Ayera mainta tambe a tuma luga un accion di protesta na hotel Aruba Beach Club, unda cu trahadonan di hotel a sali pa mustra nan disgusto pa motibo cu gerencia no kier negocia un contrato colectivo nobo cu e trahadonan. Sr. Hose Figaroa, presidente di Sindicato FTA tabata presente den representacion di su miembronan y a elabora mas ariba e situacion entre e trahadonan y e gerencia di e hotel.

Sr. Figaroa a indica cu pa algun tempo caba FTA ta negociando cu e hotel Aruba Beach Club pa yega na un contrato colectivo nobo pero negociacionnan a pega y gerencia a indica cu nan no ta dispuesto pa duna nada na e trahadonan y esey a haci cu no tin sentido mas pa negocia y a tuma e decision pa cuminsa cu un accion di protesta contra di e posicion cu e gerencia a tuma.

Figaroa a splica cu segun e gerencia di e hotel no por mehora e condicionnan di trabao, e hotel ta indica cu e problema ta placa y cu cifranan no ta suficiente positivo pa haci esey, pero di parti di e trahadonan cu ta traha na e hotel tur dia ta bisa cu esey no por ta e caso, tin trahado cu ta traha riba vloer pero tin trahadonan cu ta traha mas paden cu ta mira cifra unda cu no tin e necesidad pa tuma e postura aki. “E trahadonan ta bisa nan ta akinan tur dia, nan ta wak cu tin espacio pa mehora e condicionnan di trabao y e postura cu gerencia a tuma ta totalmente inaceptabel pa nan”, el a bisa.

E hotel Aruba Beach Club ta un hotel di propiedad timeshare y, segun Sr. Figaroa a indica timeshare no a sufri durante di e pandemia y esey tin di haber cu e hecho cu timeshare ta wordo paga pa aña, esey ta significa cu e miembresia ta wordo paga cu e turista bin haci uso di su camber of no y pues e efecto tabata minimo pa loke ta trata e pandemia.

Figaroa a señala cu lamentablemente e gerencia di e hotel a tuma un postura cu di parti di sindicato FTA nan ta condena totalmente pa motibo cu awe mainta gerencia a manda indica cu lo actua contra esunnan cu sali for di nan luga di trabao pa protesta.

“Esey nos como sindicato no lo acepta nunca, esaki ta un derecho di trahado na momento cu e ta mal contento pa demostra esaki den forma di un protesta y ta totalmente iresponsabel di parti di gerencia pa manda cierto mensahenan asina ki menasando cu esunnan cu vocifera nan mal contento, nan trabao lo ta na peliger. Nos como sindicato lo zorg pa esaki no sucede, nos lo defende e trahadonan aki den caso cu gerencia hinca den su cabes pa haci tipo di cosnan asina ki”, el a agrega.

Anteriormente FTA a yega di negocia un COA cu e hotel sin problema, pero e biaha aki e negociacion no a bay manera plania pa motibo cu tin un cambio di gerencia, Figaroa a splica, y aworaki esaki ta prome biaha cu ta negocia un CAO cu e gerencia nobo aki y lamentablemente e gerencia nobo a tuma un postura cu ta inaceptabel pa e trahadonan. “E trahadonan ta pidi nan fair share y esey no ta wordo duna y p’esey awe nos ta akifo”, el a bisa.

Sr. Figaroa a menciona tambe cu e manifestacion a cuminsa como un manifestacion di dos ora y durante esaki el a ricibi yamada di mediador di gobierno pa purba di regla pa partidonan bay na mesa bao di su guia. “Ley ta indica cu na momento cu mediador yama nos na mesa nos mester bay na mesa y nos ta mas cu dispuesto pa haci esey y kisas cu intervencion di mediador gerencia si lo por scucha e trahadonan”, el a informa.

Por ultimo Sr. Figaroa a bisa cu den e sector di turismo tur cos ta canando relativamente bon. El a menciona cu siman pasa e sindicato a firma un CAO nobo di tres cu Grape Holding cu ta tur e hotelnan Divi, cu no solamente tin diferente ahuste di dianan di vakantie cu a subi pero tambe tin diferente ahustenan di salario, tin un aumento tur tres aña unda cu tur tres aña e trahadonan lo conoce un aumento di salario. “Pues no ta asina cu pa e sector di turismo cos ta malo, e situacion a normalisa y tur hotel cu ta afilia na FTA mientras tanto ta back na 100%”, el a agrega.