(AP) — Detectivenan na Tampa ta pidiendo Uber yuda resolve un ‘scam di welo’ cu a estafa $10mil for di un homber di 75 aña na ken a bisa cu su nieta tabatin mester di e placa pa sali di prison.
Uber tambe ta yudando Oficina di Sheriff di Hillsborough haya sospechosonan den un estafa di hopi tempo cu a scam un muhe di 82 aña pa $700mil, casi tur e placa cu el a spaar den su bida.
Den ambos caso, un persona a bisa e victimanan di edad avansa pa retira placa y despues usa e servicio di lift pa piki esaki. Detectivenan kier nomber di esnan cu tin cuenta di Uber y informacion di credit card hunto cu nan historia di biahe, y Uber a bisa cu ta cooperando.
Den e caso mas recien, e homber di North Tampa a ricibi contacto di un persona bisando cu e tabata abogado di su nieta, pidiendo pa retira $10mil dia 11 di juni, segun e Tampa Bay Times a reporta.
Prome a dun’e instruccion pa bay na un negoshi di bail bonds, pero despues a bis’e cu un persona lo piki e placa den un Toyota silver cu un plachi di Uber dilanti. Uber a confirma e biahe, y awo un orden di buskeda ta busca mas informacion pa sigui e placa.
“Uber estrictamente ta prohibi uso di e app pa comete crimen y regularmente ta traha cu agencianan di cumplimento di ley pa asisti den investigacionnan”, Uber a bisa e Tampa Bay Times.
Guianan di Uber ta bisa cu e servicio ta mantene data di usuario manera describi den su notificacion di privacidad y terminonan di uso, revelando informacion na agencianan di cumplimento di ley ‘segun Ley di Privacidad di Comunicacion Electronico’.
Den e otro caso, un muhe pretendiendo di ta nieta di e muhe di 82 aña y un homber kende a bisa tabata su abogado a convence pa haci 13 retiro for di sucursalnan di BB&T den area di Tampa. El a entrega paki di placa na couriernan usando Uber.
E muhe ta demandando Truist Bank, crea na momento cu BB&T a fusiona cu SunTrust, alegando negligencia pa a permitie haci retironan grandi y inusual hasta despues cu a lanta sospecha.
