Dia mundial di Derechonan Humano ta wordo celebra tur aña ariba 10 di december, e dia cu Asamblea General di Nacionnan Uni a decreta na 1948 e Declaracion Universal di Derechonan Humano. En conexion cu e celebracion aki, grupo Movemento Pro Derecho Humano Aruba a organisa un manifestacion cu a yega na Parlamento di Aruba, unda nan a entrega un manifiesto na vice-presidente di Parlamento, Sr. Raymond Kamperveen.
Nacionnan Uni ta describi e Declaracion Universal di Derechonan Humano como un documento historico cu ta proclama e derechonan individual cu ta coresponde na tur persona manera ser humano, independientemente di su rasa, color, religion, sexo, idioma, opinion politico of di otro caracter, origen nacional of social, posicion economico, nacemento of cualkier otro condicion.
E tema di e celebracion di Dia Mundial di Derechonan Humano di e aña aki ta igualdad – reduci desigualdad, promove derechonan humano, cu ta relaciona cu articulo 1 di e Declaracion Universal di Derechonan Humano cu ta bisa: “tur ser humano ta nace liber y igual den dignidad y derechonan”.
Nacionnan Uni ta splica cu e principionan di igualdad y di no discriminacion ta e esencia di derechonan humano. Igualdad ta den liña cu e agenda 2030 y cu e enfoke di e Nacionnan Uni cu ta inclui afronta y haya solucionnan pa formanan antiguo di discriminacion cu a afecta e personanan mas vulnerabel di sociedad.
“Igualdad, inclusion y no discriminacion, den otro palabranan un enfoke di e desaroyo basa den e derechonan humano, ta e miho manera pa reduci e desigualdadnan y reanuda nos ruta pa e logro di e agenda 2030”, Nacionnan Uni.
Movemento Pro Derecho Humano ta un grupo cu tin como meta pa sali na defensa di derecho humano di tur hende. Durante e manifestacion, e manifestantenan cana for di Juliana School y na yegada na Parlamento di Aruba nan a haci entrega di un manifiesto na vice-presidente di parlamento Sr. Kamperveen, den bista cu presidente di parlamento, Sr. Edgar Vrolijk, mes no tabata na Aruba. Sr. Aldrick Tromp, representante di Movemento Pro Derecho Humano, a lesa y entrega e manifiesto na Sr. Kamperveen.
Den e manifiesto e grupo ta subraya cu varios di e articulonan di e Declaracion Universal di Derechonan Humano no ta wordo respeta, entre otro articulonan 1, 2 y 3. Manera menciona caba, articulo 1 ta bisa cu tur ser humano ta nace liber y igual den dignidad y derechonan. Articulo 2 ta enfatisa cu tur persona tin tur e derechonan y libertadnan proclama den e declaracion aki sin ningun clase di distincion, y articulo 3 ta bisa cu tur individuo tin derecho ariba bida, libertad y seguridad di su persona.
Un di e puntonan di prioridad cu e grupo ta para fuerte ariba dje ta e desaroyonan cu ta tumando luga door di COVID-19 rond mundo y na Aruba, specialmente alrededor di e tema di vacunacion. Movemento Pro Derecho Humano ta enfatisa cu na principio mandatarionan a bisa varios biaha den e conferencianan di prensa y tambe riba medio social cu e vacuna no ta obligatorio, pero e grupo ta subraya cu nan a observa cu el a cuminsa bira un tendencia pa e doñonan di trabou exigi e trahadonan pa bay vacuna y duna nan un ultimatum pa trece prueba di vacunacion, si no nan por perde nan trabou y tambe nan ta menciona cu varios vacatura cu ta Sali ta tuma solamente hende vacuna pa traha. “Nos hendenan kier traha pero no por pasobra no kier respeta un escogencia personal medico. Movemento Pro Derecho Humano ta rechasa e tipo di desaroyo aki rotundamente pasobra e ta contra derecho di ser humano. Nos futuro no por depende di un vacuna”, e grupo ta enfatisa.
Vice-Presidente di Parlamento di Aruba, Sr. Kamperveen a ricibi e manifiesto. “Nos ta ricibie cu hopi honor y atrobe nos ta respeta boso pasobra nos tur tin nos derechonan y e ta vale la pena cu boso ta bringa pa boso derechonan. Nos como parlamento tin cu traha pa pueblo”, Kamperveen a bisa.
