Janice Boekhoudt Kock, un persona cu no ta desconoci den e mundo di entretenimento y baile. Janice hunto cu su casa Oslin Boekhoudt a lanta e prome scol di baile di salsa aki na Aruba, Pachanga. Den un entrevista cu Bon Dia Aruba Janice ta conta di su carera di bailarina, con el a cuminsa y kico a inspira e pareha pa cuminsa cu nan scol di baile Pachanga.

Janice ta conta cu el a cuminsa baila desde un edad chikito pasobra su mama Sra. Ceslin Yarzagaray y su tata Sr. Franklin Kock tabatin un grupo di baile yama Danza Aruba y desde chikito caba e tabata baila cu e grupo dunando show y presentando diferente caminda.

E momento cu el a conoce su casa, Oslin Boekhoudt, esey ta e momento cu hunto nan a cuminsa cu e scol di baile Pachanga na aña 2000. Na principio, Janice ta splica, Simadansa a acerca su casa Oslin pa cuminsa duna les di salsa y e a cuminsa yudele cu e lesnan.

“Semper mi a baila, mi mayornan a baila, dus mi a lanta den e mundo di baile, mi no tabata conoce nada otro y na momento cu mi a conoce mi casa cu e tabata tin e mesun pasion pa baile asina ey nos a cuminsa cu scol di baile Pachanga”, Janice a conta.

E motibo pakico Janice y Oslin a cuminsa cu scol di baile Pachanga na Aruba tabata pasobra tabatin hopi peticion pa baila salsa. “Nos tabata bay cierto camindanan bay baila y asina nan ta toca un salsa mayoria hende ta baha for di pista di baile y no tin hende cu ta baila, dus nos a ripara cu e gana tabata t’ey y siña nos a cuminsa.”, el a splica.

Janice ta enfatisa cu aunke naturalmente tabatin varios scol di baile, esakinan nan tabata concentra mucho mas ariba bailenan folklorico y bailenan clasico manera ballet y masha poco nan tabatin bailenan echt Latino. El a splica tambe cu su casa Oslin, tabata instructor na Hulanda pa hopi aña caba y e tambe a mira e posibilidad pa habri e scol di baile y asina nan a yega na e decision final pa habri scol di baile Pachanga na aña 2000.

Janice y su casa Oslin a representa Aruba na diferente pais y isla manera por ehempel Surinam, Hulanda, Corsou y Venezuela den competencianan di baile, dunando tayernan di baile of dunando show. Na 2002 e pareha a bay cu e prome titulo di Campeonnan Mundial di Salsa y na 2004 nan a competi na Corsou y a logra bay cu e titulo un biaha mas.

“Semper nos a mira e posibilidad pa hiba e nomber di Aruba dilanti, hiba e nomber di Pachanga dilanti pa asina nan sa cu nos hendenan di Aruba tambe por baila”, Janice a agrega,

E ta conta cu e gusta baila tur cos y e gusta domina tur tipo di baile y asina unda cu e y Oslin yega nan por representa. “Mi ta gusta salsa, bachata, kizomba, zouk, samba, merengue dus mi ta encanta tur tipo di baile pasobra asina ey mi por representa mi mes mi por representa Aruba”.

Actualmente Janice ta studiando y door di su estudio y door di e situacion di COVID, e tempo pa e scol di baile no ta operando mesun frecuentemente manera antes, pero el a menciona cu nan ta ofreciendo actualmente lesnan priva pa tur esunnan cu kier siña baila salsa cu “swing y sabor” y tur persona cu ta interesa pa siña baila cualkier e estilo di bailenan Latino, por subi ariba e Facebook page di scol di baile Pachanga pa mas informacion.

“Mi deseo ta pa asina mi caba scol pa mi cuminsa duna show back, pa mi ta back on stage y kisas cu mi por cuminsa back cu e scol di baile manera mi tabata tene antes”, el a agrega.