Awe ta firma e contract entre WEB y Eagle LNG pa un periodo di 20 aña. Pa Parlamentario di Raiz Raymond Kamperveen, e acuerdo ta lanta hopi pregunta. Pero ta fraccionnan di oposicion, AVP, MAS y Accion21 cu a urgi Presidente di Parlamento pa yama un reunion di caracter urgente pa trata e asunto.

Mike de Meza, Marisol Lopez Tromp y Miguel Mansur bisa den nan carta pa Presidente di Parlamento mr. Edgard Vrolijk, cu ta pa medio di un conferencia di prensa di Minister Glenbert Croes cu a tende cu ta firma e contract entre WEB y Eagle LNG pa un duracion di 20 aña cu mester brinda siguridad di provision di energia y awa pa comunidad di Aruba. Mas ainda ta mara otro compania estatal, den e caso aki RDA na e acuerdo aki, cu ta trece obligacionnan financiero grandi y cu su risiconan. E structura di maneho (governance) ta ilustra cu e beneficiario final di e interesnan vital aki ta e pueblo di Aruba cu ta finalmente e doño di e companianan estatal. Esaki ta haci cu e Minister di Energia como esun responsabel pa maneho di energia y representante di e interes di Pais Aruba den e companianan, mester duna cuenta na Parlamento con a yega na e decision strategico aki manera ta e caso di WEB y Eagle LNG.

E ta di vital importancia cu e Minister di Energia ta duna claridad na Parlamento riba e contenido y embergadura di e contract y e maneho di energia na cua Aruba lo ta mara pa e proximo 20 añanan. Como tal AVP, MAS y Accion21 lo kier haya e claridad mas pronto cu ta posibel y kier pa yama Minister Glenbert Croes pa duna splicacion na Parlamento cu e unico punto di agenda e contract di Eagle LNG cu WEB y tambe cu RDA NV.

Pakico Richard Eman a tuma retiro

Mirando e ultimo suceso Miguel Mansur di Accion21 a bisa via su media social cu e ta preocupa. A mira e dos directornan di WEB mester a bay cu terminonan cubri cu un NDA, esta un non-disclosure agreement. “Mi a tende cu ambos a bay cu full nan salario te dia cu nan yega na pensioen. Con esey ta na interes di WEB y land Aruba y mi kier sa si nan oposicion na e contracto cu Eagle LNG lo tabata motibo cu nan mester a bay . A mira con Richard Eman kende ta cu MEP tambe a tuma su retiro como Director di Utilities. A instala sua di Prome Minister como Director interino di WEB, a reemplasa e oficina di abogado cu tabata haci e trabou pa mas di 30 aña pa WEB, cu esun di bufete di tata di Prome Minister. Nos ta mira yen di maniobra pa manipula y controla e situacion aki. Nos no a mira ningun contract. Ta duel mi cu Gobierno no a bin Parlamento prome, mustra e terminonan y toch ta sigui e proceso di firma y despues di e acto ta bin presenta na Parlamento.”

Mansur a sigui bisa cu el a tuma nota di carta di director interino den cua e ta bisa cu WEB ta tratando pa 10 aña caba pa transiciona pa gas. “Pero 10 aña pasa e situacion economico tabata rekeri un proceso asina. Awor e situacion ey no t’ey mas. Transicion di HFO pa gas lo nifica un peso mas halto pa e consumidor y realmente e produccion di energia pa medio di ‘fossil fuels’ mester keda e alternativa, ‘e back up.’”

Segun Mansur ta prueba cu produci energia pa medio renobabel ya ta mas barata cu produci pa medio di gas. “Pues pakico ta inverti pa transiciona na gas, limitando nos mes, cu nos mester usa fossil fuels te cu 2042. Pakico haci esey, mientras cu por lo pronto por sigui cu HFO y ta transiciona pa energia renobabel. Na Corsou ya caba 53 porciento di energia ta procedente di energia renobabel, y Aruba lo no por alcansa esaki mas pasobra cu e contract aki ta limita cu por yega maximo na 50 porciento di renobabel, a pesar cu e tecnologia renobabel ya ta mas barata cu gas. Ken tin un interes den pasa e acuerdo aki?”

E Parlamentario kier sa ken tin interes pa pasa e acuerdo aki y cua lo ta e companianan cu ta ricibi contracto lucrativo. “Esaki ta parce un capricho di si of si. A tuma nota cu dump ta na candela atrobe. Ma haya dos rapport hopi alarmante, tocante situacion di medio ambiente. Ma comparti e rapportnan cu Minister Geoffrey Wever. Desde 2019 Gobierno ta na altura di menasa pa industria turistico. Pica cu no a hinca e energia y determinacion cu a haci pa Eagle LNG pa resolve medio ambiente. Nos a spera un diferente maneho, unda ta pone pueblo prome, pero ta mesun storia di semper.”

1.6 biyon dollar

Calculacion lihe cu Mansur a haci ta ilustra cu WEB lo gasta mas di 1.6 biyon dollar den 20 aña pa cumpra e gas. “No tin hustificacion economico pa mara Pais Aruba na un acuerdo asina, sigur no sin pasa Parlamento prome. E 1.6 biyon dollar lo gasta pa cumpra gas? Realmente tin hopi pregunta y p’esey nos ta purba di haya contesta.”

Di su banda, Marisol Lopez Tromp di MAS a bisa cu mescos cu tur hende, ta via media e mester a tende di e contracto entre Eagle LNG y WEB y cu e contract lo tin un duracion di 20 aña. Lopez Tromp ta cuestiona con por mara WEB na un contract asina largo a pesar cu e propio Minister a bisa di no a lesa e contract.