For di algun dia pasa, manifestacion di sindicatonan ta tumando luga pa exigi nan derecho, manera nan ta sigura. Nan ta solicita gobierno eliminacion di e retencion di 12.6% di nan salario, cu na prome instante tabata dirigi pa e programa di ayudo FASE y Subsidio di Salario.

Ayera mainta 7or y mey na Parke Boy Ecury un biaha mas e lidernan sindical hunto cu nan miembronan y otro organisacionnan a reuni pa mustra nan mal contento. Y despues di algun deliberacion cu esnan presente, nan a dicidi di cana te Bestuurskantoor pa di e forma ey gobierno tuma nota cu nan ta sigui cu nan lucha.

Magaly Brito di sindicato SEPPA ayera mientras nan tabata para dilanti di Bestuurskantoor a expresa cu nan lo keda insisti pa eliminacion di 12.6%. Pa ayera e exigencia no a cambia; maske nan tambe sa cu Hulanda lo tuma decision awe, y cu nan no sa ki decision lo bay tuma. Y e ora ey, a base di esey ta bay dicidi si ta bay tin negociacion tambe na mesa pa wak kico lo sigui.

Den un comunicado pa prensa, Gobierno di Aruba a indica cu durante e reunion den Parlamento diaranson ultimo pa trata e Presupuesto Complementario, prome minister Evelyn Wever-Croes a informa di e status di negociacionnan cu Hulanda pa loke ta trata recorte di salario y sosten di likides.

El a duna di conoce cu Gobierno di Aruba ta den pleno negociacion cu Hulanda y awe 17 di december lo tuma luga e Conseho di Minister di Reino cu ta uno hopi importante pa Gobierno di Aruba.

Den e reunion aki lo trata e sosten di likides pa Aruba pa e prome kwartaal di 2022. Esaki tambe ta un reunion importante pa motibo cu ta bay atende cu e peticion pa ‘baow af’ recortenan riba salario di empleadonan publico y semi-publico.

“Nos ta insistiendo akinan pa elimina e 12.6%” Magaly Brito a señala. Y na mesun momento nan a tuma nota di loke prome minister Evelyn Wever-Croes a bisa, cu e tin un plan B. “Si e ta sincero, e por informa tambe awe caba kico ta e plan B, anto e ora ey trahadonan por sa con nan ta para cu e doñonan di trabao si tin un proposicion cu ainda e mes no lo a trece na mesa cu sindicato.”

Dianan di Pasco y Fin di Aña ta cerca, y asina a bin dilanti e pregunta cu si nada pasa den dianan aki, boso lo sigui cu e accion di protesta? Brito a contesta: “E mandato cu nan tin di e grupo di trahadonan ta depende di un referendum entre nan miembronan pa wak con nan ta bay sigui. En todo caso SEPPA cu SIMAR tabatin e decision caba y ta p’esey e motibo cu nos ta para awe, pa sostene esunnan cu a bisa cu nan ta cla pa sigui cu e accionnan, pa keda riba exigencia di stop e cortamento di salario di 12.6%.”

Di su parti, Jeromin Kelly, presidente di Sindicato di Trahadonan di Telecomunicacion (STT) a comenta na Bon Dia Aruba cu nan ta continua dunando nan sosten, aunke nan ta wardando e decision di awe den Conseho di Minister di Reino. Kelly a sigura cu nan ta keda solidario cu nan otro coleganan sindical. A puntra mirando cu Gobierno di Aruba a bisa cu no tin e fondonan, si dicidi di continua cu e recorte di 12.6%, ¿kico boso tin pensa di haci? Pa cu esaki Kelly a menciona cu esaki ta un decision cu nan lo tuma despues. “Nos tur sa cu Aruba no por para riba su pia ainda, y si ta asina e ora full pais Aruba ban carg’e hunto. No solamente e grupo chikito aki cu tin 21 luna ta cargando, ta yudando cu FASE y cu Loonsubsidie. E Loonsubsidie nos mes ta bay pag’e back, ta full Aruba ta bay pag’e back y ta asina e ora ban tur hunto carg’e e resto di aña cu Aruba ta den crisis”, el a sigura.

Eric Henriquez di Sindicato SIWA, cu ta representa trahadonan di WEB Aruba N.V, a comenta cu nan lucha lo sigui y e proximo paso nan lo tuma den conhunto, na unda nan lo sinta y delibera. Y si e reduccion di 12.6% no keda elimina, nan ta bay evalua kico nan lo haci, “pasobra e cos aki asina no ta bay keda”.

E accion di protesta aki tabatin un duracion di algun ora, na unda cu pa 12or di merdia trahadonan y sindicatonan a clausura, bisando pa keda pendiente di un proximo yamada, manera Josephine Albertus di Sindicato SIMAR a confirma na Bon Dia Aruba.