(NTN24) – Minister di Defensa di Colombia, Diego Molano a confirma e morto di e lidernan guerrillero Hernan Dario Velasquez, alias “El Paisa”, y Henry Castellanos Garzon conoci como “El Romaña”, na teritorio Venezolano.
“Colombia a keda liber di dos simbolo di e mal, cu tabata pertenece na FARC, alias El Paisa y Romaña, autoridadnan a determina cu e dos criminal aki a stop di opera pa confrontacionnan cu a presenta den eventonan independiente na diferente region di Venezuela”, e halto funcionario a bisa diamars ultimo.
Molano a agrega cu Inteligencia Colombiano ta esun cu a confirma e morto di ambos guerrillero na diferente parti di Venezuela y den e mesun ubicacion, manera a pensa for di un principio.
E hechonan violento tabata pa via di discusionnan interno entre organisacionnan cu ta dedica na narcotrafico.
“Informacion di inteligencia ta señala cu pa via di discusionnan di fondonan criminal den e caso di El Paisa, cu alias Lulo, den desaroyo di varios actividad, nan a muri den un confrontacion cu explosivonan”, el a menciona.
“Den e caso di alias Romaña, na un otro luga diferente na Venezuela, tambe tabatin confrontacion cu a duna origen na su morto. E informacion aki ta sigui den elaboracion di parti di fuentenan di inteligencia”, el a puntualisa.
Den margen di circunstancianan di e morto, desaparicion di El Paisa y Romaña ta marca un di e golpinan mas contundente cu “Segundo Marquetalia” a ricibi for di su fundacion na augustus di 2019.
Aunke ningun di nan tabatin un rol politico representativo den e organisacion -como tampoco nan tabatin den FARC-, nan accionnan pa confrontacion y expansion di disidencia, asina como pa negoshi di narcotrafico, si tabata notabel.
