(NLTimes) – Votadonan Hulandes di minorianan etnico ta sinti cu nan no ta adecuadamente representa den parlamento. Investigadonan cu a conduci un encuesta yama National Voter Survey a yega na e conclusion aki den e prome biaha cu nan a paga extra tino riba e grupo aki, cual ta forma 10% di e cantidad total di votado na Hulanda, NOS a reporta.
Casi 73% di e minoria etnico aki cu tin derecho di vota y ta eherce esaki, ta kere cu parlamento no ta demostra ni paga hopi tino riba nan interes, of no ta haci esaki lo suficiente. Mas di un tercer parti di e grupo aki a bisa cu tin hopi tiki parlamentario di minorianan etnico. E sentimento aki di poco representacion ta hopi mas presente den votadonan cu sa experiencia discriminacion.
Di tur e votadonan aki, 42 porciento a bisa cu nan ta experiencia discriminacion constantemente of por lo menos frecuente. E porcentahe aki ta hopi mas halto den personanan Hulandes cu ta descendiente di famia Surnameño of Africano, y/of ta entre segundo generacion di inmigrante.
Votadonan cu ta parti di e grupo aki di minoria etnico tabata vota mas tanto pa e PvdA, pero esaki ta cambiando cu aumento recien den partidonan cu ta enfoca explicitamente y te hasta ta dedica na e grupo aki.
DENK ta gana bon cu e grupo di Hulandesnan descendiente di Marocano y Turco, Bij1 entre Hulandesnan cu ta descendiente di Surinames y Africano, y esunnan cu ta Hulandes Asiatico mayoria biaha ta vota pa e partidonan derechista.
Den Europa, Hulanda ta e lider den e manera cu e partidonan di e tipo aki a cuminsa surgi y forma, investigador MArcel Lubbers a conta NOS. “Si e yegada di e partidonan manera DENK of Bij1 ta kita of empodera e sentimento di falta di representacion te ainda ta di saca afo awo cu ambos ta den parlamento.”
