Reunion y encuentro publico riba deal Eagle LNG no a produci ningun informacion concreto

Mocion di desconfianza contra Evelyn Wever Croes pa pago di ‘hush money’ na ex-Directornan di WEB

Un mocion di desconfianza contra Prome Minister Evelyn Wever Croes y un Presidente cu a hinca un encuentro publico den un reunion publico cu a cuminza ayera pero lo mester conclui awe. Y e unico informacion nobo cu a sali di henter un dia di debate y informacion limita ta cu e contract cu Eagle LNG a cera cu WEB tabata data di 30 di November.

Pero un biaha mas tanto e Minister encarga cu maneho y e Minister cu responsabilidad legal, esta Sr. Glenbert Croes y Mr. Evelyn Wever Croes a insisti cu nan no conoce contenido di e contract, ya cu esaki ta un asunto di WEB.

E reunion publico a tuma luga cu porta cera, pa motibo cu segun Presidente di Parlamento esey ta conseho cu servicio di siguridad a conseha mirando cu tabatin cierto menasa contra e institucion. Raymond Kamperveen a cuminza cu un punto di ordo pa corda Minister Glenbert Croes cu e no a ricibi su contestanan, pero tabata ora cu lider di fraccion di MAS, drs. Marisol Lopez Tromp a pidi su punto di ordo cu Presidente di Parlamento mr. Edgard Croes a bisa “show a cuminza.”

Tambe a bin un discusion cu fraccion di AVP riba e peticion pa documentonan, incluso e acuerdo di terminacion di relacion cu dos ex Director di WEB, e procesonan con a yega na e decision pa WEB haya aprobacion di Utilities pa firma un contracto di 20 aña cu Eagle LNG y tambe e contract mes. Segun e fraccionnan di oposicion, e dos ex Directornan mester a bay pa motibo di nan oposicion contra e acuerdo. Pero tambe tabata kier a haya e conseho di Brown Lawyers, abogadonan di WEB riba e deal cu Eagle LNG y pakico a dicidi pa bay cu oficina di abogado Croes, Wever & Ruiz pa finalisa e negociacion cu e compania, ademas di tur e rapportnan di estudio di impacto economico, social y di medio ambiente.

Sr. Hendrik Tevreden di Comision Fiho pa Asuntonan Energetico a sugeri pa e tema keda discuti den e Comision prome cu pasa pa un reunion publico pa asina por haya mas informacion, aunke cu esaki lo no tabata habri pa comunidad por sigui. Un reunion cu expertonan lo brinda Parlamentario mas conocemento cu ta yuda e reunion publico despues, ya cu nan tin e conocemento tecnico y no a Ministernan. MEP a pidi pa cambia e reunion den un encuentro publico, pero esey no a sigui y finalmente a dicidi cu e encuentro publico cu expertonan lo a sosode merdia. Pa Marisol Lopez Tromp, henter e proceso di Comision fiho of encuentro publico no ta necesario mirando cu e contract entre Eagle LNG y WEB ta firma caba. Lider di Accio21 Miguel Mansur a bisa cu e ta aprecia e entusiasmo di Hendrik Tevreden pa un encuentro publico, pero e tambe ta di opinion cu ta laat. “Pakico no a yama un reunion di Comision Fiho ora cu a kita e directornan y prome cu a firma?” tabata su pregunta.

Pa lider di fraccion di AVP, el insisti di kier wak e contract cu a mara Aruba na 20 aña cu e compania.

NDAs

Minister Glenbert Croes a mustra cu tin non-disclosure agreements, NDAs, cera por lo tanto no por parti e contract, y a ripiti cu e mes no sa e contenido di dje. Pero e tabata dispuesto pa entrega tur otro documento relevante. Mester bisa cu durante dia, e Minister a entrega e maneho energetico di Gobierno y Parlamentarionan no a ricibi ningun otro documento cu nan a pidi.

Pero el a contesta e preguntanan si cu Sr.. Kamperveen di Raiz a manda, unda e Minister a bisa cu den cuadro di Good Corporate Governance, WEB por a actua riba su mes, basta cu e decision ta cuadra cu e vision di energia di Gobierno.

E Minister a splica henter e proceso di destaho cu RDA a organisa, cu na final a keda cu Quanten Aruba y Eagle LNG, y ambos ta mara na NDAs. Pero bou tur circunstancia, e acuerdonan cera ta tene cuenta cu e Acuerdo di Paris pa reduci emisionnan pa 2050 y tambe cumpli cu e maneho di energia nacional 2020-2030 unda ta baha emisionnan di CO2 cu 45 porciento y yega na un mescla di fuente di energia cu pa 50 porciento ta dependiente di alternativanan, manera solo y biento.

Wartsila

Na 2018 WEB a inverti den compra di seis planta Watsila cu por traha tanto riba heavy fuel oil, HFO cu awor WEB ta usa awor, pero por cambia pa gas natural. “E bida di e motornan aki ta 20 pa 25 aña y ta mesun duracion cu e acuerdo, y ta duna WEB espacio.” Cu un contract di 20 aña ademas ta haci cu e gastonan ta keda reparti pa un periodo mas largo cu ta evita cu e prijs di awa y coriente mester aumenta. “Mi ta de acuerdo cu e decision di e team di WEB cu compra di e plantanan di Wartsila, y nan a cumpli cu tur procedura.”

Tambe a mira e formula cu a scoge cu inversion independiente, en bes cu WEB mes realisa e proyecto su mes. A base di esaki a conclui cu e proyecto mester sosode hunto cu RDA y Eagle LNG. Ademas cu ta preparando pa e proyecto di LNG keda construi, tambe mester mira kico ta bay pasa cu hedging, ya cu e contract na 38 dollar pa bari ta caba fin di luna y no a yega na un contract fiho pa HFO cu ta bay keda e combustible te ora cu por cuminza usa e gas natural. E uso di e motornan di Watsila en todo caso lo reduci e necesidad pa 900 bari di HFO, pero ta reconoce cu tin un desafio pa yega na otro hedging exitoso.

Directornan retira

Locual tabata yamativo ta cu mientras cu Minister Croes a bisa cu e ta apoya e compra di e plantanan di Watsila y cu e negociacion cu Eagle LNG a inicia bou e Directornan anterior, el a duna un motibo global pakico mester a kita e Directornan. Y e acusacionnan ta hopi pisa. Hunta di Comisario di WEB y Utilities, cu ta compania madre a dicidi cu nan mester bay pa falta di confianza, insuficiente cuido di e compania, mal maneho financiero, falta di seriedad cu proyectonan, falta di siguridad energetico y peliger. Un acusacion particular tabata cu e ex Directornan a cera un protocol cu trahadonan cu no ta bay retene mas e 12.6 porciento di recorte.

Cartel di corupcion

Di su banda, Prome Minister Evelyn Wever Croes a haci uso di e reunion pa ilustra locual el a califica un maneho di grabbelton cu AVP a hiba entre 2009 pa 2017, cu conduci na un cartel di corupcion, manera e rapport forensico riba RDA a ilustra. A trece un maneho di integridad pa libra futuro generacion di corupcion di AVP, Prome Minister a bisa, pa medio di un codigo unda no por tin metemento politico den companianan estatal. El a acusa AVP di a haci uso di fondonan di RDA pa promocion y pa periodistanan biaha cu e tempo ey Prome Minister Mike Eman. Bou su maneho, Evelyn Wever Croes a sigura, no tabatin ningun instruccion cu a bay pa e companianan estatal pa e maneho diario.

E ta cuestiona e preocupacion di AVP pa e duracion di 20 aña di e contract cu Eagle LNG, ya cu e intencion tabata pa cera uno similar cu GasUnie di Hulanda. Wever Croes tambe a ilustra cu un contract mas cortico lo a nifica un prijs mas halto.

Mester bisa cu Presidente di Parlamento a schors e reunion e momento cu a bin un intercambio entre e ex Prome Minister Mike Eman y Prome Minister Evelyn Wever Croes. Mester bisa cu despues di e pausa cortico, Benny Sevinger a trece un punto di ordo pa bisa cu Glenbert Croes a bin duna informacion pero a yama Prome Minister Wever Croes aden pa haci show.

Gobierno Mericano

Presencia di representante di Gobierno Mericano na e acto ceremonial y na e negociacionnan cu Eagle LNG tabata pasobra Merca a compromete pa yuda desaroyo economico di Aruba despues di a pone sancion riba Venezuela cu consecuencia pa refineria di Citgo. “Aunke nan no ta subsidia nan, Merca a bisa di por ‘vouch’ pa tanto Eagle LNG y Quanten Aruba (red. e negociacionnan cu Quanten a termina pa motibo cu e termino di e MoU a pasa).’Como tal, Merca ta un di e partnernan mas importante di Aruba.”

Cartel di famia Croes

Pa miembronan di MAS, Aquanette Gunn y Marisol Lopez Tromp, Gobierno a haci un show di e acto di firmamento sabiendo cu a firma caba. Gunn a cita declaracionnan haci den Bon Dia Aruba unda Glenbert Croes a bisa cu Eagle LNG a gana e destaho pa traha e planta di LNG, y como tal tabata kier sa cuanto WEB a inverti pa realisa e proyecto, cuanto compania a participa y con financieramente stabiel Eagle LNG ta. E Parlamentario tabata kier sa di con a scoge oficina Croes, Wever & Ruiz pa negocia e contract.

Marisol Lopez Tromp di su banda a ilustra cu Prome Minister Wever Croes ta papia di good corporate governance, pero e mes ta actua contra e propio LIM vigente. Pasobra e Minister responsabel pa e contract di WEB ta Evelyn Wever Croes y no Glenbert Croes. Prome Minister luna pasa a ofrece pa duna tanto e, como su colega di fraccion Gunn y Miguel Mansur un curso di ley pa nan compronde con e Ministerionan ta hinca den otro. “Awe ta bin pa contesta siendo ta bisa cu ta Glenbert Croes ta encarga. E ta e Minister encarga cu energia segun e LIM.”

Pero mientras ta papia di Good Corporate Governance, hecho ta cu ta miembronan di famia di Prome Minister ta den tur e funcionnan clave den RDA, WEB y Utilities, y hasta oficina di abogado di su tata ta traha e contractnan. Glenbert Croes tin tur su rumannan ta traha den su oficina. P’esey Lopez Tromp a pidi pa kita tur impresion di conflicto di interes. “Pueblo no kier haya e impresion cu tin un cartel di famia ta maneha e pais.”

Finalmente Parlamentario di AVP, dr. mr. Ryçond Santos do Nascimento a bisa cu dificil pa kere cu ta acusa e ex directornan di mal maneho cu ta un crimen, pero ta duna nan un golden handshake cu mas bien ta parce “’hush money.’”

Mocion desconfianza

Y Santos do Nascimento na number di fraccion di AVP mesora a entrega un mocion di desconfianza contra Prome Minister Evelyn Wever Croes, kende segun e LIM ta responsabel pa energia y tambe e pago di e golden handshake na e directornan, sin usa e instrumentonan legal, particularmente penal contra nan pa nan mal maneho. Ademas, e mocion ta bisa cu tabata Prome Minister cu a permiti ex Parlamentario di MEP, pareha di su assistent bira Director di Utilities, cu su primo ta den Hunta di RDA, cu bufete di su tata a negocia e acuerdo cu Eagle LNG y ta su sua ta Director Adhunto di WEB. “E nombracionnan aki ta trece incertidumbre. Minister Presidente tabata responsabel pa integridad.” A base di e mocion ta dicidi pa pone un fin na confianza den Minister Presidente pa falta di transparencia. Fraccion di MAS y Accion 21 tambe a sostene e mocion.

E reunion a keda suspendi pa un encuentro publico unda e expertonan a splica algun detaye, pero no a bay den e acuerdo mes. E reunion publico ta continua awe.