(BBC) – Por lo menos 55 migrante, principalmente for di Centro America, a muri ora e container den cual nan tabata biaha a sufri un accidente diahuebs ultimo den oranan di atardi na estado di Chiapas.
Ta un di e pio accidentenan di e tipo aki cu a sucede na Mexico.
Otro 105 persona a resulta herido, entre nan 19 mucha menor di edad di Guatemala y Honduras, ayera diabierna Luis Rodriguez Bucio, comandante di Guardia Nacional a informa.
E funcionario a indica cu entre e heridonan tabatin 95 persona di Guatemala, 3 di Republica Dominicana, un di Ecuador, un di Honduras, un di Mexico y cuatro di e cual nan nacionalidad no ta conoci.
E nacionalidad di e personanan fayecido no a ser detaya, pero Rodriguez Bucio a splica cu nan tabata “di paisnan Centro Americano”, principalmente Guatemala, Honduras y El Salvador.
E migrantenan a drenta na Mexico dianan pasa y prome nan a concentra na San Cristobal de las Casas cu “personanan dedica na trafico di personanan” e funcionario a sigura.
Ricardo Mejía Berdeja, sub-secretario di Siguridad Publico a bisa cu “aglomeracion y condicionnan den cual nan tabata wordo transporta” tabata clave pa produci e tragedia ora e truck a boltia.
E chauffeur di e trailer cu ta pertenece na empresa di transporte Zeta, a sali y huy despues di accidente.
E siniestro a tuma luga na caretera Panamericano, entre Chiapa de Corzo y Tuxtla Gutierrez, e capital di Chiapas. Segun autoridadnan e truck tabata biniendo for di Comitan, na frontera cu Guatemala.
Segun bisiñanan di e zona, cu ta esun cu a yega prome na e luga pa yuda e victimanan, e truck tabata coriendo “cu exceso di velocidad” y a sali for di caminda na un crusada prome cu lo a haci impacto contra un muraya di un brug peatonal.
Como consecuencia, e cahanan di e container den cual e migrantenan tabata biaha a sali y e victimanan a keda benta riba e vloer di e caretera.
