Nan a pone como deadline mañan 1or y mey di atardi; Trahadonan di sector publico y semi-publico lo sigui cu accion si no haya contesta positivo

Tabata 7or y mey di mainta ora cu sindicatonan a pone den nan convocatorio pa dialuna 13 di december tur funcionario publico y miembronan di sindicatonan asisti na e manifestacion, pa asina mustra nan mal contento y solicita eliminacion di e reduccion di 12.6% di nan salario.

9or di mainta for di Linear Park henter e grupo a sali cana den direccion di Bestuurskantoor, unda cu maestronan di scol, trahadonan di Setar, di WEB. NV, di Elmar, di Aduana, di Polis, miembronan di sindicato FTA (Federacion di Trahadonan di Aruba), SIMAR, SEPPA, SIWA, STT, OPPA representando e sector di pensionado, entre otro, tabata canta y grita frasenan como “Fase a caba, 12.6% no mas” y “No mas engaño, respeta nos!”

Ademas di retira e reduccion di e 12.6% nan tambe ta pidiendo pa re-institui gelijkbedrag di pensionadonan. Presidente di FTA, Hose Figaroa a indica na Bon Dia Aruba cu esaki tabata e escalacion di accion cu a tuma luga for di algun dia caba, na unda nan no a haya oido di gobierno. Y aworaki nan a yega na e punto cu nan kier escala. “Nos kier pa gobierno compronde kico ta loke sindicatonan ta exigiendo y atrobe, nos no ta nengando di bay dialogo. Nos exigencia ta pa kita e 12.6%, nos ta bay na mesa y nos ta papia e ora ey pa kico lo mester bin na su luga. E intencion di Hulanda no ta pa baha salario di e trahado, intencion di Hulanda ta pa e gastonan di e aparato gubernamental baha y pa esey no ta solamente pa mishi cu e salario di e trahado bo por yega eynan, tin otro maneranan. Y nos kier papia cu gobierno over e posibilidad, no mas cu nos no kier un cuchiu na nos garganta”, Figaroa a señala.

Pasa 10.30 di mainta e grupo di manifestante a yega dilanti Bestuurskantoor na unda cu pa un largo rato nan a keda warda riba un funcionario di gobierno pa ricibi nan y asina e manifestantenan por a entrega un manifiesto; ningun persona a ricibi nan.

Eric Henriquez, presidente di Sindicato SIWA cu ta representa trahadonan di WEB Aruba N.V na e momento ey a sigura cu nan a pidi un audiencia cu prome minister Evelyn Wever-Croes, ken tabata presente den Parlamento di Aruba na unda tabatin e reunion publico tocante e firma di acuerdo entre Eagle LNG cu WEB Aruba N.V.

Henriquez a bisa na Bon Dia Aruba cu si nan no haya e audiencia cu prome minister, nan mester dicidi kico ta e proximo paso cu nan lo tuma. Debi cu nan no a haya ningun contesta na Bestuurskantoor, e manifestantenan a dicidi di bay te porta di Parlamento di Aruba.

Un momento di hopi tension a presenta na unda manifestantenan tabata solicita cu gritonan pa algun funcionario di parlamento sali y papia cu nan. Gobierno pa motibonan di seguridad a solicita DOW pa pone baricada dilanti di Parlamento, na unda cu e personanan cansa di warda a dicidi di benta e baricada abao y cuminsa pusha tur hende dilanti, incluyendo polis cu a pidi mas refuerso pa nan por cuida y salvaguardia e luga.

Algun par di minuut despues, parlamentarionan a sali di e reunion publico pa duna algun palabranan na prensa. Miguel Mansur di partido Accion 21 a expresa na Bon Dia Aruba cu su preocupacionnan ta sigui pa loke ta trata e firma di acuerdo di Eagle LNG cu WEB Aruba N.V. Na e momento ey ainda Mansur no a duna su opinion personal na parlamento, unda el a sigura cu te ainda nan no a mira e contract. “Con un minister ta bay mara Land Aruba na 20 aña sin e mes a wak e contract?” El a menciona cu e lo sigui reporta tur abuso di poder, corupcion y nepotismo pa pone presion riba delaster miembro cu ta sostene gobierno pa nan haci lo corecto pa pueblo.

Presidente di parlamento, Edgard Vrolijk a sali te na e porta pa duna su palabranan na e manifestantenan kende a expresa palabranan di mal contento. Magaly Brito, presidente di sindicato SEPPA a lesa e manifiesto cu e peticion di kita e reduccion di salario di 12.6%.

Despues di esaki, nan a cana un biaha mas te Bestuurskantoor na unda nan a wordo informa cu prome minister lo ricibi e 11 representante di sindicato y organisacionnan. Despues di deliberacion y dialogo, gobierno a pidi nan un periodo di tempo, te mañan diaranson 15 di december, caminda cu 1or y mey di atardi nan tin cu duna un contesta na sindicatonan. Si pa e ora ey no tin un decision positivo pa sindicatonan, nan a anuncia cu nan lo t’ey back cu trahadonan un biaha mas.

Nan a recorda gobierno cu pa 21 luna trahadonan a yuda esunnan cu a perde trabao y awor cu ta protesta pa nan derecho kier retene mas salario di trahado. E representantenan di tur presente a exigi pa stop e retencion di oranan cu tabata den accion.