Colombia: Militarnan ta admiti na matanzanan ‘falso positivo’

(Mercopress)—Un grupo di militar Colombiano a admiti formalmente na e cargo di ‘falso positivo,’ durante e lucha contra guerrilleronan di e pais. E Corte cu Hurisdiccion Special pa Paz, JEP, a constata cu e militarnan ta responsabel pa e asesinato di 247 persona.

“Mi kier pidi pordon pa e dolor grandi cu e actonan despreciabel aki causa,” General Paulino Coronado Gámez, ex comandante di e di 30 Brigada di Ehercito Colombiano a bisa. El a bisa si cu hopi civil a presenta nan mes como luchadornan cu a genera un desolacion profundo memey di nan sernan keri. “Pero mi kier duna tur contribucion pa clarifica e situacion.”

E supuesto crimennan a keda cometi den e area noordwest di Catatumbo, unda 120 hende a perde nan bida, y un area grandi di e costa Caribense di Colombia, unda otro 127 civil a muri. E confrontacionnan na Catatumbo a sosode entre 2007 y 2008 y e matanza den e area di costa Caribense tabata algun aña prome, entre 2002 pa 2005.

E militarnan cu a comete e actonan lo topa cu familarnan di esnan cu a perde nan bida den e lunanan cu ta bin, como parti di e restauracion di paz, segun JEP.

Locual ta considera ‘falso positivo’ ta e matanzanan extrahudicial cu militarnan a haci den e prome decada di 2000. Hobennan di areanan pober tabata bay areanan remoto cu e promesa pa trabao. Unabes nan a yega eynan, a mata nan y a bisti nan cu paña di guerrillero pa mustra comosifuera cu a mata nan durante combate. A usa e metodo repetidamente bao Gobierno di Alvaro Uribe Vélez (2002-2010), kende a admiti na e Comision di Berdad, cu su Gobierno tabata demanda resultado di militarnan, pero a nenga cu a pidi nan pa comete crimen. “No tin un soldat of agente policial cu por bisa cu ami a duna un mal ehempel, den accion of cu palabra,” Uribe a bisa na e Comision di Berdad.

E confesion dilanti JEP ta un evento historico. Ta spera cu ex guerrilleronan di FARC tambe lo confesa nan crimennan, y cu nan ta keda huzga cu e mesun criterio, of cu nan lo mester pasa den e sistema hudicial regular cu por produci castigonan mas pisa. Segun JEP, dos oficial di e Ehercito Colombiano envolvi den e ‘falso positivo’ di e casonan na Catatumbo y costa Caribense a nenga nan responsabilidad, y pa e motibo ey, nan mester pasa pa otro hurisdiccion, otro sistema di Corte cu por nifica cu nan ta confronta e posibilidad di 20 aña di prison.

Riba potret: General Paulino Coronado Gámez,  ex comandante di e di 30 Brigada di Ehercito Colombiano.