(AP) — Condena di Jussie Smollett diahuebs pa gaña polis tocante un atake racista, homofobico a yega casi tres aña despues di su reporte tocante un crimen di odio horibel cu rapidamente a bira parti di un paisahe politico polarisa, cu hende – incluyendo presidente Mericano – dunando nan opinion.
Un fiscal a bisa cu e veredicto tabata ‘un mensahe fuerte di hurado cu Sr. Smollett a haci exactamente loke nos a bisa cu el a haci’ – esta recluta dos ruman pa falsifica un atake pa asina por graba esaki den camara di seguridad y post riba rednan social pa publicidad.
E rumannan a testigua cu e ex-actor di ‘Empire’ a paga nan $3500 pa e engaño y a duna nan frasenan pa grita, incluyendo tocante ‘MAGA country’, aparentemente referiendo e slogan di e presidente e tempo ey, Donald Trump, ‘Make America Great Again’.
E reporte a genera titularnan rond mundo y a impulsa un caceria enorme na Chicago, cu alrededor di dos decena di polis ehecutando e investigacion. Tambe a genera critica di Trump, kende a yama e maneho di departamento di polis pa cu e caso ‘un completo berguensa pa nos pais’.
“No solamente Sr. Smollett a gaña polis y crea caos aki den e ciudad pa varios siman pa absolutamente ningun motibo, pero despues el a empeora e problema door di gaña bao huramento na un hurado”, fiscal special Dan Webb a bisa despues di e veredicto.
Smollett, kende ta color scur y gay, a insisti durante e bataya legal di casi tres aña, cu el a bira victima di atake na downtown Chicago na januari 2019, na man di hende cu a grita insulto racista y homofobico y a pone un cabuya rond di su nek.
Su abogado a declara inocencia di Smollet un biaha mas diahuebs despues cu e hurado a hay’e culpable di cinco of seis cargo di conducta desordena pa gaña polis. Nenyw Uche a bisa cu Smollet ta bay apela e condena, y ta ‘100 porciento sigur’ cu ta bay limpia su nomber den corte di apelacion.
E hurado a condena e actor di 39 aña di edad riba cinco cargo di conducta desordena – pa cada biaha separa cu a acus’e di gaña polis den e dianan despues di e supuesto atake. El a keda declara inocente di e di seis cargo, gaña un detective na mita di februari, simannan despues cu Smollett a bisa cu el a wordo ataca.
Smollett a para y enfrenta e hurado, sin mustra reaccion visible mientras tabata lesa e veredicto. E y su famia despues a bandona e corte sin comentario.
Hues James Linn a pone un audiencia post-huicio pa dia 27 di januari, y a bisa cu lo programa sentencia di Smollett na un fecha futuro. Conducta desordena ta un delito clase 4 cu ta carga un sentencia di prison di hasta tres aña, pero expertonan a bisa cu si e keda condena, Smollet probablemente lo ser poni den libertad condicional y ricibi orden pa haci servicio comunitario.
E daño na su bida personal y profesional por ta mas severo. Smollett a perde su rol den e programa di television ‘Empire’, cual tabata filma na Chicago, despues cu fiscalnan a bisa cu e atake tabata un engaño, y el a bisa hurado e siman aki, ‘mi a perde mi entrada’.
