Ayera den oranan di atardi, Gobierno di Aruba a firma un Memorandum of Understanding (MoU) entre Respaldo, FMAA, SPD, HAVA y FADA pa asina e cuido por ta mas accesibel y por tin mas calidad, segun minister Rocco Tjon a sigura.
Minister di Husticia y Asuntonan Social, Rocco Tjon a expresa cu nan a firma un samewerking protocol cu e instancianan aki. El a considera e momento uno importante cu no por a wordo concretisa sin cu e instancianan aki duna di nan banda, na unda area di cuido lo ta mas accesibel cu calidad pa esunnan cu tin mester di dje.
E colaboracion aki ta bay nifica – segun minister Tjon a expresa – cu por bay haci mas pero cu menos recurso, ta bay tin un balor agrega na e cuido cu nan ta bay brinda. Den e protocol ta hancra cu a traves di e modelo piramidal ta bay percura pa e cuido ta mas accesibel. Nan a identifica e diferente necesidadnan, por ehemplo, mas specialistanan pa e areanan aki cu conhuntamente cu e partnernan, por sigura pa e persona cu tin mester di cuido por hay’e di un manera mas lihe.
Un parti importante, manera minister Tjon a expresa, ta e palabracionnan cu a haci pa futuro, caminda e departamentonan lo keda reuni cu otro pa asina percura cu e calidad di cuido cu ta brinda por sigui mehora y pa tin un miho coordinacion pa e trabao.
“Nos ta bay evita cu un persona ta wordo manda kisas na un instancia robes, pasobra e lo por a haya e cuido ey na otro instancia. Pero na mesun momento tambe ta bay percura pa bo por haci mas cu menos recurso”, Tjon a comenta.
Igualmente, el a firma cu FADA tin un parti importante den area di prevencion y den e parti di crea conscientisacion. “Ta hopi importante pa nos cuminsa kita e taboo pa e parti di adicion y e parti di salud mental”, el a bisa.
Ademas, el a señala cu ta importante pa crea un departamento di psikiatria cu lo duna un balor agrega na Aruba.
Di su parti, Dhr. Juendel Sprok di Fundacion Anti Droga Aruba (FADA) a splica cu esaki ta un acuerdo mutuo cu ta beneficia e comunidad di Aruba. FADA, cu ta den e parti di prevencion, segun el a menciona ta contento pa motibo cu por fin nan a yega na un compromiso unda cu por haci mas den parti di prevencion. Nan mester di mas fondo pa nan haci esey y pa nan por yega mas cerca di e comunidad, unda cu e parti di salud mental ta hopi importante. Y hunto cu otro partnernan nan lo por bin cu un campaña pa e parti di adiccion y salud mental.
Dr. Jillian Jones di Huisartsenvereniging Aruba (HAVA) a trece dilanti cu nan ta contento di forma parti di esaki; pa loke ta trata salud mental, cu tabatin algun luna caba den preparacion. Pero cu aworaki nan a logra di firma, e ta kere cu ta e inicio pa nan cuminsa cana of pa nan sigui cana den direccion na unda cu tur kier wak salud mental progresa na Aruba.
Ademas, Dhr. Randall van Trigt di Fundacion Pa Maneho di Adiccion (FMMA) a conta cu e paso aki ta sumamente importante, no solamente pa e cooperacion di tur e partnernan, pero tambe pa e incorporacion di adiccion den salud mental. Adiccion ta reconoci caba internacionalmente den salud mental y pa nan esaki ta un prome paso pa Aruba hopi importante, unda cu esaki ta e prome bloki cu ta wordo poni pa e cambionan di FMMA. “Pa e futuro unda cu FMMA ta bay pasa den un cambio grandi cu lo wordo reorganisa caminda nan por usa e recursonan hunto cu otro cu e situacion cu Aruba ta aden awor”, Van Trigt a expresa.
Mevr. Dalgis Montalvo di Sociale Psychiatrie Dienst (SPD) a trece dilanti cu esaki no ta solamente un firmamento di un papel, sino tambe ta bay trece esaki den e veld y na final esunnan cu ta wordo beneficia ta e comunidad mes. “Pa nos, ta duna nos e energia atrobe pa nos sigui cu e trabao cu nos ta bezig ta eherce y pa mehora esaki tambe”, Montalvo a señala.
Dr. Hendrikus van Gaalen di Respaldo a declara cu esaki ta tuma hopi trabao na unda cu tur cos a bira mas dificil ainda cu pandemia di coronavirus pero cu nan por haci’e.
Pa finalisa, minister Tjon a sigura na nan cu e mesun compromiso cu nan tin for di e ministerio pa percura cu esaki lo bira un realidad e mesun compromiso ey nan como partnernan por sigui espera tambe den añanan dilanti.
