(AP) – Cientificonan Sur Africano a identifica un version nobo di e coronavirus e siman aki cu nan ta bisa ta responsabel pa un aumento recien den infeccionnan di COVID-19 cu a surgi na Gauteng, e pais su provincia mas pobla.

Te ainda no ta cla unda e variante nobo aki a bini of ser crea, pero e prome biaha cu el a ser detecta ta pa cientificonan na Sur Africa y awo ta mira den pasaheronnan di Belgium, Botswana, Hong Kong y Israel.

Minister di Salud Joe PHaahla a bisa cu e variante ta conecta na un ‘aumento exponencial” di casonan den e dianan recien, aunke expertonan te ainda ta determinando si e variante nobo en realidad ta responsabel pa e aumento aki.

Di solamente 200 caso nobo confirma pa dia den e simannan reciente, Sur Africa a mira e cantidad di casonan diario aumenta te na 2,465 riba diahuebs. Luchando pa purba splica e aumento den casonan, cientificonan a studia muestra di e brote, unda cu a descubri e variante nobo aki.

Den declaracion riba diabierna, e World Health Organization a designa esaki como un “variante di preocupacion,” yamando e “Omicron” basa riba un letter den e alphabet griego.

Despues di e conveni cu un grupo di experto pa revisa e datonan, e agencia di Nacionnan Uni a bisa cu e “evidencia preliminar ta sugeri un aumento den e riesgo di bolbe infecta cu e variante aki,” compara cu e variantenan anterior.

“E cantidad di casonan unda cu e variante aki ta aparece ta aumentando den casi tur provincia di Sur Africa,” e World Health Organization a declara.

Cientificonan ta preocupa cu e variante aki pa motibo cu aparentemente e tin un cantidad mas halto di mutacion, cual ta 30, den e proteina di coronavirus, cual ta afecta con lihe e ta plama entre hende.

Sharon Peacock, ken a lidera e investigacion di e secuencia genetico di COVID-19 na Britain na e UNiversity of Cambridge, a bisa cu e datonan te cu awo ta sugeri cu e variante nobo tin mutacion “consistent cu un nivel di transmision mas halto,” pero tambe a bisa cu “e importancia di e mutacionnan te ainda no ta conoci.”

Lawrence Young, un virologo na University of Warwick, a describi Omicron como “e mutacion mas pisa di e virus cu el a yega di mira,” incluyendo un potencial di cambionan preocupante cu no a ser mira antes den e mesun virus.

Dr. Anthony Fauci, e dokter profesional den malesa infeccioso, a bisa oficialnan Mericano a aregla un yamada cu e oficialnan Sur Africano riba diabierna pa por haya mas informacion y detaye, y bisa cu no tabatin ningun indicacion cu e virus a yega na Merca.

Te cu awo, e informacion disponibel tocante e variante “Omicron” ta cu e ta geneticamente distinto na e variantenan anterior, manera e variantenan beta y delta, pero cientificonan te ainda no sa si e cambionan genetico aki ta haci e virus mas transmisibel of peligroso. Actualmente no tin evidencia cu ta comproba cu e variante ta causa malesa mas severo.

E ta hopi probabel cu lo tarda algun siman pa por saca afo si omicron ta mas infeccioso y si e vacunanan actual ta efectivo den contra di esaki.

Peter Openshaw, un profesor di medicina experimental na Imperial College London a bisa cu e “no ta probabel” cu e vacunanan actual no lo traha, notando cu nan ta efectivo contra varios otro variante di e virus.

Aunke algun di e cambionan genetico den omicron aparentemente ta causa preocupacion, te ainda no ta cla si e variante aki lo ta un peligro na e salud publico. Algun variante anterior, manera e variante beta, inicialmente a alarma cientifico, pero no a plama mucho leu. “Nos no sa si e variante nobo aki por causa problema den e regionnan unda cu delta ta,” Peacock di University of Cambridge a bisa. “E hurado awo mester mira con e variante aki lo comporta unda cu tin otro variante ta circula.” E variante delta ta e forma mas dominante di COVID-19, responsabel pa casi 99% di e secuencia someti na e base di datonan mundial mas grandi.

Coronavirus ta keda den mutacion mientras cu e ta plama, y varios variante nobo, incluyendo esunnan cu cambio genetico preocupante, hopi biaha ta muri. Cientificonan ta monitor e secuencianan di COVID-19 pa mutacion cu lo por haci e malesa mas transmisibel of mortal, pero nan no por determina esaki pa medio di simplemente mira e virus.

PEacock a bisa cu e variante “por a desaroya den un persona cu tabata infecta, pero no por a deshaci di e virus, dunando e virus e chens di desaroya su mes geneticamente,” den un caso similar na e manera cu expertonan ta pensa di e variante alpha, cual a ser identifica prome na England, cual a surgi pa medio di mutacion den un persona cu un sistema inmunologico comprometi.