Despues di e Dia Nacional di Accion, sindicatonan a reuni diahuebs mainta unda cu a dicidi di manda un carta di ultimatum pa gobierno y tabata spera un contesta ayera pa 12or di merdia. En bista cu Gobierno di Aruba a indica den nan carta pa e sindicatonan cu nan no ta cambia nan punto di bista y no ta elimina e 12.6%, sindicatonan a tuma e decision pa intensifica e accionnan di protesta.

Ayera tardi durante e conferencia di prensa na Simar di e sindicatonan, Sr. Edward Maduro, presidente di Sindicato SADA Aruba a informa cu dialuna mainta, di 7:30 di mainta pa 12or di merdia, e sindicatonan hunto cu nan miembronan, pensionadonan y demas trahadonan cu ta wordo perhudica pa e recorte salarial di 12.6%, lo tene un accion protesta lo sali for di Linear Park direccion Parlamento di Aruba

Sr. Maduro a recorda cu diaranson e sindicatonan tabatin un Dia Nacional di Accion unda cu tur e sindicatonan cu a participa na e manifiesto di dia 25 di november a yama nan miembronan pa un accion di un, dos of tres ora, pa demostra nan mal contento pa e manera con gobierno ta atendiendo cu e empleado publico, e empleadonan di e compania estatal y tambe e pensionadonan.

Diahuebs e sindicatonan a reuni pa evalua con e dia di diaranson a bay unda cu cada sindicato trece nan punto dilanti cu e mandato cu nan a ricibi for di nan miembronan durante e dia di diaranson y despues di e reunion y nan a manda un carta habri pa Gobierno di Aruba indicando cu nan ta keda para ariba nan punto cu nan ta di opinion cu gobierno no ta transparente, e no ta sincero ni cu e sindicatonan, ni cu e trahadonan y ni cu pueblo.

“Lamentablemente nos a haya contesta di gobierno unda cu gobierno ta keda para ariba su punto di bista cu e no por elimina e 12.6%, den un carta cu el a manda nos. El a pone algun punto unda cu nos ta lamenta e manera con gobierno ta bin dilanti den e carta, pero mi ta kere mucho no mester wordo bisa. E punto principal ta cu e respuesta di gobierno a conduci cu nos a tuma e decision pa escala e accionnan di protesta cuminsando esaki cu un accion dialuna mainta”, Sr. Maduro a indica.

Maduro a señala tambe cu di parti di e sindicatonan nan no tabata kier a yega ta un punto caminda e accionnan di protesta ta intensifica aki, pasobra di aña pasa caba e sindicatonan ta pidi transparencia di parti di gobierno, “pero gobierno a opta pa haci uso y hunga cu emocion di hende y ignora un negociacion cu mester a tuma luga for di aña pasa y no aworaki y esey a conduci cu aworaki nos miembronan ta bisa ta basta, nos no kier pa e recorte sigui y pa e motibo e ora dialuna awo nos lo intensifica nos accionnan”, el a agrega.

Un pregunta cu Sr. Maduro a ricibi ta cu ariba rednan social y den algun medionan di comunicacion, y di hendenan den Cocolishi, tin comentarionan cu ta indica cu sindicatonan ta manifestando pa motibo di un color politico specifico of pa “benta gobierno abao”, Sr. Maduro a contesta cu bisando cu den su opinion e ta tristo pa scucha hendenan cu ta den Cocolishi cu ta riba payroll cu no ta sufriendo pa locual ta trata e recorte aki ta trece e tipo di “disparatenan” aki dilanti.

El a señala cu ta “lastima” cu ora cu un persona ta haci uso di su derecho, un derecho hancra den nos constitucion y tin tipo di acusacionnan asina “falso y sin prueba”cu ta bin dilanti. “Esaki ta danki tambe na mesun gobernantenan cu algun di nan cu ta bisa esaki, kisas hopi biaha nan no ta bis’e directo pero nan ta insinua esaki si”. El a enfatisa cu como sindicato nan no ta presta atencion na tipo di acusacionnan ey y ta e miembronan ta dirigi e sindicatonan. “Cada sindicato tin nan directiva y e directiva tin cu responde na e miembronan, esey ta locual ta bin ta pasa y esey tabata bisto tambe diaranson”, el a comenta.

Gobierno di Aruba a indica caba cu nan tin e opcion pa hiba e sindicatonan corte, si nan ta desea esey, pa motibo di e situacion cu tin andando. Ariba e pregunta relaciona cu esaki Sr. Maduro a indica cu Aruba ta un pais unda cu democracia ta biba y si acaso gobierno ta sinti cu e kier bay den direccion di corte, tur hende na Aruba tin e opcion cu si nan ta sinti cu nan derecho ta wordo trapa, nan por bay caminda di corte.

“Si gobierno opta pa esey, mi ta kere nos lo por spera cu gobierno ta haci esey y den pasado caba el a yega di haciele. Mi ta kere nos tur por corda na 2008 cuanto biaha gobierno a hiba sindicato corte unda cu cada bes cu nan a bay corte nan a sali perdi, pero e ta un opcion cu nan tin y nos ta gewoon sigui e mandato di e miembronan y depende kico pasa dialuna nos lo atende cu e punto ey, pero mi ta kere e ta algo cu nos tin den bista”, el a agrega.