Darlin a sinti un kier pa saca potret di su ambiente, y tur loke tabata rondona su persona, te cu a yega un momento unda cu el a sinti cu e lo kier “ser paga pa e trabao cu mi ta haci.”

Asina e hoben aki a logra converti un kier cu a surgi den un momento unda cu e tabata kier saca potret di kico cu ta, na un carera cu e dia di awe ta genera ganashi, mientras cu e por sigui haci lo ke e gusta.

E palabra fotografia, of “Photography” den Ingles, literalmente ta nifica ‘pintando cu luz,’ cual ta bini di e palabra Griego ‘photo’ nificando luz, y ‘graph’ nificando pinta. “Photography” (fotografia) ta e proceso di graba un imagen, sea den film of den forma digital.

Fotografia por ser mira den casi tur aspecto di bida moderno. Como forma di comunicacion y documentacion, fotografia ta presente den corant, revista, aviso, poster, television, internet, paspoort, ID, y te hasta den sistema di supervision, pero esaki ta yega te hasta na medicina. Fotografia ta hunga un parti integro di nos bida diario, cu ta importante hasta den nos bida domestico, y actividadnan recreacional.

Mayoria di e fotografianan produci den e dia di awe, ta tuma e forma di ‘snapshot’ cu ta documenta actividadnan manera celebracionnan, reunnionnan cu familiarnan of amistad, cual hopi biaha tambe ta publica riba rednan social.

Apesar di e rol importante aki cu fotografia ta hunga den nos bida diario, pa hopi persona, fotografia ta algo hopi artificial, y hopi biaha nos ta haya facil pa gara un camara y saca un potret, sea pa tin esaki como recuerdo, of pa publica riba red social, of solamente pa mustra otro persona na un dado momento.

Aunke Darlin tambe ta comparti e pensamento aki, cu fotografia ta ‘superficial,’ “mi ta gusta haci cosnan mustra bunita. Tambe mi gusta sconde mensahenan den e fotografia, y trece esaki dilanti na un manera cu ta haci e mensahe mas facil pa digeri,” Darlin a expresa. Fotografia ta prevalece den varios aspecto di nos bida moderno, sinembargo solamente un minoria di e fotografianan cu ser saca ta considera como ‘arte’ y hopi biaha e fotografianan aki ta colga den museo y galeria den maneranan similar cu pintura, cual mayoria si ta considera ‘arte.’

Fotografia a trece cambio y impacto den e bida di Darlin, di tal manera cu den e aspecto comercial, fotografia a permiti su persona tin mas tempo liber, unda cu el a logra explora e banda creativo tambe di e carera aki. Pa medio di tin e habilidad di inverti mas tempo den e desaroyo di su creatividad, Darlin a yega na logronan sumamente significante y bunita pa un hoben cu tin un amor pa loke e ta haci. El a logra explora fotografia den un forma artistico, y te hasta a yega na tin un exhibicion y colaboracion cu Museum of The Americas, pero tambe a duna fruto den varios otro proyecto cu el a logra haci y participa aden.

Manera menciona, e arte di fotografia ta un aspecto di gran importancia den nos bida. “Sin fotografia nos no por bolbe bek den tempo, y sin e habilidad di fotografia nos mes, of fotografia cosnan rond di nos, nos lo tin un buraco den comunicacion, y esaki lo ta un buraco sumamente grandi.” Darlin a comenta, agregando cu “fotografia ta yuda nos comunica, fotografia ta yuda trece historia dilanti, e ta yuda den hopi aspecto importante, mas di loke nos por pensa.”

Un di e miho partinan di practica fotografia como carera, ta cu esencialmante bo ta traha a base di bo persona, “bo tin un agenda flexibel” cual duna e fotografo e oportunidad di pasa tempo sumamente importante “cu famia, cu amistad, of cu mi mes, cu si mi tabata eherce otro trabao, mi no lo por haci.”

Semper den bida lo tin obstaculo ora cu nos kier logra algo, pero semper nos tin cu corda cu perseverancia y consistencia ta clave pa por sigui bay dilanti den loke nos propone pa nos mes. “Bo mester keda consistente, y bo mester kere den bo mes,” Darlin a expresa. “Ta bay tin momentonan unda cu bo lo pensa ‘mi ta sinti cu a yega momento di rindi’ pero bo mester sigui pusha bay dilanti, y bo lo realisa cu e tabata bal la pena traha duro pa bo logra algo.” Darlin a clausura.

Ora cu nos kere den nos mes, y nos sigui pusha bay dilanti cu consistencia y perseverancia den tur nos metanan, hasta un simpel “kier,” cu pa hopi por ta algo superficial, por converti den un carera, cu awe ta permiti un hoben realisa su metanan, y genera entrada pa su mes, expresa su mes artisticamente, comparti un mensahe cu un audiencia, of un solo persona cu mira su fotografianan, mientras cu e por mantene un conexion importante y cu su sernan keri, pero tambe cu su mes.