Manera sindicatonan a indica dialuna ultimo den nan ultimo accion di manifestacion, nan ta pidi pa e luna aki di december di 2021,Gobierno di Aruba elimina e retencion di 12.6% di salario di empleadonan publico y semi-publico.

Pa e motibo aki, y despues di varios ora di protesta y manifestacion tanto di Sindicato di Maestro SIMAR como di Aduana SADA, SIWA, STT, FTA, SEPPA, empleadonan di Elmar, WEB Aruba N.V, di Polis y otro organisacion como OPPA di pensionadonan, nan a pidi un audiencia cu prome minister Evelyn Wever-Croes pa solicita e eliminacion di e medida aki, caminda cu el a ricibi nan despues di 12or di merdia.

Despues di e reunion cu prome minister, durante cual nan a delibera y dialoga tocante esaki, e representantenan di tur sindicato y organisacionnan presente tambe a exigi pa stop e retencion di e oranan cu nan tabata den accion dialuna ultimo.

Pa cu esaki, den reunion gobierno a indica sindicatonan cu lo a mester duna un tempo di 48 ora pa asina nan por tuma un decision.

Ayera atardi, diaranson 15 di december despues di 2or di atardi, medionan di comunicacion a ricibi un carta den cual gobierno ta indica na e sindicatonan cu despues di hopi consulta, secretario di Estado Hulandes, Raymond Knops a indica cu mañan 17 di december lo dicidi riba e solicitud di Aruba pa reduci medidanan di retencion, como tambe lo keda den dialogo e retencion di e oranan durante protesta.

Gobierno ta solicita na sindicatonan pa tene un dialogo y yega na un posicion comun pa conhuntamente cu Gobierno di Hulanda negocia riba e eliminacion di medidanan di austeridad.

Despues di e anuncio aki, sindicato SIMAR, conhuntamente cu SEPPA, a indica cu lo continua cu accion. Tin algun sindicato cu no lo participa den accion aki, manera sindicato SIWA di trahadonan di WEB Aruba N.V, su presidente Eric Henriquez a indica na Bon Dia Aruba cu nan no lo ta participa den accion aki pa motibo cu nan miembronan a papia.

Igualmente, Jeromin Kelly, presidente di Sindicato di Trahadonan di Telecomunicacion (STT) a bisa cu nan tabatin reunion cu nan miembronan y mayoria a dicidi cu nan lo warda e contesta di mañan, pero cu asina mes, nan ta steun esnan cu ta sali awe.

E accion awe ta tuma lugar cuminsando pa 7:30am na Boy Ecury Park dilanti di Juliana School.

Dia 25 di november ultimo nan tambe a manda un manifiesto den cual nan a expresa cu pa un tempo largo nan a keda solidario cu pueblo pa entrega 12.6% di nan entrada anual, pa asina genera pagonan di entre otro, FASE pa esunnan cu a keda sin trabou door di e crisis economico cu pandemia Covid-19 a causa. Sinembargo, esaki cu tempo a keda converti den un condicion pa ricibi ayudo financiero di Gobierno Hulandes.

Teniendo na cuenta cu e proposito original no ta existi mas pa sigui entrega di manera solidario, FASE a ser elimina, y manera CAft a indica, Aruba tin un recuperacion economico satisfactorio, diferente sindicato y organisacion a menciona cu nan ta di opinion cu entrega di 12.6% cu a impone riba trahadonan di sector publico y semi-publico tambe tin cu keda elimina.

E hecho cu Gobierno di Aruba a haci un peticion na Hulanda pa e reduccion di salario bira 6.3% no ta aceptabel pa nan. Unabes mas ta fiha un porcentahe sin negocia cu sindicatonan of dialoga cu nan, y nan ta esnan cu lo mester corta den nan entrada pa por cumpli cu e condicion.

Nan ta reitera cu nan no ta opone na un dialogo pa asina por yega na un meta cu un propuesta conhunto riba e forma con Pais Aruba ta dispuesto pa duna contenido na exigencia di Gobierno Hulandes pa recorta den gastonan di Gobierno di Aruba.