(DutchNews) – E Gobierno Hulandes a cuminsa deshaci di miyones di tapaboca na un prijs asina abao cu nan mesun suplidor no por competi mas, De Volkskrant a reporta riba dialuna.
Ministernan a nenga di regala e tapabocanan aki pa motibo cu nan ta argumenta esaki lo a distorciona e mercado. Sinembargo e fabricantenan ta bisa cu recientemente nan a ricibi oferta pa compra di tapaboca cu nan mes a bende anteriormente na e Gobierno pa un fraccion di e prijs original.
Fleur Bakker, di Mondmaskerfabriek a bisa cu su compania a ricibi oferta di cahanan di tapaboca for di Lithuania pa entre 1,25 y 2 euro pa un caha di 50 tapaboca via un intermediario Hulandes.
Mas investigacionnan a revela cu e tapabocanan tabata e mescos cu e compania di Lithuania a cumpra di e Gobierno su agencia LCH pa mas o menos 0,64 euro pa caha aña pasa. E compania tabata den contact cu Mondmaskerfabriek ora cu nan a cumpra e suministro pidiendo pa prueba di origen.
“E dealer tabatin problema cu e exportacion y tabatin mester di documentonan cu nos detayenan pa asina e tapabocanan por crusa e frontera,” Bakker a conta De Volkskrant. Mondmaskerfabriek originalmente tabatin e prijs di e tapabocanan na 4 y 5 euro pa caha.
Anteriormente aña aki e Ministerio di Salud a marca mas di 300 miyon articulo di PPE, incluyendo tapaboca, handschoen, y bril pa deshaci despues cu nan a cumpra e articulonan aki pa un averahe di 300 miyon euro.
