E miho gesto cu Prome Minister Evelyn Wever Croes lo por haci na e momento aki, despues cu den forma bon cla Raymond Knops a expone su mentiranan, ta di awe mes elimina e reduccion di salario di trahadonan publico.
Melvin Tromp di partido AVP ta mustra cu awor cu e lider di MEP a wordo expone como mentiroso den Reino Hulandes, no ta resta nada di coregi un di su tantisimo mentiranan cu el a bin ta haci for di 2017 ora cu el a hurament’e prome biaha como Prome Minister.
“Aki no ta cuestion di campaña politico, Prome Minister no mester trata di tapa e abuso cu el a comete contra trahadonan publico, cu e unico meta pa scapa cara di su gobierno, cu pa mas cu cuater aña ta gañando pueblo.
Den un forma sin precedente, nunca antes bisto den politica di Reino Hulandes, Evelyn Wever Croes a wordo expone pa gobierno Hulandes y CAFT, di ta un lider politico cu no ta sincero.
Den historia di nos pais, nunca tabatin un Prome Minister cu a manipula cu informacion y hasta cu medidanan cu el a introduci, di e forma aki, insistiendo cu e 12.6% cu trahadonan publico mester a entrega, ta pa yuda esunnan cu a perde trabao den sector priva.
Awor ta Sali na cla cu e placa reteni ningun dia a bay pa cobra FASE pero si pa yuda Evelyn su gobierno trata di manipula Hulanda, usando e medida contra trahadonan publico, pa reduci gasto di personal di gobierno, manera cu el a firma di lo haci cu Hulanda.
Evelyn Wever Croes lider di MEP a manipula cu e medida aki, el a manipula den un forma bergonsoso, acusando hasta e trahadonan di gobierno pa hendenan sin compasion y cu no kier mustra solidario cu esunnan cu a perde trabao durante di pandemia.
Awor cu el a wordo expone internacionalmente pa un politico gañado sin escrupulo, ta mas cu claro cu trahadonan publico cu a wordo gaña di e forma aki, kier haya nan placa back.
E lo ta un decision husto ya cu den tempo di pandemia cualkier medida lo tin su impacto riba tur famia, tanto di trahadonan publico como di esunnan den sector priva.
Gabinete Wever Croes II tin cu coregi e engaño aki y elimina un medida mentiroso cu a wordo introduci cu e unico meta pa scapa cara cu gobierno Hulandes, pa cumpli cu algo cu e Prome Minister a firma for di 2018 caba.
Ta e unico decision corecto cu gobierno por haci na e momentonan aki, ya cu den e programa di gobernacion cu a wordo firma siman cu a pasa y cu a wordo trata den parlamento, ningun caminda por mira cu gobierno ta dunando trahadonan publico algo back como recompensa.
E mensahe cu sindicatonan di trahadonan publico a manda diahuebs ultimo, tabata hopi concreto y hopi husto, sigur mirando cu tur e tempo aki, Prome Minister a manipula cu e intencion tras di e medida di reduccion di 12.6%, creando pa simannan largo, e impresion cu e placa reteni di trahadonan, lo bay pa yuda otronan.
Awor ta sali na cla cu e placa aki a bay pa yuda gobierno di Evelyn scapa cara dilanti gobierno Hulandes y pa tal motibo tambe Secretario di Estado Raymond Knops a Sali insisti despues, cu e reduccion salarial aki, lo tin cu keda pa un periodo indefini.
Ta e momento ey tambe a bin Sali na cla cu ta Prome Minister Evelyn a firma e acuerdo aki cu Hulanda, cu ta su persona e bin cu e medida aki pa mustra Hulanda cu e lo reduci gasto di persona a costo di cartera di trahadonan publico.
Awe, no mañan y tampoco otro mañan pero awe Gabinete Wever Croes II tin cu revoca e medida aki y asina alivia e tension cu Prome Minister mes a crea, guia pa su mente mentiroso cu el a bin ta mustrando pa cuater aña caba,” Melvin Tromp di AVP a declara.
