(ElNacional/Bloomberg) – Gobierno di Nicolas Maduro ta expulsando e observadornan electoral di Union Europeo dianan prome cu 13 di december, e dia cu e periodo cu nan por a permanece na e pais ta caba, Bloomberg a informa.
Analistanan di UE y un grupo di miembronan di personal mester sali di Venezuela e weekend aki despues cu Ministerio di Relacionnan Exterior a nenga extension di nan visa, un persona cu conociendo di e situacion a bisa Bloomberg.
E fuente a detaya cu e observadornan a ricibi un orden di salida di parti di Ministerio di Exterior y Conseho Nacional Electoral.
Ainda eleccionnan no a tuma luga na momento cu e chavismo a cuminsa un atake contra Mision di Obeservacion Electoral di Union Europeo, cu ta e prome den 15 aña na Venezuela. Poco prome cu e delegacion a yega, prome vice-presidente di PSUV, Diosdado Cabello, a pidi e siguidornan di chavismo pa no confia e expertonan.
“Mi kier denuncia publicamente e hendenan cu a yega, supuestamente observadornan, aki na Venezuela di Union Europeo. Tene cuidou cu e hendenan ey. E hendenan ey no a bin pa haci observacion di ningun tipo. Nan ainda ta kere cu nan ta un imperio y nan ta kere cu nos ta un colonia”, e oficialista a expresa cuminsamento di november.
Despues cu e informe di UE a sali ariba e proceso electoral, cu a registra iregularidadnan manera falta di independencia hudicial of uso di recursonan publico durante campaña, Maduro a señala e observadornan di “spionnan” cu tabatin a intencion di “mancha” eleccionnan celebra dia 21 di november.
“Un delegacion di spionnan, eseynan no tabata observadornan internacional. Nan tabata cana rond di e pais libremente spionando e bida social, economico, politico di e pais”, Maduro a insisti.
