Parlamentario Marisol Lopez-Tromp tocante reunion di awe na Parlamento: “Fraccion MAS no a bay di acuerdo pa aproba 53 contract di gobierno sin presupuesto aproba”

Parlamentario y lider di fraccion di partido MAS, Marisol Lopez-Tromp awe mainta a haci comentario riba un reunion publico cu Parlamento di Aruba tabatin awe pa aproba 3.6 miyon florin pa prolonga 53 contract di personal cu lo termina fin di e aña aki.

Tocante esaki, Lopez-Tromp a trece dilanti cu na e momentonan aki ta existi un expectativa pa loke ta trata e contract cu a wordo firma cu e compania Eagle LNG pero ademas di esey gobierno a pidi parlamento pa duna sentimentonan y pa aproba e prolongacion di 53 contract individual na unda gobierno a pone un cifra di 7 miyon disponibel pa e proyectonan aki.

Loke ta resalta pa Lopez-Tromp ta cu mientras CAft a duna conseho pa baha e gastonan cu 8 miyon cu gobierno a presupuesta y na mesun momento tambe den caso di contractnan individual “parlamento no ta tuma decisionnan riba contractnan individual esaki ta un tarea di gobierno, di cada minister cu ta responsabel pa loke nan firma”, el a sigura.

Presupuesto 2022 no a yega parlamento te ainda na unda e ta cuestiona cu “no tin un presupuesto 2022 aproba, pa por bisa cu bo ta bay prolonga contractonan lo tin cu bay cu aña 2022, pasobra e contractonan aparentemente lo ta venciendo na e momentonan aki”, Lopez-Tromp a bisa.

Asina mes, e ta splica cu e no ta bay riba e punto cu esaki ta dirigi pa proyectonan cu ta bon pa Pais Aruba manera a wordo bisa cu esaki ta trata di pone 53 persona bay traha of sigui traha pa evita abuso y maltrato “e tema riba su mes no ta un discusion, pero e forma riba lo cual kier bin cune na parlamento sin cu tin presupuesto, sin cu tin un conseho busca for di Directie Financien, sin cu tin un conseho positivo di parti di Recursonan Humano”.

Di esaki, el a mustra un carta di Departamento di Recurso Humano cu ta indica cu nan no tin claridad riba con lo ubica e 53 persona aki den e departamento cu nan ta bisa, “es mas tin hasta departamento nobo cu a wordo lanta cu ainda no tin aprobacion pe den parlamento pa loke ta begroting 2022 y nos ta wak cu gobierno ta pidi pa parlamento bisa cu ta bon pa bay ubica personal, prolonga contracto den un departamento cu no ta ni existi ainda, esaki naturalmente no ta bon gobernacion”, el a manifesta.

El a enfatisa un biaha mas cu e punto no ta kico ta e meta, e punto ta con tambe ta wordo haci sin hinca e pais den problema “y aworaki kier haci parlamento complice di un procedura cu no ta corecto”, Lopez-Tromp a expresa.

Asina mes, el a declara cu ora ta cera un contract cu un persona gobierno ta esun cu tin informacion di cada persona, di su capacidad, di su consehonan di Financien, di Recursonan Humano, si tin placa pa esey, si tin vacatura pe y e risico cu esaki por trece pa pais Aruba.

Nan a wordo menciona tambe cu e carta di gobierno ta indica cu e suma di tur e 53 contract ta bay costa un suma di 3.6 miyon florin “nos ta mira cu ta trata akinan di un cantidad cu ta trata di no menos cu 35 contract individual y 18 DVO cu ta dienstverleningsovereenkomst, esakinan ta acuerdonan cu un minister of compania ta cera cu un persona, caminda cu e persona aki entre nan cu gobierno tin un suma cu ta wordo stipula, cu nos na parlamento no ta na haltura di dje”, Lopez-Tromp a señala.

Tampoco ta conoci cu si den acuerdonan aki cu e personanan ta gana como un ambtenaar cu normalmente ta gana 3.000 florin of esakinan ta contract cu gobierno a cera pa 10.000 mil of 15.000 mil florin.

“Parlamento no tin bista riba esaki y naturalmente parlamento no ta su tarea tampoco, esaki ta responsabilidadnan ministerial”, el a sigura.

Tambe, el a bisa cu esaki ta contractnan pa traha na Family Justice Center pero el a insisti riba e manera con lo aproba algo cu no tin presupuesto pe aproba pa motibo cu ta trata di placa pa aña 2022, sin conseho di Financien y tampoco di Departamento di Recurso Humano.

CAft den su conseho a bisa cu gobierno mester tene na cuenta cu e beleid verlagen personeel na unda cu parlamentarionan cu a bay na Hulanda e siman aki a atende reunionnan y nan a haci pregunta na CAft tocante situacion financiero di Pais Aruba y den cuadro aki nan ta bisa cu e ta gobierno su responsabilidad pa ehecuta e rapport akinan cu manera Lopez-Tromp a menciona tin advertencianan cu nan a duna pa motibo cu gobierno a bay presupuesta 8 miyon di florin extra den momento cu ta pidi pa rebaha e gastonan di personal.

“Awe parlamento ta bay tin un reunion cu no ta pertenece pa ta riba agenda di parlamento, pasobra bo no por pidi pa nos na parlamento aproba den caso akinan acuerdonan individual sin cu bo ta mira ki conseho tin, pasobra parlamento no ta cay bou responsabilidad di un minister, nos ta controla e ministernan, loke gobierno tin cu haci ta percura pa presupuesto ta na parlamento, pa nos trat’e y si ta wordo aproba y haci e trabou cu bo tin cu haci segun e maneho cu tin stipula, y awe kier haci parlamento complice di algo cu por ta castigabel.”

Asina mes, el a bisa cu fraccion di partido MAS a pidi reunion tocante situacion di werksternan y nan posicion huridico y te cu dia di awe cu lo mester a tin un comision cu mester a traha den 30 dia nan no a mira un solucion concreto ainda poni riba mesa.

Na e momentonan aki Lopez-Tromp ta na Hulanda y Aquannette Gunn ta esun cu a atende e Centrale Commissie den oranan di mainta, el a bisa na Bon Dia Aruba cu “Fraccion MAS a bay den contra e agenda su punto 2, caminda cu Gobierno kier a haya “Ok” di parlamento pa prolonga 53 contract cu lo costa 3.7 miyon sin cu tin e begroting 2022 aproba”.

Ademas, tambe el a señala cu “Raiz y Mep a bai eens. Nan mes ta permiti Gobierno usa Staten pa aproba miyones pa personeel den 2022 cu ni DRH ni Directie Financien no a saca advies con pa ubica e fondo ey y sin evalua e personeel, si tur ta cumpli ke condicion di DRH y sin tene cuenta cu e rapport Beleidsplan Verlaging Personeelslasten y sin tene cuenta cu e advies di CAFT pa rebaha 8 miyon di personeel cu Gobierno a voer op”, el a finalisa.