Awo cu WEB Aruba N.V. aparentemente tin 20 aña pa paga Eagle LNG casi dos biyon florin nos Minister di Integridad kier un investigacion profundo tuma lugar pa asina sigura cu e proceso a wordo dirigi corectamente.
Ta parce cu Ursell Arends a lanta for di soño, pero e hecho ta cu nos Minister di Integridad a bira cara pa e realidad pa demasiado tempo caba: Minister-President Evelyn Wever-Croes ta mercadea integridad, mientras Minister Endy Croes ta haya un cartera cu responsabilidadnan pa cu Fundacion Lotto Pa Deporte, siendo cu Endy personalmente ta pendiente di e resultado di un caso civil miyonario cu ta involucra Fundacion Lotto Pa Deporte. E conflicto di interes miyonario ta obvio. Pero Ursell no ta bisa nada. Na mes momento e primo di nos Minister-President, Minister Glenbert Croes, ta haya un cartera cu ta dun’e responsabilidad pa cu maneho di gobierno pa cu energia. Tambe e ta representa Pais Aruba como solo accionista den algun entidad estatal, di cual entre otro RDA N.V., UTILITIES N.V. y su dochtermaatschappij WEB Aruba N.V. Ora nos scucha radio nos por tende un noticiero raporta cu un ruman muhe di minister Glenbert Croes ta fungi como su Chief of Staff, e otro ruman muhe ta fungi como su consehero legal, mientras cu su ruman homber, Juni Croes, ta director di RDA N.V. E nepotismo ta obvio. Sin embargo Ursell ta haci comosifuera e no ta compronde e palabra nepotiso. Noticia ta informa con e oficina di abogado di omo di Minister Glenbert Croes, señor Hendrik Croes (cu ta tata di e Minister-President) ta e abogado di confiansa di RDA N.V. y ta duna su servicionan na e otro entidadnan cu ta cay bao minister Glenbert Croes tambe. Recientemente a nombra un ex-candidato politico di MEP , Anthony Rojer, como director di UTILITIES N.V. y Lati Wever cu ta swa di e Minister-President ta director interino di WEB N.V. E reportero Ariën Rasmijn ta yama e grupo aki e Croes Clan. Pero pa Ursell esaki no ta ningun problema.
Ursell tambe a bin ta tolera un falta di transparecia cu ta cuminsa serca e Minister-President mes. Hasta den memes riba social media nos ta mira un sinfin di joke pa cu e hecho cu ora nos Minister-President mester duna claridad, hopi biaha e ta bisa: “mi no sa”. Ursell aparentemente a gusta e tactica aki y a dicidi di copia esaki ora e ta haya su mes confronta cu pregunta skerpi. E tambe ta observa bon con Minister-President ta gusta schuif responsabilidad riba otro (manera Hulanda of Minister di Enseñansa anterior, Rudy Lampe) pa no duna cuenta. Ursell tambe ta mira con e Minister-President ta gaña. Aparentemente Ursell ta sinti cu tolera mal gobernacion ta parti di ‘business as usual’, hasta si esaki ta costa RAIZ credibilidad den nos comunidad.
Pero awo cu e baca a hoga caba pa cu e contract entre WEB y Eagle LNG, Ursell kier insinua cu awa ta pasa hariña pa RAIZ. Esaki ta di compronde tambe. Bo tin un minister di Energia cu ta reconoce publicamente cu e deal entre WEB N.V. y Eagle NLG ta toca interesnan vital di Aruba. Un interes vital ta un interes cu ta toca e existencia mes di Aruba. Tipo di interesnan asina mester wordo palabra den conseho di minister. Sin embargo esaki no a sosode. Ademas den un democracia ta importante pa consulta cu representante di Pueblo pa cu decisionnan vital. Sin embargo esaki tampoco a sosode. En bez di duna claridad pa cu e contenido di e contract na conseho di minister y parlamento, Minister Glenbert Croes a opta pa inventa e storia cu como representante di e solo accionista den UTILITIES N.V. e minister no tin mag di mete den decisionnan strategico di UTILITIES N.V. ni di WEB N.V. E storia aki no ta haci ningun sentido, pasobra e ta bay linea recta contra e competencia di accionistanan. No ta existi ningun principio di “good governance” cu ta prohibi un accionista di haci uso di su poder di voto pa tuma decisionnan strategico pa un compania, manera emiti mas accionnan, cambio di Statuten, fiha e jaarrekening y naturalmente inversionnan grandi.
Den tur esaki RAIZ a bin ta tolera un maneho financiero cu no ta percura pa aumenta patrimonio di Aruba cu por ehempel inversionnan den infrastructura di Pais. A bin ta tolera un maneho cu tampoco ta bahando gasto di personal na un forma structural (cu excepcion di e 12.5% cu ta supose di ta temporario), un maneho cu a faya pa vitalisa entradanan di Pais Aruba. Locual RAIZ a cuminsa sinti ta cu mas nan tolera e falta aki di integridad, falta di transparencia y falta di profesionalismo di MEP, mas Pueblo ta decepciona den RAIZ como un “blind date” cu a resulta di ta un nachtmerrie. E partido cu a priminti cu “nos no ta nan”, ta wordo mira como complice di “nan”: pa falta di cohones di RAIZ WEB N.V. a keda mara na un obligacion biyonario. No ta existi ningun investigacion profundo cu por cambia esaki. Kerido Ursell, kico bo kier salba cu e accion aki?
