Fraccion di Raiz cu pregunta pakico: Parlamento no ta informa di e desaroyo aki Minister di Energia contento cu WEB y Eagle LNG a yega na acuerdo pa gas natural

No por tin ningun hende cu por ta contra gas natural pa opera WEB pasobra e ta nifica fin di e Heavy Fuel Oil cu ta asina dañino pa medio ambiente. Pero mas detaye Minister di Energia, Glenbert Croes no por a duna riba e acuerdo entre WEB y Eagle LNG pa compra di gas, pasobra “mi mes no a mira e contract.”

Pero hecho ta cu e contract si lo mara WEB, un compania estatal, 100 porciento di Aruba si na 20 aña na e compromiso pa cumpra gas natural como combustible.

Minister Glenbert Croes a anuncia ayera cu Eagle LNG lo inverti 110 miyon dollar den facilidadnan na Aruba alcance e gas natural pa bende cu WEB. Ta considera pa ofrece gas na cruceronan cu ta bishita Aruba y ta haci uso di gas natural como combustible y si esaki logra “Aruba lo por bira e stacion di gas pa barconan crucero,” Glenbert Croes a bisa.

Segun Minister Croes, e LNG ta e combustible di transicion na caminda pa fuentenan cu ta emiti cero (0) CO2 cu ta contribui na cambio di clima. Manera Bon Dia Aruba a publica Dialuna, uso di gas natural of methaan, ta produci 30 porciento menos CO2 compara cu Heavy Fuel Oil cu WEB ta usa awor aki. Sinembargo, locual ta peligroso di methaan ta si tin escape. Den otro palabra, methaan cu saca for di pipanan of tankinan ta sumamente dañino pa medio ambiente y ta pa e motibo aki tambe cu rond mundo a dicidi cu si kier bay pa fuentenan di energia limpi, mester stop cu gas natural tambe.

70-30

LNG, ta para pa Liquid Natural Gas y esaki ta unicamente pa transporte. Unabes cu e LNG yega na su destinacion, e mester bay den un tanki special. Y e tanki na Aruba lo ta riba tereno di RDA, e Minister a confirma. Mester bisa cu ehecutivonan di WEB y RDA tabata presente na e conferencia di Minister Croes, aunke cu ningun a duna splicacion (red. Minister Croes a sugeri pa haci e preguntanan tecnico despues cu WEB y Eagle LNG firma e contract Diahuebs awor).

“Pa WEB e ta nifica fin di e uso di HFO, esta e Heavy Fuel Oil, cu ta nifica cu ta bay ta miho pa medio ambiente.” Pero locual ta miho pa comunidad ta cu e prijs di combustible lo keda relativamente stabiel pa comunidad. Croes a splica cu e hedging na 38 dollar pa bari di HFO ta caba fin di luna y prijs actual ta na 70 dollar cu ta nifica cu ta bin presion riba e prijs di awa y coriente pa consumidor. Minister di Energia a bisa cu ta spera cu lo por yega na un areglo pa e HFO mientras cu ta construi e facilidadnan pa e gas natural.

Banda di e gas natural, WEB lo expande su generacion di coriente pa medio di un parke di Molina cu ta bay bira mas grandi y tambe panelnan solar. Realisticamente e mescal di fuentenan alternativo aki lo yega na 30 porciento di e generacion di coriente, mientras cu gas natural lo percura pa 70 porciento di e necesidad pa combustible. “E meta ta pa nos yega na hidrogeno.”

Ta for di 10 aña pasa caba a cuminza e gestionnan pa yega na uso di gas natural y Minister Croes ta bisa cu den caso cu no sigui cu e acuerdo cu Eagle LNG, e lo nifica cu nunca lo logra algo cu tur experto y tur partido na Aruba a reconoce di ta algo bon pa Aruba.

Pero e Minister no por a duna mas detaye y ta kere cu ta expertonan cu a negocia e contract mester duna e splicacion ya cu e no sa kico ta den e contract.

Mester bisa cu Eagle LNG a gana e destaho publico pa lanta un planta di LNG na Aruba. Sinembargo, e contract aki ta uno cu WEB a cera pa cumpra gas natural cu mester yega den forma likido. Aunke cu no ta bay traha un planta di LNG na Aruba y mas bien ta almacena e gas, e ta crea cupo di trabao durante e fase di construccion di e tanki y infrastructura (cu ta responsabilidad di Eagle LNG) y tambe despues ora di maneha e operacion. DPL lo tin facilidadnan pa contratistanan cu kier participa den e construccion, e Minister a splica.

RDA

Glenbert Croes a bisa cu unabes e acuerdo entre WEB y Eagle LNG ta firma, RDA lo pasa pa e negociacionnan pa asina por ubica e tanki riba su tereno. E Minister no por a duna detaye riba e infrastructura cu ta bay rekeri, mirando cu e gas mester pasa den pipanan di e area di refineria te na WEB. Pero el a sigura cu ta bay tene cuenta cu e exigencianan mas halto di siguridad. E ta kere cu hopi di e preguntanan riba e nivel di siguridad por haya nan contesta di e expertonan. Locual e Minister a admiti cu berdad na Aruba no tin un ley di medio ambiente y cu e oficina nobo na caminda, Bureau Energiezaken lo percura pa delinea maneho specifico y reglanan pa siguridad. Di otro banda, aunke cu no tin un ley di medio ambiente ni tin e formanan pa midi gasnan peligroso, e ta sigura cu su colega di medio y Naturalesa Ursell Arends lo percura cu tin tur e reglanan na nan luga.

Raiz cu pregunta

Mientrastanto, miembro di fraccion di Raiz, Sr. Raymond Kamperveen a manda 13 pregunta pa Minister Glenbert Croes. Den cuadro di ‘Good Corporate Governance’ y transparencia, Kamperveen kier copia di e contract, pa sa si ta WEB of Utilities a firma cu Eagle LNG. Tambe e kier haya e ‘Letter of Exclusivity’ di Januari 14, 2021 entre RDA y Eagle LNG. Kamperveen kier sa cua ta e estudio of documentonan cu a tene na cuenta pa tuma un decision asina, particularmente pa mara WEB na un contract di 20 aña y no ta uno di por ehempel 6 pa 10 aña, teniendo na cuenta e stipulacionnan di e Acuerdo di Paris y e obhetivo sostenibel di Nacionnan Uni, unda pa 2030 mester yega na fuentenan di energia sostenibel y pagabel.

Kamperveen ta puntra Minister con ta posibel cu Parlamento mes no tin bista di e desaroyonan den Utilities NV y su companianan of ta asina cu Parlamento no tin derecho pa haya bista kico ta sosode den e companianan estatal? “E ta iresponsabel y dificil pa kere cu Parlamento mester tende di e desaroyo aki for di medionan di comunicacion,” Kamperveen a bisa Minister Croes. E Parlamentario di fraccion di Raiz kier nomber di personanan cu a y ta maneha e companianan estatal den e ultimo añanan, mescos cu ta e caso cu e miembronan di hunta di directiva, tanto esnan cu no t’ey mas y kendenan a tuma nan luga. Kamperveen kier mira e organogramonan di e companianan.

Fake news

Mientrastanto Minister Croes medio di su relacionista publico y tambe media social di Gobierno a bisa cu e articulo cu Bon Dia Aruba a publica riba su Plataforma di Facebook Diadomingo ultimo tabata ‘fakenews.’ Locual a resulta ta cu e biahe di Sr. Juni Croes, su ruman, cu te cu ta asina leu cu sa ta den Directiva di RDA y ta un Consehero di Minister Glenbert Croes tabata uno personal. Minister Croes a enfatisa cu su ruman no a biaha pa Miami pa celebra e acuerdo. Sinembargo e contenido di henter e articulo, cu ta inclui e pregunta cu e Minister mes no por a contesta, esta si e pipanan cu mester hiba gas di RDA pa WEB ta basa riba hechonan y un pregunta conciso. Un pregunta cu segun e Minister, no por contesta ainda. Den otro palabra, e articulo di Bon Dia Aruba ta ‘real news.’