(AP) — Rapper Travis Scott a bisa den un entrevista cu e no tabata sa cu fanaticonan a fayece na su festival Astroworld na Houston sino te despues di su presentacion.
Den un entrevista largo cu personalidad di radio y TV, Charlamagne Tha God riba YouTube ayera, Scott a describi di su perspectiva loke a pasa na e festival dia 5 di november cu a laga 10 persona morto.
“No tabata sino te minuutnan prome cu e conferencia di prensa cu mi a realisa realmente loke a pasa. Hasta despues di e show, bo ta djis sorto scucha algo, pero mi no tabata sa detayenan te cu minuutnan prome cu e conferencia”, Scott a bisa. El a bisa cu el a stop e presentacion un par di biaha, pero no por a scucha e fanaticonan gritando pa ayudo.
“Mi a stop un par di biaha djis pa sigura tur hende tabata OK”, Scott a bisa. “Mi ta djis gara energia di e publico, bo sa? Yamado y contesta. Mi djis no, no a scucha esey.”
Scott tabata creador y artista principal di festival Astroworld, unda 50mil persona tabata den publico. E set di Scott a bira mortal mientras fanaticonan a core acerca e escenario. E victima di mas jong tabata Ezra Blount di 9 aña di edad. Edad di e otro fayecidonan tabata entre 14 te 27 aña. Alrededor di 300 demanda a keda entrega te awo na Houston, y ta bay consolida esakinan y un solo hues ta bay trata nan.
Scott, promotor di concierto Live Nation, y otro companianan asocia cu e evento ta entre esnan demanda. Adicionalmente, Scott y organisadornan di e evento ta enfoke di un investigacion criminal di polis na Houston. No a acusa ningun persona ni a pone un cronograma pa ki momento lo completa e investigacion.
“Travis Scott, esnan rond di dje, promotornan, manager, y tur hende cu ta sostene ta e problema”, segun Tony Buzbee, abogado representando famia di Axel Acosta Avila di 21 aña di edad kende a fayece, den un declaracion na AP ayera. “Tur loke Travis Scott a haci of bisa desde cu dies persona a muri y centenares otro a keda herida na su concierto ta impulsa pa abogado y calcula pa pasa e culpa for di dje na otro persona.”
Den e entrevista, Scott a rechasa cu su historia di curasha fanaticonan acerca e escenario of pusha door di security a contribui na e caos na Astroworld.
“Hende djis no a yega eynan pa haci daño”, Scott a bisa. “Hende a yega pa pasa bon y algo desafortuna a pasa.”
Scott a bisa cu el a tene combersacionnan priva cu algun famia di e victimanan. E tambe a bisa cu e ta compronde pakico algun famia a rechasa su oferta pa paga gastonan funeral. “Mi semper ta bay t’ey pa kier yuda nan”, Scott a bisa di e famia di e victimanan. “Mi mester continua show up pa esey. Mi djis tabata kier sigura cu nan sa cu mi t’ey pa nan y ta continua t’ey pa nan.”
Scott a bisa cu e kier sa mas tocante kico a causa e morto y ta un lider den haya formanan pa preveni tragedianan similar sucede na otro eventonan en bibo. “Mi tin un responsabilidad pa haya sa kico a pasa aki. Mi tin responsabilidad pa busca un solucion”, Scott a bisa.
