion ni Parlamento a ser informa. Segun Wyatt-Ras ta na su lugar con Sr. Kamperveen den su funcion como vice-presidente di Parlamento a yama un reunion pa trata e asunto.

Esaki despues cu e Presidente di Parlamento Vrolijk na un forma ilegal a core yama un Bijeenkomst cu un caracter informativo pa evita un Reunion Publico, mientras e no tabata ni na Aruba. E miembro di Parlamento di fraccion di Raiz, vice-presidente Kamperveen, a trece su punto di bista padilanti den prensa. Partido Raiz tambe a saca un comunicado di prensa. Den e comunicado ta menciona cu e contract a ser firma cu Eagle LNG sin cu miembronan di coalicion ta na haltura. Tampoco no a consulta den Ministerraad. Partido Raiz ta exigi den e comunicado pa pospone firmamento di e contracto y bin cu un investigacion.

Durante e reunion Publico cu a dura 2 dia, casi tur parlamentario a pidi pa e famoso contract ser entrega na Parlamento, sinembargo esaki a resulta di ta SPOORLOOS. E contract no a ser otorga na Parlamento. Ademas segun minister Glenbert Croes, encarga cu labor, y Evelyn Wever-Croes, encarga cu utilidad, nan mes no a lesa e contract. Con por ta posibel cu 2 minister ta mara Aruba pa 20 aña pa un suma cuantioso sin lesa e contract?

Den e mocion cu Sr. Kamperveen a presenta, co-firma dor di miembronan di fraccion di MEP, e ta pidi pa haya e contract y e ta haci un peticion na gobierno pa envolvi Staten den decisionnan cu ta encera obligacionnan “ingrijpend y landurig”. Aki e y fraccion di MEP ta duna nan gobierno un “brevet van onvermogen”.

Hacimento di cos scondi y bisa cu “mi no sa di nada” ta algo normal pa e minister presidente y e gobierno aki. Ya caba ora a firma landspaketten cu Hulanda na 2020, e ministro presidente no a consulta cu stakeholders. Mescos a sosode cu cortamento di 12.6% den salario di ambtenaren cu no a consulta cu nan. Den campaña, gobierno a priminti cu FASE lo bira TIO cu un suma mas halto pa yuda ciudadanonan, sinembargo esaki tabata otro engaño di e gobierno aki. No a bin ni TIO ni TIA ni FASE, sino zero FASE y nulo yudansa. Ta p’esey empleadonan publico cu a coopera anteriormente awor no ta acepta mas y kier nan pago manera promer cu COVID.

Pero manera semper ora cos ta cayente e ministro presidente ta bula pipa. Paso ora cu minister Glenbert Croes tabata na e ceremonia di firmamento e promer minister tabata cu vakantie. El a laga e minister di labor cu e batata cayente. Pero e no tin cu worry paso ta su cuña el a nombra na cabes di WEB NV pa tur cos bay manera e kier y cu e por ta bon informa di tur cos.

No ta nada straño cu esnan di MEP ta intransparente y no ta duna informacion na niun hende paso nan sa toch cu nan soldatnan den Parlamento lo sostene tur loke nan haci. Den e caso aki Sr. Kamperveen cu a sali critico pa haya informacion no a haya esaki pero en cambio a ser silencia.

Locual Wyatt-Ras como ex-presidente di Parlamento ta haya mas peor ta cu e actual presidente di Parlamento ta usa reunion di caracter informativo, manera un Bijeenkomst, pa trata asuntonan cu mester bin den Reunion Publico. Den un Bijeenkomst tin presentacion pa despues haci preguntanan al caso sin mucho introduccion ni tiramento di palabra. Sinembargo e presidente aki cu no sa su trabou ta laga Parlamentarionan, specialmente di su fraccion y ministernan di su partido, haci politikeria durante Bijeenkomsten, dor di cual invitadonan hasta por sinti nan mes incomodo. Na final e ta culpa oposicion. Dor di su actitud e ta haci cu instancianan respeta no ta haya gana mas di bin Parlamento pa duna splicacion. Ademas poco poco ta mina e autoridad di Parlamento dor di haci kico gobierno dicta y ta p’esey mes Hulanda no tin ningun respet pa e gobierno aki. Ta p’esey mes ta bin cu landspaketten paso Hulanda ta mira e falta di seriedad, nepotismo cu faboritismo di amigo y famia cu intransparencia cu ta bay hunto cu corupcion.

Ta iresponsabel con gobierno ta compromete nos pueblo pa 20 aña sin ningun garantia, paso no por bisa cuanto prijs di gas lo ta den futuro. E hecho cu desde diabierna no lo tin subsidio mas na Merca pa exportacion di gas siguramente lo haci cu e prijs di gas lo por bira mas caro . Esaki mientras por a compronde cu 70% di e prijs di gas so lo ta fixed. Esaki kiermen cu e prijs di awa y coriente lo no baha lihe dor di e hazaña desastroso aki.

Durante reunionnan na Glasgow encuanto “global warming” a palabra cu pa aña 2030 lo disminui uso di fossiel fuels y na 2040 lo no tin mas y lo mester paga “fees” si ta haci uso di energia fossiel. Na mesun momento y contrario na loke mundialmente ta ser acorda, Aruba ta cera contract te cu 2042 di fuel fossiel. Esaki mientras gobierno ta pretende di ta pro naturalesa y hasta tin minister encarga cu e cartera Naturalesa.

Segun por tuma nota di literatura gas ta pega candela mas liher y por explota. En bista cu lo core pipa di gas di San Nicolas pa Barcadera, pasando den barionan di pariba manera San Nicolas, Zeewijk, Noord Cura Cura Cabai, Savaneta, Pos Chiquito pa Barcadera ta na su lugar pa envolvi nos pueblo den esaki. Tempo cu gobierno kier a coloca molinanan di biento na Urirama e prome minister actual tabata contra. Awor cu tubonan lo pasa den e barionan banda di viviendanan y cura di casnan, cu e peliger di explosion y candela, awor si e ta pro. Mescos cu molinanan di biento na Vaderpiet tabata posibel, pasa tubonan den bario pariba di nos isla tambe ta posibel pa e gobierno aki y e parlamentarionan cu ta sosten’e. Ya pueblo di Aruba sa cuant’or tin cu e coalicion aki.

Sin cu Raiz ni Mep a ricibi e contract, a dobla rabo. Fraccion di AVP a presenta dos mocion. E prome ta un mocion di desconfiansa den e prome minister e otro ta regarda desaprobacion di e LNG deal y pa gobierno disolve e deal aki.