E compania di Eagle LNG no ta core e riesgo pa hinca nan mes den actonan di corupcion. Esaki lo por no solamente daña nan imagen, pero tambe perde e biyones cu nan a haya na financiamento. Esaki ta loke Shaun Lalani, presidente di Eagle LNG a bisa den un declaracion basta amplio.

Lalani ta tabata na Aruba debi na e combersacionnan cu tin andando cu Gobierno y e acuerdo firma. El a splica cu aunke e compania ta di Canada, nan a haya financiamento di 13 biyon dollar for di e fondo di Energy & Mineral Group. E compania Canades Fairest Group y Energy & Mineral Group na 2016 a cumpra 50% di Eagle LNG. Eynan a cuminsa nan a bira pionero di uso di LNG den transporte y exportacion di LNG pa mercadonan chikito.

Nan ta bisa di hopi experiencia na Europa y Asia, pero e solucionnan ey cu tabatin pa paisnan grandi, nunca a wordo adapta pa economianan chikito di e region aki. For di 2013 a bin ta traha pa yega na solucionnan pagabel (cu uso di gas) pa e mercadonan aki. Pa esaki mester tin e facilidadnan necesario mas cerca di e mercadonan en cuestion y produci e tipo di energia aki na menos gasto.

E mes conoce Aruba pa basta tempo y a bin ta evaluando e sistema di gas pa un mercado manera Aruba. Y a recorda cu e fundador di Energy & Mineral Group ta yiu di Lee Raymond, di mundo di refineria na Aruba.

El a clarifica e articulo publica riba Bloomberg siman pasa. Segun Lalani, e memo di Gobierno menciona ta relaciona cu financiamento di un proyecto di nan y no e apoyo cu ta brinda na e trabao cu nan ta haci. Gobierno Mericano ta sigui apoya e proyecto di Eagle LNG. El a enfatisa loke un representante di Merca cu a bisa cu e proyecto aki ta bay trece pa Aruba un tipo di combustible, gas, cu ta mas barata y crea oportunidadnan economico pa e isla.

Rond mundo tin enfoke pa yega na gas sintetico cu ta wordo mira como un di e solucionnan pa stop e uso di fuelnan pisa cu ta causa daño inmenso na medio ambiente. Lalani a enfatisa cu kier yega na e solucionnan, pero cu esaki no ta bay a costo di causa daño na e hendenan di Aruba. Nan a haci un evaluacion a base di e cifranan di ultimo 10 aña den uso di combustible tradicional compara cu e uso di gas y esaki a duna como resultado cu lo spaar un 35% di e gastonan ey (loke cu ta paga pa e combustiblenan).

E ta admiti cu un dies aña pasa e tipo di proyecto di gas aki no tabata factibel pa Aruba. Pero e panorama a cambia. Mester a yega na un forma pa haci uso di e mesun sistema cu paisnan grandi manera Hulanda y Hapon tin, pero pa e islanan mas chikito, tambe cu gastonan hopi menos. “Esey nos a bin ta enfocando riba dje e ultimo añanan,” Lalani a splica.

A enfatisa cu nan no ta cumpra LNG for di un grupo intermediario pa despues bende cu Aruba. Nan mes ta produci e LNG. Nan tin un facilidad na Florida, cu ta hopi cerca di Aruba. Esaki ta importante pasobra e barco cu nan ta usa pa e region aki, ta mas chikito cu esnan cu ta bay direccion di continente Asiatico. Esaki ta trece eficiencia y ta reduci e gastonan. E facilidad cu tin aki ta e tamaño exacto pa Aruba. El a duna ehempel di facilidadnan cu tin na p.e. Rep. Dominicana cu ta grandi, manera esnan na Europa, y esaki ta loke ta haci e gas e ora caro.

Presidente di Eagle LNG a sigura cu nan no a haya ningun tipo di garantia di Gobierno pa realisacion di e proyecto di gas na Aruba. Pa yega na unda nan ta awo cu Aruba, a participa den un destaho transparente y a keda selecciona. E compania den tur nan procesonan, na cualkier parti di mundo, ta sigui reglanan di control di Merca. “Cualkier cos cu nos haci, cu ta corupto of ta duna indicacion di corupcion, ta afecta e inversion di miyones di persona den e compania na tur parti di mundo. E hendenan aki tin inversion no solamente na Merca, pero rond mundo. Nos no por mishi corupcion, pasobra ni e compania ni e inversionistanan no por haci negoshi mas cu Merca. Nos tin un bon record y ta pionero den e industria di gas cu ta uno relativamente nobo. E ta un industria cu a desaroya den e ultimo decada.”

Eagle LNG ta un compania estableci na 2013 (di un compania Canades) cu a forma hunto cu e famoso empresa Mericano General Electric. E meta di e union entre e dos empresanan aki tabata pa e region aki por logra cumpli cu e metanan climatico, mester introduci un tipo di energia alternativa pagabel cu ta conduci na un era di cero uso di carbon den transicion pa un economia unda no tin uso di carbon.

General Electric tin un presencia grandi den mundo di energia y transporte. “Na momento cu nos a crea Eagle e mision y vision tras di esaki tabata pa pone fin na uso di e energianan sushi y na su luga bini cu fuel cu tin como base gas,” Lalani a conta. Y a agrega cu esaki mester conduci na produccion di diferente tipo di gas mas limpi, manera gas natural renobabel, gas natural sintetico y hidrogeno.