(AP) — Dos ex-trahador di Netflix kende a critica comentarionan anti-transgenero di Dave Chappelle den su special di TV ta retirando kehonan laboral y un di nan a renuncia di e compania, segun a anuncia dialuna.
Terra Field, ingeniero di software senior, kende ta transexual, a anuncia cu Field boluntariamente a renuncia for di diadomingo. “Esaki no ta con mi a pensa cos lo caba, pero mi ta alivia di tin un final”, Field a bisa den un carta di renuncia cu a post online.
‘The Closer’ di Chappelle a transmiti pa prome biaha dia 1 di october generando miyones di views. Sinembargo, e comentarionan di Chappelle tocante comunidad transgenero a genera protesta dentro di Netflix y for di activistanan. Alrededor di 30 trahador di Netflix a tene un walkout dia 20 di october y a join un rally na oficina di Netflix na Los Angeles.
E compania a suspende Field despues di atende un reunion di negoshi pa ehecutivonan senior, pero rapidamente a pone back na trabao.
Field y B. Pagels-Minor, un manager di programa di operacion di lansamento di wega kende tambe ta trans, a entrega un keho cerca e National Labor Relations Board. Nan a acusa Netflix di represalia contra e trahadornan pa stop nan di papia tocante condicionnan laboral, incluyendo ‘productonan di Netflix y e impacto di su escogencianan di producto riba comunidad LGBTQ+’.
“Nos a resolve nos diferencianan di un forma cu ta reconoce e erosion di confiansa di ambos banda y, nos ta spera, ta permiti tur hende pa bay dilanti”, Netflix a bisa den un declaracion.
Pagels-Minor a reconoce cu nan tabata e empleado cu Netflix a retira luna pasa pa supuestamente revela informacion financiero confidencial tocante cuanto a paga pa ‘The Closer’. A haci referencia na e informacion aki den un articulo di Bloomberg.
Pagels-Minor a rechasa e acusacionnan.
Neftlix a ricibi hopi critica no solamente pa e special di TV sino pa memo interno respondiendo na preocupacion di empleadonan, incluyendo e declaracion di co-CEO, Ted Sarandos cu ‘contenido riba pantaya no ta traduci directamente na daño den mundo real’.
Sarandos tambe a skirbi cu Netflix no ta permiti titulonan cu ta ‘diseña pa incita odio of violencia y nos no ta kere cu ‘The Closer’ ta crusa e linea aki’.
Netflix ta continua permitiendo streaming di e special.
Riba potret: Dave Chappelle.
