Dia 27 di december, Fundacion Mi Cutisa ta lansa oficialmente e documentario titula ‘Dande di Aruba: Un Tradicion Tipico di Aña Nobo’. Durante un rueda di prensa, Sr. Alexis Tromp y Sr. Arthur Kelly a elabora mas ariba e documentario y con e proceso tabata pa logra esaki.

E meta di e documentario aki ta pa documenta e tradicion di Dande na Aruba y particularmente trece dilanti kico ta e diferencia entre e Dande di Tambu y e asina yama Dande di Fio.

E documentario ta trece dilanti varios cantado di Dande y nan historia relaciona cu e tradicion di Dande.

Sr. Alexis Tromp, miembro di e ekipo di produccion, a splica cu e idea pa e documentario a nace for di e documentarista Cindy Kerseborn. Na 2016 Kerseborn tabatin un presentacion na Biblioteca Nacional di Aruba, unda el a presenta su documentarionan, y momento cu e tabata na Aruba e kier a haci un documentario di Aruba, pero e no tabata sa di ki tema pa hacie. Kerseborn a tuma contacto cu Ruby Eckmeyer, cu tabata traha na Universidad di Aruba den e parti di investigacion; hunto cu un grupo nan tabata haci investigacion di Dande y asina Kerseborn, hunto cu Eckmeyer y Fundacion Mi Cutisa a dicidi di realisa e documentario Dande di Aruba.

Tromp a conta cu e documentario no tabata facil pa trahe pasobra tabatin hopi obstaculo. Obstaculonan di tempo, obstaculonan di fondo y e personahenan den e documentario tambe, hopi di nan ta di edadnan halto, cu tabata trece cune e riesgo cu nan lo por fayece mientras nan ta filmando e documentario. El a splica cu e ultimo punto e ta menciona pasobra na momento cu nan tabata filmando e documentario, nan mester a warda henter un aña pa december yega, pa por sigui cu e filmacion.

“Nos tur ‘kinan na Aruba sa cu e emocion bo ta sintie solamente na cuminsamento di aña. Kiermen nos mester a warda 2017 caba, ora nos a caba cu fase 1, warda full un aña pa nos bin back y filma fase 2 na 2018. Na 2017 e prome fase di e documentario a wordo filma, e la bay sin ningun problema y despues na 2018 fase 2 a wordo filma.”

Pero pa sorpresanan di bida despues di 2018, lamentablemente e directora Cindy Kerseborn a fayece y esey, Tromp ta splica, tabata un otro obstaculo pa e documentario. Pero prome cu Cindy Kerseborn a fayece el a laga su storyline atras y su colega Sherman de Jesus a tuma e proyecto over y asina Fundacion Mi Cutisa a logra finalisa e documentario aki.

“E documentario aki ta hopi interesante pa motibo cu ta bin cierto confrontacionnan aden, ta bin un choke di generacionnan, tambe parti di machismo ta bin pa dilanti y tambe ta bin rebeldia di sernan femenino. Hasta ta bin discriminacion padilanti, cosnan cu ami no tabata sa cu tabata pasa e tempo ey na Aruba”, el a agrega.

Sr. Arthur Kelly tambe a forma parti di e documentario y e ta conta cu na 2016 el a wordo contacta pa Fundacion Mi Cutisa hunto cu Cindy Kerseborn pa e tuma e rol pa documenta e parti di informacion, dus entrevista e personanan y saca informacion. “Berdad manera Alexis a menciona dos december sigui, desde dia 26 te cu habrimento di aña nos a traha duro tur dia, di mainta te anochi, pa documenta con nos ta celebra fin di aña y bishitando un cantidad grandi di personahenan den comunidad pa nos bay en buskeda di unda nos Dande realmente ta bini y ken a cuminsa cune”, el a bisa.

El a sigui splica cu durante e filmacion el a combersa cu hopi persona y a haya hopi informacion pa e documentario y e ta señala cu nan ta hopi contento cu despues di tanto obstaculo, bareranan cu a bin den caminda, nan a logra keda cla cu e documentario, cu lo ta uno cu hopi informacion y historia di e tradicion di Dande di Aruba.

“Nos ta bay haya un documentario rico den informacion cu mi ta kere hopi hende na Aruba lo keda asombra. Pasobra ami mes den e rol di entrevistador, durante e experiencia aki mi a siña conoce asina hopi cos nobo, cu mi ta bisa ta asina bunita pa saca afo con rico e pais aki ta cu e cultura di Dande, unda cu nos ta practicamente unico na mundo cunele”, Kelly a indica.

El a menciona tambe cu e documentario aki lo wordo estrena dia 27 di december na The Movies Principal na San Nicolas. Y el a splica cu un di e motibonan pakico Fundacion Mi Cutisa scoge un localidad na San Nicolas specificamente ta pasobra durante e proceso di filmacion a sali na reluci cu un di e prome cantantenan di dande na Aruba tabata di San Nicolas.

Sra. Bertha Wolff-Croes, representante di Fundacion Mi Cutisa tambe tabata presente y el menciona tambe cu durante dos aña un studiante di Universidad di Aruba hunto cu Sr. Nelson Thiel di Archivo Nacional di Aruba, a traha un mapa di tur e hendenan cu tabata canta dande na Aruba. El a splica cu pa por a yega asina leu nan mester a acumula informacion di tur e cantantenan di dande cu informacion completo pa nan por a aparece den e mapa y den tur e districtonan di Aruba. El a informa cu si ainda tin persona cu conoce algun cantante di dande y no a entrega nomber, por haci esaki ainda na Sr. Nelson Thiel na Archivo NacionalAruba of na Fundacion Mi Cutisa.

El a gradici tambe tur persona envolvi y tur sponsor cu a apoya e fundacion pa realisa e gran proyecto aki. “Pa yega asina leu, pa nos logra un documentario asina interesante, asina importante e tin hopi trabao, hopi persona envolvi, hopi sacrificio y tambe hopi necesidad di fondo. Awe nos kier a gradici na nomber di Fundacion Mi Cutisa, Prins Bernard Cultuur Fonds, Aruba Investment Bank, Aruba Bank, Unoca, Gobierno di Aruba y tambe demas sponsornan cu a duna nan sosten na e proyecto grandi aki. E ta un regalo pa Aruba, e ta un regalo pa comunidad”, el a agrega.