Atrobe tin un sero gigantesco di tire di auto acumulando riba e dump na Parkietenbos. Ora esakinan pega candela nan ta produci un nubia scur di huma toxico, enorme cu ta visible desde gran parti di e isla. Asina e empresario di tour ecologico RJ Aruba y ambientalista mr. Anouk Balentina a señala na Bon Dia Aruba.

Tabata RJ Aruba kende a tuma nota di e cantidad di tire y a pone potretnan riba media social, expresando su preocupacion “ Si e biento mester cambia, manera e temporada aki ta sosode frecuentemente, e huma lo penetra den ful e bario y hasta mas leu, incluyendo riba nos aeropuerto internacional Reina Beatrix.” Manera a keda demostra anteriormente, no por paga candela di tire y e huma toxico ta keda colga pa varios dianan te ora e candela paga di su mes.

“Si a caso kier bolbe insinua cu no ta cende e stapel nobo di tire deliberadamente, hecho ta cu e ta mas cu sigur cu e lo pega candela,” ta e advertencia cu Balentina manda pa medio di Bon Dia Aruba.

Al fin y al cabo ta publicamente conoci cu regularmente e dump ta cende na candela espontaneamente. Logicamente, esnan cu ta pone e tirenan na e sitio ta preparando deliberadamente, a proposito un proximo desaster ambiental. “E ausencia di control, supervision y implementacion di regulacion y leynan di parti di Gobierno automaticamente ta promove mas delito medioambiental, cu tin efectonan adverso pa nos comunidad, salubridad publico y nos turismo.”

E ambientalistanan cu a acerca nos medio ta preocupa cu a pesar di tur e bunita palabranan cu gobierno ta hibando e ultimo dianan regardando sostenibilidad, unda hasta a bisa di lo uni na e lucha mundial contra e cambio climatico combatiendo e contaminacion atmosferico, “nos por señala, lamentablemente, cu tur esaki ta un simpel ‘greenwash’ di parti di nos gobierno. Nos ta bayendo den direccion na mas desaster medioambiental.”

Consecuentemente, cu conocemento cu tirenan acumula cu tempo ta bay pega na candela, ya no por bisa cu no tabatin forma pa preveni esaki.

“Serlimar, cu ta esun encarga cu e maneho di desperdicio y e tereno di e landfill Parkietenbos na prome lugar por duna instruccion pa ubica e tirenan aki na otro sitio. Si no tin alternativa, Serlimar lo por isola e tirenan riba e tereno mes. Pa esaki Serlimar mester haci uso di un bulldozer y santo cual DOW tin den su poder y por facilita na Serlimar. DOW ta haci uso di e tereno cu ta bou maneho di Serlimar gratuitamente pa opera un incinerator, pues nan por intercambia servicio y asina traha proactivo den lugar di reactivo, ora ya ta laat, Anouk Balentina bisa Bon Dia Aruba.

“Mi ta spera cu mi pronostico no bira realidad. E ultimo cos cu ami ta desea como habitante di e area, ta pa permanece atrobe bou di un nubia di huma toxico pa varios dia. Pero si esaki sosode, mi no lo duda den denuncia tur esnan responsabel pa e crimen premedita y delibera di intento di asesinato mediante un desastre medioambiental. Tur ta adverti,” tabata e mensahe di mr. Anouk Balentina.