Te cu ayera ainda dump tabata manda huma continuo cu tabata plama riba bario di Parkietenbos y bisindario si cu a scucha di un paso concreto pa soluciona e problema. Pero pa Parlamentario dr. Ryçond Santos do Nascimento di AVP, ademas di e molester pa salud, tabatin otro scenario cu a hala atencion. Esta cu, Minister Xiomara Maduro a insinua riba Facebook cu hende a cende taira intencionalmente na candela riba dump.

Segun Santos do Nascimento e Minister a pone riba su Facebook “’Como Minister di Finanzas ta mi deber di informa cu cada candela riba DUMP segun un sentencia reciente di Hues ta costa Pueblo 5450 florin pa dia na daño di perhuicio. #MinFIC Cada candela cu huma riba dump na Parkietenbos ta costa Land Aruba Afls. 5.450,00,’” Santos do Nascimento a cita. “Si esaki ta e caso ta algo hopi grave, pasobra kimamento di taira ta causa un huma cu ta hopi toxico. E huma por irita bo cuero, bo wowo, garganta, nanishi, boca. E huma por afecta bo sistema di hala rosea y por causa daño na bo sistema nervioso central y hasta produci cancer. Candela di taira ta forma un peliger inmediato, pero e huma tambe por tin consecuencia cronico. P’esey den e rapport di PAHO (p. 24) ta bisa enfaticamente cu no mag di permiti kimamento di taira riba dump.”

Gobierno ta responsabel

E Parlamentario a sigui bisa cu e peliger di dump tin hopi otro aspecto, manera e hecho cu e tamaño di e dump ta haci cu proceso di descomposicion di sushi ta causa formacion di un cantidad grandi di gas metano. “E gas aki ta causa candela cu ta surgi spontaneamente. E candela aki tambe ta bay acompaña pa un huma toxico. Henter e situacion aki ta parce e caso di señor Öneryıldız contra Turkia dilanti Tribunal Europeo de Derecho Humano (EHRM).” Dr. Santos do Nascimento a conta di e caso unda e ciudadano Turco Öneryıldız tabata tin un famia grandi. Nan tabata biba den un bario pober banda di un dump cerca di Istambul. Maneho di e dump tambe tabata den man di gobierno. Öneryıldız a traha su cas cerca/na e dump ey na 1988. Manera ta conoci un mal maneho di dump ta causa cu un dump ta produci gas metano. “Locual hopi hende ta lubida ta cu e gas metano por explota y asina causa hopi daño y hasta morto. P’esey mester tin un bon maneho di desperdicio. Como cu na e sitio aki na Turkia tabata tin un mal maneho di e dump, e gas metano a produci un explosion grave na 1993. Den un solo dia señor Öneryıldız a perde nuebe miembro di su famia. Nuebe persona cu simplemente tabata na nan cas. Ademas e explosion a tuma bida di 30 otro persona di e bisindario,” e Parlamentario a ilustra.

“Den e caso aki e gobierno Turco mester a responsabilisa su mes dilanti e Tribunal Europeo de Derecho Humano. E Tribunal a haya e gobierno Turco culpabel di a viola e derecho riba bida di e 39 persona cu a fayece den e explosion na e dump. Segun e Tribunal e gobierno a faya di bin cu accion pa garantisa e integridad fisico y e bida di e habitantenan eynan. Di e manera aki gobierno Turco no a cumpli cu e obligacion pa realisa e derecho riba bida cu ta hancra den articulo 2 di e Convencion Europeo di Derecho Humano (EVRM). Na momento cu autoridadnan sa di un peliger real y inmediato, nan tin e obligacion pa tuma accion pa proteha e ciudadano contra e peliger di su salud y su bida prome cu e baca ta hoga. E convencion aki ta conta pa Aruba tambe. Esaki kier men cu nos Gobierno tin un obligacion internacional pa respeta e bida di tur e habitantenan di Aruba.”

No ta preocupa cu salud di habitantenan

Segun Parlamentario Santos do Nascimento, den caso di e maneho di desperdicio na Aruba, autoridadnan sa di e peligernan. “Nan sa cu mester tin hopi hende cu ta sufriendo di malesanan cu dump ta produci. Nan sa cu nan mester laga haci un estudio riba e relacion entre e mal maneho di dump y e salud di e habitantenan den e bisindario. Sin embargo autoridadnan ta opta pa no haci nada. Nan sa cu dump ta produci gas metano cu por explota spontaneamente y costa bida di hende, pero te ainda nos no a mira e trabaonan minimo pa controla e gas aki. Gobierno sa cu e tairanan riba dump ta criadero di muskita y ta core peliger di pega na candela. Toch Gobierno no ta bin cu un solucion duradero pa e tairanan aki. Gobierno ta bay sigui bira cara pa e sufrimento di ciudadano afecta pa e polucion di nos medio ambiente door di nenga pa haci un estudio riba e salud di nos hendenan.” Segun e Parlamentario, aparentemente Gobierno kier bay warda un desgracia sosode cu lo cobra bida di hende prome cu bin cu un maneho berdaderamente efectivo pa e desperdicio cu tur na Aruba ta produci. “Nos por spera mas di e conferencianan di prensa di nos Minister di medio ambiente cu por lo menos, e ta mustra cu el a haci su huiswerk y sa di kico e ta papia? Si no, no tin speranza mas ‘and this dump is a disaster waiting to happen!’”

Taira

Mientrastanto Bon Dia Aruba a ricibi un notificacion di un persona cu ta conoci pa redaccion y tabata traha cu DOW riba dump. E persona a acerca nos redaccion a titulo personal y a bisa cu e problema di candela riba dump ta un ‘time bomb,’ ya cu bao mita di e area tin candelanan ta sigui kima. “No mester di suafel ni lighter. E mes ta cende. Mi tabata un contratista di DOW y constantemente nos tabata haya nos mes cu candela ta gewoon cende nos dilanti.” E cabayero a bisa cu e ta kere cu e unico solucion ta pa busca otro destinacion pa e tairanan bieu. “Si mira cuanto container di taira ta yega Aruba, cada uno cu 2 a tres mil taira den dje. E paletnan cu ta bay riba dump por usa pa otro cos, pa construccion. Pero te ainda no por usa taira pa nada. No por trece un mashin pa corta nan chikito pasobra na Aruba no ta haci nada cu nan. Esey ta un problema grandi cu uso di taira. Na Aruba hopi hende no ta realisa e problema ey.” Pero ademas cu no tin uso pa taira bieu, e persona ta bisa cu hiba nan dump en todo caso no ta e solucion pasobra no ta e luga mas sigur pa nan. Nan ta forma un peliger grandi pa pega na candela y consecuentemente ta afecta e mangelnan protegi y tambe aviacion. Tin un area di e dump destina pa asbestos y si mester plama e tairanan pa yega na e area aki ta mas daño ambiental lo tin. “Kizas e unico solucion ta pa manda e tairanan pa exterior ora cu no usa nan mas.” E ex contratista a bisa cu cualkier luga di taira por duna mas detaye di e cantidad ta bin Aruba y cuanto ta bay benta afo pasobra ta prefera pa cumpra taira nobo en bes di drecha. “E cantidad di taira ta keda un peliger adicional pa dump.”

Mester bisa cu manera Bon Dia Aruba a mustra caba, comerciante Jamal Khan a bisa di tin solucion pa e tairanan. E lo por percura pa converti nan den HFO cu ainda WEB ta usa. Pero mester bin disponibilidad di parti di WEB, y tambe di Serlimar pa yega na e solucion aki.