Gobierno y Crisis Team ta introduci medidanan nobo na frontera di Aruba: ‘Nos no kier cay den e ripiticion di aña pasa’

Dialuna atardi durante un conferencia di prensa, Crisis Team a anuncia maneho nobo pa frontera di Aruba. Minister President, Sra. Evelyn Wever-Croes, a splica e situacion actual di covid na Aruba y internacionalmente, y Director di Departamento di Aviacion Civil Aruba, Sr. Edwin Kelly a elabora ariba e medidanan nobo pa drenta Aruba y tambe ariba introduccion di categoria nobo “Riesgo Hopi Halto” na Frontera.

Actualmente Aruba su frontera conoce un sistema di dos categoria, categoria abao y categoria halto. Sr. Kelly a splica cu esaki lo cambia den futuro y entrante dia 4 di december 2021 lo introduci un categoria nobo cu ta paisnan di “Riesgo Hopi Halto”.

E siguiente medidanan lo aplica pa pasaheronan procedente di paisnan cu cay bao di e categoria aki; Uno: Pasaheronan cu no ta residente di Aruba no ta bay tin e opcion mas pa haci e COVID-19 test na yegada na Aeropuerto di Aruba. Dos: pa tur pasahero, un PCR test mester wordo haci no mas tarda cu e dia prome cu e vuelo pa Aruba. Y tres: pa loke ta pasahero residente, nan tin e opcion pa haci e PCR test na yegada na Aruba. Sinembargo si nan opta pa haci e test na Hulanda, e test mester wordo haci e dia prome cu e vuelo pa Aruba.

Como cu Hulanda lo ta un di e paisnan den e categoria aki, ta suplica tur hende cu lo ta biahando di Hulanda pa Aruba entrante 4 di december 2021, pa tene cuenta cu esaki. E pasaheronan aki lo mester haci nan PCR test mainta riba e dia prome cu nan vuelo pa Aruba, pa asina nan haya e resultado na tempo. Tambe mester tene na cuenta cu e medidanan nobo aki tambe ta conta pa studiantenan local cu ta desea di bin pasa nan vakantie na Aruba. E regla nobo aki tambe ta bira aplicabel pa pasaheronan cu lo bin Aruba for di Hulanda via di un otro pais (por ehempel USA).

E pasaheronan aki mester haci e PCR test un dia prome cu e biahe pa Aruba y upload e resultado negativo riba e sistema di ED Card prome cu biaha.

Sr. Kelly a agrega tambe, cu frontera di Aruba a cera caba di forma inmediato pa e siguiente paisnan, Sur Africa, Zimbabwe, Namibia, Lesotho, Mozambique, Eswatini y Botswana. “Aunke no tin vuelo directo di e paisnan aki pa Aruba, toch ta importante cu nos ta cerando pa nan y esey a wordo haci caba”, el a señala.

Minister President a indica durante e conferencia cu aunke actualmente e pandemia ta bao di control na Aruba, gobierno ta prepera pa e 2 factor di preocupacion. E prome factor ta e situacion di Hulanda unda cu tin hopi caso y unda e cantidad di casonan ta aumentando hopi lihe, y tambe e situacion internacional cu e variante nobo di Omicron cu a cuminsa na e paisnan di Sur Africa. E medidanan pa evita cu Aruba bay den un di cinco ola, a wordo anuncia caba.

E di dos aspecto cu Minister President a menciona cu ta di preocupacion, y cu tin su persona mas preocupa, ta e factor local. Temporada di fin di aña ta yegando, y manera el a indica, esey ta hustamente un temporada cu na Aruba sa lubida di cuida. “Nos a wak kico a pasa den e di tres ola cu a cuminsa na december y a yega te casi juni prome cu nos por a domin’e completamente. Nos sa cu fin di aña nos ta custuma di celebra, di ta mas cerca di otro y nos ta cuida un poco menos y nos no kier cay den e ripiticion di aña pasa.”, el a bisa.

El a enfatisa cu gobierno no kier ta den un situacion den cual Aruba mester bay den lockdown atrobe y esey ta locual nan ta purbando di evita. El a indica tambe cu nan no kier ta den e situacion tampoco cu Aruba ta perde di gana di e high season pasobra pa hopi hende y pa gobierno tambe el a bisa, e periodo di high season ta e periodo prometedor pa hopi por recupera poco forsa pa por sigui e resto di aña.

Minister a subraya cu aworaki ta importante pa no bay den panico, mirando cu e noticianan di e variante nobo ta causando un cierto grado di panico den comunidad. “Mi no ta kere esaki ta motibo pa panico, e ta motibo pa preocupacion si pero no pa panico. Pakico no, pasobra nos sa kico nos mester haci. Actualmente nos no ta bay tuma mas medida interno, pues na Aruba, nos ta continua cu e medidanan cu nos tin caba”, el a agrega.

Sinembargo el a destaca cu tur hende mester sigui cuida nan pasobra “esey ta e unico cos cu por proteha nos di berdad di e desaroyonan aki y claro nos tin cu sigui promove vacunacion”. El a recorda comunidad tambe cu tur persona cu kier vacuna por bay vacuna ainda.

“Aruba ta den pleno recuperacion, nos no a yega ainda unda nos mester ta pero nos ta na caminda pa yega e caminda di recuperacion y na e momentonan aki nos mester di tur ciudadano di pais Aruba pa percura cu e recuperacion aki no ta wordo stroba ni para, esaki ta locual cu nos ta urgi cada ciudadano di nos pais”, el a agrega.

El a splica tambe cu november tabata un luna durante cual e pandemia bastante bao control na Aruba. Te cu diadomingo 28 di november, tabatin 172 caso activo. El a sigui splica cu november a cuminsa cu 173 caso activo y e casonan tabata fluctua durante e luna, pero november ta cerando mas o menos na e mesun nivel cu el a cuminsa. El a señala tambe cu cantidad di persona den ICU na hospital ta den e cantidad cu por wordo maneha y esaki ta e dos criterionan cu gobierno ta usa pa conclui cu aworaki e pandemia ta bao di control.