(AP) — Defensa di Ghislaine Maxwell a yama otro ex-pareha romantico di Jeffrey Epstein pa testigua ayera: un ex-Miss Suecia, dokter na New York y conocido di tabloidenan, kende a bisa e hurado cu e tabata confia e magnate cu su yiunan muhe jong, y a nenga di a participa den un encuentro sexual en grupo cu un acusador clave.
Eva Andersson-Dubin, di 60 aña di edad, a testigua cu e tabata involucra romanticamente cu Epstein ‘off and on’ for di 1983 te inicio di añanan 1990, prome cu e tabata cu Maxwell. Maxwell, di 59 aña di edad, a declara inocencia pa acusacionnan di traficacion sexual resultando di su interaccionnan cu cuatro hoben adolescente entre 1994 y 2004.
Durante e tempo aki, Maxwell tabata romanticamente involucra cu y despues a traha pa Epstein, kende a tuma su propio bida na un prison federal na augustus 2019 mientras tabata warda su propio huicio pa trafiacion sexual.
Epstein y Andersson-Dubin a mantene nan amistad despues di rompe nan relacion, y na 1994, el a casa cu otro financiero rico, Glenn Dubin, cu ken el a haya tres yiu.
Un di e acusadornan clave den huicio di Maxwell, identifica den corte solamente como ‘Jane’ pa protege su identidad, a testigua cu un muhe yama ‘Eva’ a participa den un experiencia sexual den grupo cu Epstein. Ayera, un abogado di Maxwell a puntra Andersson-Dubin di el a yega di tin un encuentro sexual en grupo cu Jane. “Absolutamente no”, el a contesta. Contestando si el a yega di ta den un masashi sexual en grupo di Epstein cu Jane, el a contesta cu no.
Despues, Andersson-Dubin a reconoce cu tin problema cu su memoria, durante examinacion contrario. “Ta hopi dificil pa mi corda cualkier cos di asina hopi tempo atras”, Andersson-Dubin a bisa. “Mi famia ta ripara, ami ta ripara. E ta un problema.”
Famia Dubin a nenga di sa nada tocante e mal conducta sexual di Epstein, pero tabata sostene Epstein publicamente na momento di su acusacion inicial y condena pa crimennan sexual na Florida na 2008. Otro acusador di Epstein, kende su acusacionnan no ta parti di huicio di Maxwell, Virginia Roberts Giuffre, a bisa cu a trafica su persona na Glenn Dubin, entre otro homber poderoso, tur di nan a rechasa su acusacionnan.
Andersson-Dubin a declara cu mientras su yiunan tabata crece – incluyendo dos yiu muhe – algun biaha nan tabata bay hunto cu nan mayornan den vuelonan cu Epstein. El a testigua cu Epstein tabata stima su yiunan y e yiunan tabata consider’e un omo, yamando e ‘Omo F’, un aparente abreviacion di su nomber sin e J.
Contestando pregunta di un abogado di defensa si el a mira cualkier conducta inapropia entre Epstein y muchanan muhe adolescente, el a contesta cu no.
E testimonio a yega riba e segundo dia di presentacion di defensa di Maxwell, cual por keda completa awe mes.
Hues Alison J. Nathan a bisa cu argumentonan di clausura mester sucede dialuna y e hurado por ricibi e caso pa fin di dia pa cuminsa nan deliberacion.
No ta spera cu Maxwell ta bay testigua, maske su abogadonan a ofrece un defensa emocional, pintando e como un scapegoat ataca pa gobierno pasobra fiscal no por a trece Epstein na husticia mas. Durante e tres siman di e huicio, Maxwell ta parce activo den su defensa, frecuentemente pasando notanan na su abogadonan y brasando nan mientras e ta drenta y sali di corte cada dia.
